Փաստ ինֆո

Տեղի է ունենում արշավ Հայաստանի Հանրապետության դեմ, որովհետև երբ առաջարկվում է «Հայոց պատմություն» առարկան վերանվանել «Հայաստանի պատմություն», դրա դեմ արշավ է գնում ու այդ արշավը ուղղորդվում է այն ուժերի կողմից, որոնք պայքարում են ՀՀ-ի՝ որպես ինքնիշխան պետության դեմ։ Այս մասին ԱԺ-ում լրագրողների հետ զրույցում ասաց ՔՊ-ական պատգամավոր Վահագն Ալեքսանյանը։

«Հայաստանի պատմությունը հայոց պատմության մեջ գերակա չէ, հայոց պատմության մեջ գերակա է հայերի մասին պատմությունը, իսկ երբ ասում ենք «Հայաստանի պատմություն»՝ այդտեղ գերակա է ՀՀ-ն, Հայաստանի պետականությունը , Հայաստանի միապետությունները, որոնք մենք ունեցել ենք»։

Անդրադառնալով Սահմանադրության փոփոխությանը՝ նա նշեց, որ այնտեղ կետեր կան, որոնց մասին իրենք խոսում են, այդ թվում՝ Անկախության հռչակագրին հղումը։ «Սրա մասին մենք բաց խոսում ենք մեր հանրության հետ, որքան էլ կոնկրետ երկրից ղեկավարվող մանիպուլիացիաները շատ են։ ՀՀ-ն պետք է ունենա Սահմանադրություն, որը ծառայում է Հայաստանի ժողովրդին, ոչ թե գրված է ինչ-որ մի կայսրության թելադրմամբ, որպեսզի այդ կայսրության փլուզման պայմաններում ականներ դրվի ՀՀ-ի տակ՝ այնպես, որ երբ այդ կայսրությունը որոշի վերամիավորվել՝ այդ ականները աշխատեն։

Ես կարծում եմ, որ այդ ականները ներդրված են։ Օրինակ, Սահմանադրության մեջ գրված է, որ ՀՀ-ն պետք է իրականացնի հայ ժողովրդի իղձերը, սա լավ է հնչում, բայց որևէ մեկը կարո՞ղ է բացատրել, թե ինչպե՞ս պետք է Սահմանադրությունը բացարարի և ռուսաստանահայության, և ամերիկահայության իղձերը, եթե այդ երկրները գտնվում են սառը պատերազմի մեջ և ամեն մեկը մյուսի կործանումն է ուզում։ Արդյո՞ք, այնտեղ գրված է Հայաստանի հետ կապված իղձեր, եթե անգամ գրված լինել Հայաստանի Հանրապետության հետ կապված իղձեր՝ Հայաստանի Հանրապետության գերնպատակը մի՞թե չպետք է լինի Հայաստանի Հանրապետության քաղաքացիների իղձերի կատարումը»,- նշել է պատգամավորը։

Աղբյուր` Փաստինֆո