Փաստ ինֆո

ՀՀ Քննչական կոմիտեն ստացել է «Andranik Dovlatyan» օգտատիրոջ կողմից Ն.Ս.Օ.Տ.Տ Ամենայն Հայոց Կաթողիկոսի, Շիրակի թեմի առաջնորդ Տ. Միքայել եպիսկոպոս Աջապահյանի, այլ բարձրաստիճան հոգևորականների, ինչպես նաև՝ Իրանի Գերագույն հոգևոր առաջնորդ Այաթոլլա Խամենեինի հասցեին ուղիղ եթերում հայհոյանքներ և զրպարտություն պարունակող հայտարարություններ կատարելու վերաբերյալ փաստաբանների հաղորդումը։ ՔԿ-ից «Փաստինֆո»-ին հայտնեցին, որ հաղորդումը ստացել են, այս պահին ուսումնասիրվում է։

Հիշեցնենք, որ ավելի քան 20 փաստաբան հաղորդում է ներկայացրել՝ պահանջելով քրեական վարույթ նախաձեռնեն Անդրանիկ Դովլաթյանի դեմ։ Ըստ Արա Զոհրաբյանի՝ Անդրանիկ Դովլաթյանի նշված արարքները պարունակում են առնվազն երկու հանցագործության հատկանիշներ։

«Խուլիգանությունը (ՀՀ քրեական օրենսգրքի 297-րդ հոդված) հասարակության նկատմամբ անհարգալից կամ իրավական կամ բարոյական նորմերի նկատմամբ բացահայտ արհամարհական վերաբերմունք ցուցաբերելն է, որը դրսևորվել է անձին ստորացնելով կամ հայհոյանքներով կամ անպարկեշտ արտահայտություններով կամ համակեցության կանոնների ցուցադրաբար անտեսմամբ մարդկանց անդորրը խախտելով, իսկ եթե այդ արարքը կատարվել է տեղեկատվական կամ հաղորդակցական տեխնոլոգիաներն օգտագործելով, ապա պատժվում է նաև ազատազրկմամբ երկուսից հինգ տարի ժամկետով: Մեր կարծիքով, նշված արարքները պետք է քննարկել նաև ՀՀ քրեական օրենսգրքի 329-րդ հոդվածի համատեքստում (ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը): Ակնհայտ է, որ Իրանի Իսլամական Հանրապետության հոգևոր առաջնորդի նկատմամբ հրապարակային լկտի զրպարտչական նյութը թշնամանք է առաջացնելու երկու ազգերի միջև»,-նշել է Զոհրաբյանը։

Ի․ Ս․

Աղբյուր` Փաստինֆո