Փաստ ինֆո

Համոզված եմ, որ ֆիլմը հետևանք չի ունենալու, որևէ մարմին վարույթ չի հարուցելու, իսկ եթե նույնիսկ հարուցեն, ապա կա՛մ ԲԴԽ-ն է կամավոր ինքնաբացարկ հայտնելու, կա՛մ դատավորները, որոնց նկատմամբ վարույթներ կհարուցվեն, կներկայացնեն բացարկի միջնորդություններ, որովհետև ԲԴԽ աշխատակազմ հանդիսացող Դատական դեպարտամենտը, այսինքն՝ ԲԴԽ-ն, արդեն ունի կանխակալ մոտեցում՝ այս հինգ գործի վերաբերյալ։ Այս մասին «Փաստինֆո»-ի հետ զրույցում ասաց ԲԴԽ նախկին նախագահ Ռուբեն Վարդազարյանը։

Հիշեցնենք, որ ԲԴԽ-ի պաշտոնական էջում տեսանյութ է հրապարակվել, որով ԲԴԽ-ի աշխատակազմ հանդիսացող դատական դեպարտամենը դատավորներին է մեղադրել Ռոբերտ Քոչարյանի, Սերժ Սարգսյանի, Լևոն Երանոսյանի, Գագիկ Խաչատրյանի և Մանվել Գրիգորյանի գործերի տապալման համար՝ դա կապելով դատական նիստերի ձգձգման հետ և դժգոհելով, թե դրա հետևանքով Ռ․ Քոչարյանի, Ս․ Սարգսյանի գործով վաղեմության ժամկետներն անցել են։ Ավելին, դեպարտամենտը հորդորել էր վարույթ հարուցող մարմիններին՝ տեսանյութը դիտարկել կարգապահական վարույթ հարուցելու ուղղությամբ գործողություններ իրականանցնելու համար։ Մասնագիտական հանրության գնահատմամբ՝ սա ոչ այլ ինչ է, քան ճնշում՝ դատարանների նկատմամբ, միջամտություն՝ ընթացիկ գործերի նկատմամբ, որը պարունակում է ԲԴԽ-ի կողմից առերևույթ արդարադատության իրականացմանը խոչընդոտելու, պաշտոնեական լիազորություններն անցնելու հատկանիշներ։

ԲԴԽ նախկին նախագահ Ռուբեն Վարդազարյանի կարծիք է փոքր ինչ այլ է՝ ֆիլմը որևէ ազդակ չէր, այլ ընդամենը հերթական «PR ակցիա», քանի որ ԲԴԽ -ն մեծարելու գործընթաց է սկսվել և սա ընդամենը դրա մի մասն էր։ Ըստ Վարդազարյանի՝ ֆիլմը հետևանք չի ունենալու։ Հարցին՝ արդյո՞ք պաշտոնեական լիազորություններն անցնելու, արդարադատության իրականացմանը խոչընդոտելու հատկանիշներ առկա չեն, Վարդազարյանը պատասխանեց․ «Առաջին հայացքից՝ ոչ։ Ընդամենն ուսումնասիրություն է կատարված և դա յուրովի մեկնաբանություններով ներկայացված է հանրությանը։ Եթե այս ֆիլմը դիտարկենք որպես ընդամենը մեսիջ՝ մյուս դատավորներին, որոնք նմանատիպ գործեր են քննում, ապա պետք է այդ դատավորներն ահազանգեն, որ սա փորձ էր իրենց վրա ճնշում գործադրելու, բայց ես վստահ եմ, որ մյուս դատավորները չեն ունենալու համարձակություն և Ձեր կողմից նշվածը, որ սա միջամտություն է, անհեռանկար գործ է»։

Ինչ վերաբերում է հարցին, թե արդյոք Դատական դեպարտամենտն ունի լիազորություն՝ վիճակագրության տվյալները ներկայացնելիս դատավորների գործողություններին գնահատական տալու, այսպես ասած, «մեղավորության սլաքներ ուղղելու», Վարդազարյանը նկատեց՝ Դատական դեպարտամենտը նման իրավասություն չունի, ընդհանրապես ՀՀ-ում դատավորի գործունեությունը գնահատելու իրավունք ունի բացառապես ԲԴԽ-ն՝ հարուցված վարույթների նկատմամբ, բայց այս գործերի վերաբերյալ արդեն հնարավոր չէ հարուցել վարույթներ։

«Թե՛ ԱՆ-ն, թե՛ Դատավորների Էթիկայի հանձնաժողովը չեն կարող, որովհետև բնության մեջ այդպես չի լինում, որ ԲԴԽ-ն թերությունը նկատի, կոչ անի վարույթ հարուցելու իրավունք ունեցող մարմիններին հարուցելու վարույթ, հետո՝ քննի դրանք։ Դա հնարավոր չէ, նման բան չի կարող տեղի ունենալ։ Ես չեմ բացառում, որ կարող է լինի, բայց մեկ տոկոս եմ գնահատում հնարավորությունը, որովհետև դրա հեռանկարը, որ կունենա ցանկալի ավարտ, գրեթե մոտենում է զրոյին։ Դուք պատկերացրեք՝ ԵԴ-ն ինչ կանի, եթե հանկարծ նման վարույթներ լինեն և այդ վարույթներով կարգապահական պատասխանատվություն լինի։ Ինձ թվում է՝ բոլորի իրավագիտակցությունը կբավարարի, որ նման վարույթներ չնախաձեռնեն»,- ընդգծեց Ռուբեն Վարդազարյանը։

Դիտարկմանը, որ թեև ողջամիտ չէ վարույթ հարուցելը, բայց նախկինում արդեն ձևավորված պրակտիկան ցույց է տալիս, որ հենց ԲԴԽ-ի կողմից կոպտագույն խախտումներ են թույլ տրվել և ԲԴԽ-ն չէր կարող չկանխատեսել՝ հետագայում ՄԻԵԴ-ում այդ գործերի տապալումը, արդյո՞ք այս դեպքում դասեր կքաղեն՝ Վարդազարյանն ի հաստատումը նշեց, որ ութ դատավորի գործով ՄԻԵԴ-ն արագացված կարգով վարույթ է ընդունել բողոքները, ինչը նշանակում է, որ առնվազն ութ գործով որոշում է լինելու՝ ԲԴԽ-ի դեմ։

Իսկ թե արդյո՞ք տեսանյութը կարող է հիմք լինել Կ․ Անդրեասյանին պատասխանատվության ենթարկելու, ԴԴ ղեկավարի պաշտոնանկության հարցը բարձրացնելու համար՝ Վարդազարյանը նշում է՝ չի կարծում։ Նրա դիտարկմամբ՝ նման բան անելու համար համարձակություն է պետք ունենալ և ինքնուրույն կարծիք հայտնելու ցանկություն, ունակություն։ Մեր զրուցակիցը համոզված է՝ որևէ քայլ չի լինելու, որևէ մեկը պատասխանատվության չի ենթարկվելու։

Թե ի վերջո «PR ակցիան» Կարեն Անդրեասյանին ինչու՞ է պետք, ինչ է ցանկանում ապացուցել՝ Վարդազարյանը պատկերացում չունի, նշում է՝ իսկապես չի հասկանում ինչու էր պետք այս ֆիլմը, ինչու էր այս ամենն անհրաժեշտ, որովհետև այս նույն արդյունքին կարելի է հասնել, եթե նույն հետազոտությունը կատարվեր որևէ լրատվամիջոցի միջոցով։

«Դա կլիներ, երևի թե, ավելի արդյունավետ։ Իրականում, եթե ԲԴԽ-ն որոշել էր, այդ «մեղավոր» դատավորներին կարգապահական պատասխանատվության ենթարկեր, ապա վստահաբար պնդում եմ, որ գիտելիքներով, փորձով, իրավական կարգավորումներին շատ լավ ծանոթ լինելով՝ ԲԴԽ բոլոր անդամներն էլ պատկերացնում են, որ այս եղանակով հնարավոր չէ դատավորներին պատասխանատվության ենթարկել։ Այսինքն՝ նպատակը ոչ թե դատավորներին պատասխանատվության ենթարկելն էր, այլ՝ այն շոուն, որն ապահովվեց»,- ասաց մեր զրուցակիցը, ապա, եզրափակելով զրույցը, նշեց․ «Սպասենք նոր ֆիլմերի»։

Հեղինակ՝ Իզաբել Սահակյան

Աղբյուր` Փաստինֆո