Փաստ ինֆո

«Դեռևս 2022թ․ պայմանավորվածություն էր ձեռք բերվել, որ սահմանազատման հարցերով հանձնաժողովների մանդատի մեջ պետք է ներառվեն նաև սահմանային անվտանգության հարցերը։ ՀՀ-ն պայմանավորվածության համաձայն ստեղծեց ՀՀ և Ադրբեջանի միջև պետական սահմանի սահմանազատման ու սահմանային անվտանգության հարցերով հանձնաժողով՝ ենթադրելով, որ պայմանավորվածության համաձայն հանձնաժողովները նաև սահմանային անվտանգության հարցերով կզբաղվեն։ Ադրբեջանն էլ, ի հեճուկս պայմանավորվածության, իր կողմից ստեղծած հանձնաժողովը կոչեց Ադրբեջանի և ՀՀ միջև պետական սահմանի սահմանազատման պետական հանձնաժողով՝ բաց թողնելով անվտանգության կոմպոնենտը»,-Կառավարության նիստից առաջ իր ելույթում ասաց Նիկոլ Փաշինյանը։

Ըստ վարչապետի՝ այս և մի քանի այլ հանգամանքներ հիմք են տալիս եզրակացնելու, որ Ադրբեջանը շարունակում է վարել «այն ինչ ուզում եմ, տվեք ինձ բանակցային եղանակով, հակառակ դեպքում ես դա կվերցնեմ պատերազմով» քաղաքականությունը։

«Իսկ ի՞նչ է ուզում Ադրբեջանը․ նկատել եք, որ Ադրբեջանը պարբերաբար խոսում է, ինչպես ինքն է ձևակերպում, «չորս գյուղերի» տարածքների մասին՝ միևնույն ժամանակ հրաժարվելով ընդունել, որ ադրբեջանական օկուպացիայի տակ են գտնում ՀՀ 31 ոչ անկլավային գյուղերի կենսական նշանակության տարածքներ։ Այս իրավիճակում մեր դիրքորոշումը խիստ կառուցողական է․ մենք ասում ենք՝ որպեսզի զորքերն իրենց այսօրվա դիրքերիից հետ գնան, անհրաժեշտ է քարտեզի և գետնի վրա վերարտադրել Հայաստան-Ադրբեջան սահմանը և երկու երկրների զորքերը ետ քաշել այդ սահմանային գծի նկատմամբ։ Սահմանի վերարտադրությունից հետո եթե պարզվի, որ գծից առաջ զորքեր կան, երկուստեք պետք է ետ քաշվեն։ Պաշտոնական Բաքուն շարունակում է այս իրավիճակը ձևակերպել այնպես, որ ադրբեջանական զորքերը ՀՀ 31 գյուղերի տարածքներից որևէ կերպ ետ չգնան։ Սա կառուցողական դիրքորոշում չէ, և ես ՀՀ անունից կրկին վերահաստատում եմ ՀՀ պատրաստակամությունը՝ գնալ կոնկրետ լուծումների, որոնց սկզբունքներն արդեն իսկ պայմանավորված են։ Ի՞նչ սկզբունքների մասին է խոսքը․ միջազգային հարթակներում գրավոր կերպով հրապարակային արձանագրված պայմանավորվածության, որ ՀՀ-ն և Ադրբեջանը միմյանց տարածքային ամբողջականությունը ճանաչում են 1991թ․ ԱԼմա-Աթայի հռչակագրի հիման վրա և այն պետք է լինի սահմանազատման գործընթացի քաղաքական հիմքը»,-նշեց վարչապետը։

Ըստ այդմ, ինչպես Փաշինյանը նկատեց, մնացել է տեխնիկական աշխատանքը՝ քարտեզների և գետնի վրա վերարտադրել հայկական և ադրբեջանական ԽՍՀ-ների միջև 1991թ․ դրությամբ դե յուրե առկա սահմանը՝ դրանց իրավական հիմքերը վեր հանելու միջոցով և լուծել հարցը։

«Նույն սկզբունքով պետքէ հասցեագրել, այսպես կոչված, էսկլավ-անկլավների հարցը, ասենք՝ Արծվաշենի տարածքը որոշելու համար պետք է իրավական փաստաթղթերի հիման վրա գծել նրա սահմանը և հետագա բանակցությունների ձևով լուծել նաև այդ հարցը։ Ադրբեջանը, սակայն, խուսափում է գնալ նման լուծումների՝ փորձ անելով գնալ տեղայնացման ճանապարհով։ Մենք համաձայն ենք նույնսիկ այս տարբերակին և սահմանագծում իրականացնել անգամ մարզ առ մարզ՝ ամեն հատվածում վերարտադրելով սահմանը և ապա իրականացնել զորքերի դիրքավորման ճշգրտում՝ ըստ վերարատադրված սահմանագծի, իսկ էքսկլավային հարցերը թողնել ամենավերջին փուլին»,-ասաց Փաշինյանը։

Աղբյուր` Փաստինֆո