Փաստ ինֆո

Նոր սերունդը, ըստ իս, մի քանի հանգրվաններ պիտի անցնի։ Առաջինը ինքնաճանաչումն է, երկրորդը՝ ինքնահարգանքը։ Եվ ապա՝ հզոր պետականության կրող դառնալը, սկզբում այդ գաղափարը կրողը, ապա՝ պետականության։

Միայն պետականության գաղափարն ունենալով հզոր հայրենիք կունենանք, մինչդեռ այսօր դաստիարակում ենք սպասարկու ազգ։ Ազգ, որը հարմարվում է օտար կրթություններին, օտար մարտահրավերներին, փոխհամաձայնություններին և այլն։ Հարմարվող ազգը չի կարող ապագա ունենալ։ Չի կարող պետականություն ունենալ։

***
Մայիսի 28-ը մեր պետականության համար բացառիկ կարևոր երևույթ է, սեպտեմբերի 21-ն ընդամենը նրա շարունակությունն է, անկախությունը վերագտնելու մի քայլը։ Իսկ անկախություն արդեն կերտել էինք վեց դար տևած խավարից հետո՝ 1918 թվականին։
Մայիսի 28-ը նաև մայիսի 9-ի՝Շուշիի ազատագրման ոգեշնչման աղբյուր է եղել, և ընդհանրապես, անկախության վերականգնման ոգեշնչման աղբյուր։ Եթե ցեղասպանությունից հետո Մայիս 28-ը չլիներ, գուցե վաղուց ուծացած լինեինք, որովհետև շատերի մեջ ցեղասպանվածի բարդույթից փախչելու ցանկություն կար և դրա համար շատերը օտարացան։
Մեծ մասը եթե հայ մնաց, մնաց հենց այն հպարտության շնորհիվ, որ ինքը ո՛չ միայն ցեղասպանված, այլև ՊԵՏԱԿԱՆՈՒԹՅՈՒՆ կերտած ազգի մի մասնիկն է։

***
Նժդեհն ասում էր՝ չի կարող ասպետ չլինել նա, ով մերկացրած սրի հեռավորության վրա է տեսել թշնամուն։ Ես կողմնակից եմ Նժդեհի տեսակետին, որը թուրքերին ներելու հարցում ասում էր՝ «Ներել թուրքին, այո, բայց՝ հաղթելուց հետո, քանզի թույլի ներումը քծնանք է»։
***
Ռազմապարերը զինվոր կերտելու, ձևավորելու ճանապարհին լուրջ գործոն են։ Պատմությամբ էլ արձանագրված է՝ հայ զինվորի պատրաստականության լավագույն միջոցներից մեկը ռազմապարն է։ Այն և՛ ոգի է բարձրացնում, և՛ ճարպկություն ու ֆիզիկական պատրաստվածություն հզորացնում, պարեր էլ կան, որ նույնիսկ զենքը օգտագործելու հմտություն են տալիս․․․

***
Պարը նախևառաջ հոգեբանություն է։ Այն շատ խորը հոգևոր, ոգեղեն երևույթ է և, ըստ Կոմիտասի՝ միակ արվեստն է, որ ներդաշնակում է հոգին ու մարմինը, գիտակցականն ու ենթագիտակցականը։
Նրա կարծիքով՝ սերունդ դաստիարակելու լավագույն միջոցը հենց պարն է, որը և որոշում է յուրաքանչյուր ազգի քաղաքակրթության աստիճանը։

Աշխարհը ինչ ռիթմերի մեջ ուզում է լինի, մենք պիտի լուրջ ուշադրություն դարձնենք այն ամենին, ինչն ազգային տեսակ է կերտում։ Ազգային տեսակ։

Ա․Ե․

Աղբյուր` Փաստինֆո