Փաստ ինֆո

Երևանի տրանսպորտային համակարգը վերջին տարիներին որոշակի փոփոխությունների է ենթարկվել, բայց մենք չենք կարող ասել, որ ունենք կատարյալ կամ կատարյալին մոտ տրանսպորտային համակարգ։ Այս մասին այսօր Երևանի ավագանու նիստում հայտարարեց փոխքաղաքապետ Սուրեն Գրիգորյանը՝ ներկայացնելով Երևանում տրանսպորտի թանկացման վերաբերյալ նախագիծը:

«Մյուս կողմից՝ չենք էլ կարող ասել, որ ունենք այն տրանսպորտային համակարգը, որի ժամանակ ձևավորվել է գործող սակագինը, ուստի, հաշվի առնելով, որ տրանսպորտային համակարգը շարունակական բարեփոխումների է ենթարկվում, մենք այդ փոփոխություններին համահունչ պետք է կառուցենք նաև մեր քաղաքականությունը»,- ասել է Սուրեն Գրիգորյանը։

Նա նշեց, որ տրանսպորտային համակարգն այսօր սուբսիդավորվում է։ «Հարցն այն է, թե որ մասն է վճարվելու ուղևորափոխադրումներից, որ մասն է վճարելու համայնքային բյուջեից, այսինքն, ի հաշից այլ ոլորտների»։
Նա մասնավորապես նշեց, որ մետրոպոլիտենի և տրոլեյբուսների սուբսիդավորումը հասել է 7 մլրդ դրամի, այս գումարը գնալով աճում է։

«Եթե անգամ նախագիծն այս տեսքով ընդունվի՝ մենք դուրս չենք գալու սուբսիդավորման տրամաբանությունից, այսինքն, խոսքն այն մասին չէ, որ սակագների վերանայումն անենք այնպես, որ ոլորտը չսուբսիդավորվի։ Հարցն այն է, որ ամեն ինչ ունենա տրամաբանություն։

Լավ է, որ ունենանք նոր շարժակազմ, բայց եթե մենք չենք ուզում, որ 10 տարի անց նորից չկանգնենք կոտրված տաշտակի առաջ, որ էլի չհասկանանք որտեղից գումար հայթայթենք նոր շարժակազմ ունենալու համար, ապա պետք է ունենանք նոր համակարգ, որի տրամաբանությունը կայանում է նրանում, որ մշտապես տրանսպորտից օգտվողների և խոցելի խմբերի համար, եթե տրանսպորտի սակագինը պետք է վերանայվի, ապա պետք է վերանայվի նվազագույնս, կամ չվերանայվի, իսկ այն անձանց համար, ովքեր հազվադեպ են օգտվում տրանսպորտից ու նրանց համար տրանսպորտի թանկացումը դրամատիկ զարգացման չի բերում, օրինակ զբոսաշրջիկների համար տրամաբանություն չկա, որ նրանց ուղևորափոխադրումը մենք սուբսիդավորենք»։

Նա նաև հայտնեց, որ նախագիծը ենթադրում է մի քանի տոմսային փաթեթներ՝ ամսական, եռամսյակային, տարեկան, 70 րոպեի տոմս, որը ենթադրում է երկու տեղափոխություն, մեկօրյա տոմս, մեկ շաբաթվա տոմս, նաև մինիմալ՝ 10 փաթեթով լիցքավորվող տոմս:

«Այսօր ամենաակտիվ քննարկման առարկա է սահմանափակումների հարցը: Ասեմ, որ այս պահին, ես կարծում եմ, որ պետք է հակվենք այն տարբերակին, որ վերացնենք սահմանափակումները տոմսային համակարգերից, այսինքն ուղևորությունների քանակը լինի անսահմանափակ»:

Աղբյուր` Փաստինֆո