Փաստ ինֆո

ՀՀ-ն իր գործունեության ընթացքում բարձր արժեքներ է ձեռք բերել՝ իր անկախությունը, ինքնիշխանությունը, բանակը։ Գործունեության ընթացքում ունեցել է նաև թերություններ, ոչ ոք չի ասում, որ նախկինում թերություններ չեն եղել։ Ընդ որում՝ ես իմ վրա եմ վերցնում, չկար որևէ գերատեսչություն, որտեղ թերություն չի եղել, բայց անընդհատ պայքար է եղել այդ թերությունները վերացնելու ուղղությամբ՝ բոլոր ոլորտներով։ Յուրաքանչյուր քաղաքական ուժի խնդիրն է՝ անցյալի դրական հենքի վրա կառուցել իր ապագան։ Ցավոք, այսօրվա իշխանություններն անըդհատ փորձում են խոսել անցյալի թերությունների մասին՝ առաջ չնայելով և եզրակացություն չանելով, որ անցյալի թերությունների զգալի մասը կրկնվում է այսօրվա իշխանությունների ժամանակ՝ նույն պատճառներով, դեռ՝ ավելացված։ Այս մասին խորհրդարանական ճեպազրույցների ընթացքում ասել է «Հայաստան» խմբակցության պատգամավոր Սեյրան Օհանյանը։

«Ինչ վերաբերում է բանակին, ապա կամավորական ջոկատներից պայքարի ընթացքում ՀՀ այնպիսի դժվարագույն պայմաններ, ինչպիսին պատերազմն է, շրջափակումն է, երկրաշարժն է՝ իշխանությունները, մտավորականները կարողացել են ստեղծել կանոնավոր բանակ, որն իր զարգացումն ապահովել է՝ իր պատրաստությամբ, անընդհատ սպառազինմամբ՝ զուգահեռ իրականացնելով մարտական հերթապահություն, որի ընթացքում մենք միշտ եղել ենք պարտադրողի դերում, կանխարգելել ցանկացած գործողություն՝ հակառակորդի կողմից, հենք ենք հանդիսացել, որ ՀՀ իշխանությունները բանակցային գործընացում կարողանան խոսել հաստատուն դիրքերից»,- ասաց Օհանյանը՝ հավելելով, որ ՀՀ ԶՈՒ-երի պատրաստությունը երևացել է և զորավարժություններով ՀՀ-ում, և միջազգային հարթակներում զորավարժություններով, և զորահանդեսների ժամանակ։

Սեյրան Օհանյանը վստահեցրեց, որ ՀՀ ԶՈՒ-երը ի վիճակի են եղել 44-օրյա պատերազմի ընթացքում իրենց առջև դրված խնդիրը կատարելու։ Նրան խոսքով՝ այն խաթարվել է մի քանի անարդյունավետ գործողությունների ընթացքում՝ կադրային քաղաքականության մեջ, կազմակերպչական հարցերում, կարգապահական և բանակի վերաբերող քաղաքականությունը կենցաղային հենքի վերածելու պատճառով։

«Եթե այսօր ինչ-որ բան արվում է բանակում, ինչն ակնհայտորեն արվում է, հատկապես՝ պաշտպանական բնագծերի ամրապնդման, բայց արվում է ուշացումով։ Դա պետք է արվեր մինչև 2020թ պատերազմը և պատերազմից հետո՝ 2021- 2022թթ, մինչդեռ նրանց գործողությունների հաջորդականությունը բերել է նրան, որ նրանք անընդհատ գնացել են զիջումների և պարտվողական դիրքում են եղել։ Ոչ ոք չի ուրախանում այն ամենից, ինչ տեղի է ունեցել 2020թ․, բայց ընդդիմության ղեկավարման ժամանակ Հայաստանն ու Արցախը միասնական անվտանգային համակարգ են եղել, Արցախն անկախ է եղել, ՀՀ սահմաններում չեն եղել ադրբեջանական զորքեր»,- նշեց Օհանյանը։

Աղբյուր` Փաստինֆո