Փաստ ինֆո

Հայաստանի Հանրապետության Արտաքին գործերի նախարարության կայքից ԼՂ հիմնախնդրին վերաբերող նյութերի անհետացումը, որքան էլ որ փորձեն ներկայացնել որպես տեխնիկական խնդիր, իրականում ՀՀ իշխանությունների՝ Ադրբեջանի հետ համագործակցության արդյունք է։ Եթե անգամ որոշ ժամանակ անց, ինչպես իրենք են ասում, «տեխնիկական խնդիրը» լուծվի, չնայած ես խիստ կասկածում եմ դրանում, ապա այդ բաժնում արդեն կտեսնեք միայն լղոզված ինչ-որ նյութեր՝ այն էլ զուտ նրա համար, որ ներքին հույզերը հանդարտացնեն։ «Փաստինֆո»-ի հետ զրույցում նման համոզմունք հայտնեց Արցախի վտարանդի Ազգային ժողովի պատգամավոր Մետաքսե Հակոբյանը։

«Հինգ ամիս է արդեն, որ Արցախը հայաթափված է, և շուրջ 150 հազար հայ բռնի տեղահանված է իր բնօրրանից։ Նրանցից շատ-շատերն ամիսներ շարունակ ոչ միայն իրենց հասանելիք սոցիալական աջակցությունը չեն ստացել, այլև նպաստները, թոշակները։ Միայն իմ անձնական դիտարկումների արդյունքում պարզվել է, որ հունվարից 300-ից ավել բռնի տեղահանվածներ չեն ստացել սոցաջակցությունները, թոշակները։ Եվ երբ փորձել ենք պարզել պատճառը, ասել են՝ «տեխնիկական խնդիր է»։ Սա էդ մարդկանց գործեալոճն է՝ անել իրենց սև գործն ու դա ձևակերպել որպես «տեխնիկական խնդիր»։ Ես վստահ եմ, որ երկու ամիսը լիովին բավարար էր տեխնիկական խնդիրները վերացնելու համար։ Հիմա էլ ՀՀ ԱԳՆ կայքից ԼՂ հիմնախնդրին վերաբերող բաժնի հեռացումն են փորձում որպես տեխնիկական խնդիր ներկայացնել։ Իսկ ես համոզված եմ, որ դա Ադրբեջանի հետ ՀՀ իշխանությունների համագործակցության արդյունք է։ Այս քայլով ՀՀ օրվա իշխանությունը ոչ միայն լավություն է անում Ադրբեջանին, այլև, ցավոք, աշխարհին է հասկացնում, որ Հայաստանն այլևս հետաքրքված չէ Արցախի հարցով»,-շեշտեց Հակոբյանը։

Անդրադառնալով նախորդած երեսուն տարիներին Արցախի հարցով ընթացող բանակցային գործընթացին՝ Արցախի ԱԺ պատգամավորը նկատում է՝ հիմնախնդրի լուծման վեց տարբերակ է քննարկվել, ու աշխարհն ակնհայտորեն ընդունել է ԼՂ հիմնախնդրի գոյությունը։

«Մինչև 2018թ․ իշխանազավթումը ԼՂ հիմնախնդրի շուրջ բանակցություններ էին ընթանում և անգամ այսօր, անկախ Արցախի՝ ամբողջությամբ բռնազավթված լինելուց, ադրբեջանական քարոզչությունից ու դրան՝ ՀՀ իշխանության ցուցաբերած աջակցությունից, նույն այդ աշխարհը չի կարող հերքել ԼՂ հիմնախնդրի լուծված չլինելը։ Եթե նման բան տեղի ունենա, ապա աշխարհի հիմքերը կխարխլվեն ամբողջությամբ։ Ցավոք, տեսնում ենք, որ Արցախին վերաբերող հարցերն արդեն ռուսներն ու ադրբեջանցիներն են իրար հետ քննարկում, իսկ Հայաստանը՝ ի դեմս օրվա իշխանությունների, լրիվ մի կողմ է քաշվել։ ՀՀ վարչապետի աթոռը զավթած անձը, թեկուզ ստորագրել է 2020թ․ նոյեմբերի 9-ի հայտարարության տակ՝ հանդես գալով որպես Արցախի անունից բանակցող, վաղուց հրաժարվել է պաշտպանել Արցախի շահերը՝ բոլոր որոշումները թողնելով ռուս-ադրբեջանական տիրույթում»,-ասաց Հակոբյանը՝ ևս մեկ անգամ շեշտելով, որ ՀՀ ԱԳՆ կայքից ԼՂ հիմնախնդրին վերաբերող նյութերը նույնությամբ չեն վերականգնվելու, այլ միայն այնքանով, որ հանդարտացնեն մարդկանց հույզերը։

Աղբյուր` Փաստինֆո