Փաստ ինֆո

Կոռուպցիոն գործով տնային կալանքի տակ գտնվող Անի Իսպիրյանին ԱՆԻՖ-ի տնօրենների խորհրդի նախագահի պաշտոնից ազատելու հարց օրակարգում դեռևս չկա։

«Փաստինֆո»-ն երեկ հայտնել էր, որ ԱՆԻՖ-ի կայքում դեռևս շարունակվում է հիշատակվել նրա տվյալները՝ որպես տնօրենների խորհրդի նախագահ։ Իրավապահները խուսափում էին տեղեկություն տրամադրել՝ արդյոք կասեցված է Իսպիրյանի լիազորությունները, թե՝ ոչ, քանի դեռ նա մեղադրյալի կարգավիճակում է, իսկ ԱՆԻՖ-ից առաջարկել էին դիմել այն կառույցին, որը նշանակում կամ պաշտոնից ազատում է ԱՆԻՖ-ի խորհրդի անդամներին, նախագահին։ Այս դեպքում այդ կառույցը ՀՀ էկոնոմիկայի նախարարությունն է։

Այսօր «Փաստինֆո»-ն կապ է հաստատել ՀՀ էկոնոմիկայի նախարարության հետ, որտեղից հաստատեցին, որ Իսպիրյանը շարունակում է պաշտոնավարել՝ որպես ԱՆԻՖ-ի տնօրենների խորհրդի նախագահ։ Կառույցից նշեցին, որ հաշվի են առնում անմեղության կանխավակածը, դեռևս նախաքննություն է ընթանում և առկա չէ օրինական ուժի մեջ մտած մեղադրական դատավճիռ, որը կարող է հիմք լինել աշխատանքից ազատելու համար, ուստի, Անի Իսպիրյանը շարունակում է լինել նախագահ։ Բացի այդ, Խորհրդի նախագահի պաշտոնից ազատման համար պետք է խորհրդի նիստ անցկացնել, որն առաջիկայում նախատեսված չէ։

Փաստացի, առաջիկայում կոռուպցիոն չարաշահումների մեջ մեղադրվող Իսպիրյանի լիազորությունների դադարեցման հարց չի բարձրացվի։ Ավելին, կասեցման հարց եւս չկա, թեեւ նա տանից դուրս գալ չի կարող ու ֆիզիկապես իր աշխատավայրում լինել չի կարող։
Նշենք, որ Անի Իսպիրյանը բոլորովին վերջերս էր նշանակվել ԱՆԻՖ-ի տնօրենների խորհրդի նախագահ՝ փոխարինելով Ֆրանսիայի նախկին վարչապետ և ներքին գործերի նախարար Դոմինիկ Դը Վիլպենին։

ԱՆԻՖ-ում ղեկավար կազմի, այդ թվում՝ տնօրենների խորհրդի կազմի փոփոխության մասին հայտնի էր դարձել 2023թ տարեվերջին։ ԱՆԻՖ-ի տնօրենների խորհրդի օտարերկրյա անդամները, այդ թվում՝ նախագահ Դոմինիկ Դը Ֆիլպենը, որը խորհրդի նախագահ էր նշանակվել Տիգրան Ավինյանի՝ լիազորությունների դադարումից հետո, Իսիդորո Լուչիոլան, ինչպես նաև՝ ԱՆԻՖ-ի ներդրումային կոմիտեի նախագահ Խալեդ Հելիոուին և Ներդրումային կոմիտեի անդամ Մայքլ Թոմփսոնը։

ԱՆԻՖ-ի տնօրենների խորհրդի անդամներ են նշանակվել ՀՀ փոխվարչապետ Մհեր Գրիգորյանի գրասենյակի ղեկավար Էդգար Մկրտչյանը, ՀՀ փոխվարչապետ Տիգրան Խաչատրյանի գրասենյակի ղեկավար Արման Ադիլխանյանը, իսկ խորհրդի նախագահ, ինչպես արդեն նշվեց, նշանակվել է Անի Իսպիրյանը։

Հատկանշական է, որ Պետական վերահսկողական ծառայությունը (ՊՎԾ) ուսումանսիրություններ է արել ԱՆԻՖ-ում՝ Պետական հետաքրքրությունների ֆոնդ ընկերությունում ու պարզել, որ ընկերությունը պետությունից ստացած ֆինանսական միջոցները արդյունավետ չի օգտագործել։ Թե կոնկրետ ում նախագահության ժամանակահատվածի առնչությամբ են հայտնաբերվել չարաշահումները՝ պաշտոնապես հայտնի չէ։ Այս դրվագով «Փաստինֆո»-ն գրավոր հարցում է ուղարկել Գլխավոր դատախազություն՝ պարզելու, թե արդյո՞ք քրեական վարույթ նախաձեռնվել է ուսումնասիրությունների հիման վրա, որոնց մասին հայտնել էր անձամբ ՊՎԾ ղեկավար Ռոմանոս Պետրոսյանը, սակայն այս հարցմանը պատասխան դեռևս չի ստացվել։

Հիշեցնենք, որ ՀՀ էկոնոմիկայի արդեն նախկին փոխնախարար, ԱՆԻՖ-ի տնօրենների խորհրդի նախագահ Անի Իսպիրյանի մասնակցությամբ կոռուպցիոն սկանդալի մասին հայտնի դարձավ հունվարի 31-ին։ ՀՀ ՔԿ-ն պաշտոնապես հայտարարեց, որ ՀՀ Էկոնոմիկայի նախարարությունում և տարբեր անձանց բնակարաններում՝ ընդհանուր առմամբ 15 վայրում խուզարկություններ են իրականացվել՝ ՔԿ-ում քննվող երկու քրեական վարույթի շրջանակներում, որին հաջորդել են աղմահարույց ձերբակալություններ։

Մասնավորապես, երկու վարույթներով ձերբակալվել է յոթ անձ, այդ թվում՝ Էկոնոմիկայի՝ պաշտոնից ազատված փոխնախարար Անի Իսպիրյանը և Պետական ներդրումների քաղաքականության վարչության պետ Լիլյա Սիրականյանը։ Հետագայում Իսպիրյանի նկատմամբ որպես խափանման միջոց սահմանվեց տնային կալանքը։

Հեղինակ՝ Իզաբել Սահակյան

Աղբյուր` Փաստինֆո