Փաստ ինֆո

Սեպտեմբերի 19-ին Վիտալի Սարգսյանն իրենց գյուղի՝ Մարտունու շրջանի Կաղարծիի վերևի մասում գտնվող դիրքերում էր։ Մայրը՝ տիկին Լորան, լսել էր, որ շփման գծում իրավիճակը շատ է լարվել, զանգել է որդուն, որ իրենից ճշտի, բայց Վիտալին հանգստացրել է՝ ասել, որ ամեն ինչ նորմալ է։ Կարճ ժամանակ անց ադրբեջանական ահաբեկչական ուժերը հարձակում են սկսել ամբողջ ճակատով։

«Մեր գյուղը շրջափակել էին։ Չորս կողմում ադրբեջանական դրոշներ էին դրել, ժողովուրդն էլ գյուղում․․․ Սև համազգեստով աղջիկներ էլ կային դրանց մեջ (նկատի ունի ադրբեջանցիներին, խմբ․), երևի դիպուկահարներ էին։ Բլրի վրա՝ գյուղի գլխավերևով շրջան էին կազմել։ Էդտեղից գյուղը ոնց որ ափի մեջ լինի․․․ Հենց այդ մասում ու մոտակա անտառներում թեժ մարտեր են եղել»,-«Փաստինֆո»-ին պատմում է սեպտեմբերի 19-ին դիպուկահարի կրակոցից զոհված Վիտալիի մայրը։

Վիտալին աշխարհազորին միացել էր 2023թ․ սկզբին։ Մինչ այդ ՊԲ-ում որպես պայմանագրային էր ծառայում, բայց առողջական խնդիրների պատճառով դուրս էր եկել։

Կրկին ծառայության մտնելու մասին 2020թ․ պատերազմից հետո անընդհատ մտածում էր։ Ամեն անգամ, երբ մայրը խնդրում էր ամուսնանալ, ասում էր՝ ո՛չ կռիվն է թույլ տալիս, ո՛չ էլ իրավիճակը․ ո՞նց ամուսնանամ․․․
Ու հավերժ 28-ում էլ մնաց Վիտալին․ 29-ը չհասցրեց բոլորել։

Նրա զոհվելու մասին մայրը երկու օր անց՝ սեպտեմբերի 21-ին է իմացել, երբ արդեն Վիտալիին շտապ օգնության մեքենայով տարել էին Ստեփանակերտ։

«Չկարողացա անգամ որդուս հուղարկավորությանը ներկա լինել․․․ Գյուղը շրջափակված էր, Ստեփանակերտի ճանապարհ էլ փակ․․․ Աղջկաս ու քրոջս ընտանիքներն են կազմակերպել հուղարկավորությունը․․․ Լույս չկար, դիահերձարաններում տեղ էլ չկար․․․ Ասել էին՝ եկեք տարեք դիակը, հետո չեք գտնելու էնքան շատ են․․․»,-արցունքները կուլ տալով՝ ասում է տիկին Լորան։

Սեպտեմբերի 23-ին Վիտալիին հուղարկավորում են Եղբայրական գերեզմանոցում։ 25-ին մայրն ու տատիկը հասնում են Ստեփանակերտ, որտեղ մի քանի օր համագյուղացիների հետ մնում են 2-րդ դպրոցի նկուղում։ Ամսի 28-ի գիշերը Սարգսյանները, հայացքները հետ, հարկադրաբար բռնում են գաղթի ճանապարհը․․․

Տիկին Լորան ամեն օր սպասում է, որ պիտի գնան որդու մարմինը բերելու։ Երկու անգամ պատրաստվել էին, որ գնան, բայց չի ստացվել․ Ադրբեջանը թույլ չի տվել, որ անգամ զոհերի մարմինները տեղափոխեն․․․

Աղբյուր` Փաստինֆո