Փաստ ինֆո

Միջուկային անվտանգության կարգավորման կոմիտեի միջուկային և ճառագայթային վարչությունների տեխնիկական բաժնի համապատասխան որակավորում ունեցող մասնագետներին կտրվի քաղաքացիական աշխատողի աստիճան և կսահմանվի հավելավճար։ Համապատասխան որոշումն ընդունվեց Կառավարության այսօրվա նիստում։

Կոմիտեի առաջնային խնդիրը, ինչպես նախագիծը ներկայացնելիս նշեց Միջուկային անվտանգության կարգավորման կոմիտեի նախագահի տեղակալ Խաչատուր Խաչիկյանը, մասնագետների պակասն է, առկա սակավ մասնագետների որոշակի շրջանակի համապատասխան որակավորման բացակայությունը։

Ինչպես նշված է նախագծի հիմնավորման մեջ, 2019 թվականից մինչ օրս, սեփական դիմումի համաձայն և ՀՀ քաղաքացիական ծառայության օրենսդրությամբ սահմանված կարգով պայմանավորված, Կոմիտեից դուրս են եկել համապատասխան որակավորում ունեցող 9 մասնագետներ՝ ոլորտում գործունեություն իրականացնող կազմակերպություններում (այդ թվում միջազգային և օտարերկրյա) բարձր աշխատավարձով աշխատանքի անցնելու պատճառով։ Միայն 2023 թվականի ընթացքում Կոմիտեից հեռացել են 3 մասնագետներ։

«Կոմիտեի կողմից 2021-2023 թթ.-ին քաղաքացիական ծառայության թափուր հաստիքները համալրելու նպատակով հայտարարվել է 55 մրցույթ, որից 21-ը ընդհանրապես չի կայացել՝ հայտերի բացակայության կամ չբավարարման պատճառով, իսկ 34 մրցույթի մասնակցել է 21 հոգի»,-նշեց Խաչիկյանը։

Բացի այդ, մասնագիտական կազմի միջին տարիքը Կոմիտեում 54 է, ինչը նշանակում է, որ առաջիկա 5-10 տարիներում շարունակվելու է կադրերի բնական արտահոսքը։

Փաշինյանը կադրերի խնդիրը լուծելու համար որոշման ընդունումը ուշացած, բայց առաջնահերթ համարեց։

«Սա շատ կարևոր է անել, որովհետև մենք խնդիր ենք դրել նոր ատոմակայան կառուցելու։ Վաղը բախվելու ենք մի իրավիճակի, որ փողը կա, ամեն ինչը կա, բայց չենք ունենալու մասնագետներ։Ժամկետային զինվորական ծառայությունից կրթության պատճառով տարկետման իրավուքները և քվոտաները տալիս հատուկ նշանակություն պետք է դարձնենք միջոկային էներգիայի ոլորտին։ Մենք մեգանախագիծ ունենք իրականցելու և դրա մաս է նաև մասնագետների պատրաստումը»,-նշեց Փաշինյանը։

Անդրադառնալով կառուցվելիք ատոմակայանի տիպի ու հզորության շուրջ ընթացող քննարկումներին՝ Փաշինյանը նաև հաղորդեց, որոշում կայացնելիս պետք է նկատի ունենալ այն, որ մոդուլային ռեակտորի դեպքում վթար եթե լինում է, ապա դա համարվում է լոկալ միջադեպ, այսինքն՝ շրջակա բնակավայրերի բնակչոթւյանը տարհանելու կարիք չի լինում։

ՏԿԵ նախարար Սանոսյանն էլ նկատեց, որ կարևոր է նաև մեզ անհրաժեշտ հզորության չափը հաշվի առնելը, քանի որ ատոմակայանը իորք մեգանախագիծ է ու ահագին գումար է ծախսվելու այն կառուցելու համար։

Աղբյուր` Փաստինֆո