Փաստ ինֆո

ՊԲ նախկին հրամանատար Ջալալ Հարությունյանի գործը 2023թ․ նոյեմբերի 23-ից գտնվում է Սյունիքի մարզի ընդհանուր իրավասության դատարանի վարույթում, սակայն առ այս պահը դատական նիստերը չեն կայացել, դրանք հետաձգվում են՝ տարբեր պատճառներով։ Նախորդ դատական նիստը, ինչպես «Փաստինֆո»-ի հետ զրույցում հայտնեց տուժողների իրավահաջորդների ներկայացուցիչ Լիպարիտ Սիմոնյանը, հետաձգվել էր՝ ճանապարհների անանցանելի լինելու պատճառով։

Դատարանում, ի թիվս նախնական դատալսումների փուլում քննարկման ենթակա այլ հարցերի, դեռևս քննարկման առարկա չի դարձվել նաև ընդդատության փոփոխության և գործը Գորիսից Երևան տեղափոխելու հարցը։ Նման միջնորդությամբ, օրենքի կարգավորումների համաձայն, պետք է հանդես գա պաշտպանության կողմը, և եթե նման միջնորդություն ներկայացվի, ապա դրան կմիանա նաև տուժող կողմը, քանի որ տուժողները հիմնականում բնակվում են կա՛մ Երևանում, կա՛մ Երևանին հարակից բնակավայրերում։

Ինչպես արդեն տեղեկացրել ենք՝ ՊԲ նախկին հրամանատար Ջալալ Հարությունյանի գործով դրվագներից մեկով՝ 2020թ․ հոկտեմբերի 7-ի հակահարվածի վերաբերյալ, դեռևս նախաքննության ընթացքում քրեական հետապնդումը դադարեցվել է, իսկ մյուս դրվագով, որը վերաբերում է «Ցորի» զորամասի՝ Դ20 դիվիզիոնի, վրա հոկտեմբերի 12-ին հարձակմանը, ուղարկվել է դատարան։ Ըստ մեղադրանքի՝ նա, զբաղեցնելով ՊԲ հրամանատարի պաշտոնը, կոչումով՝ գեներալ-լեյտենանտ, հանդիսանալով պաշտոնատար անձ՝ հանրային ծառայող, կոչման և պաշտոնի բերումով հանդիսանալով հրամանատար՝ ծառայողական դիրքով և զինվորական կոչումով, տվյալ իրավահարաբերության շրջանակում ունենալով իր լիազորություններից բխող հրամաններ և կարգադրություններ տալու ու դրանց կատարումն ապահովելու իրավասություն, հայտարարված ռազմական դրության ժամանակ՝ 2020թ. հոկտեմբերի 12-ին, ծառայության նկատմամբ դրսևորել է անփույթ վերաբերմունք, իր ծառայողական պարտականությունների կատարման նկատմամբ անբարեխիղճ և անփույթ վերաբերմունքի հետևանքով դրանք կատարել է ոչ պատշաճ, ինչն անզգուշությամբ առաջացրել է ծանր հետևանքներ։ Մասնավորապես, ըստ քրեական գործի, Դ20 դիվիզիոնի վրա հակառակորդի հարձակման ժամանակ դիվիզիոնի հրամանատարությունը կապնվում է Ջալալ Հարությունյանի՝ տեղակալ, հրետանու գծով պետ Գենադի Բաղդասարյանին, հայտնում հակառակորդի հարձակման մասին, սակայն Ջալալ Հարությունյանը, ըստ գործի, հայտնել է, թե մոտեցողները յուրայիններ են։

Նկատենք, որ խոսքը գնում է Արցախի հանրապետության տարածքում կատարված ենթադրյալ գործողությունների մասին, մինչդեռ Արցախի տարածքը, ըստ Փաշինյանի, Հայաստանի Հանրապետություն չէ, այլ Ադրբեջան, հետեւապես հարց է առաջանում, թե արդյո՞ք ՀՀ դատարաններում կարող է քննվել այս գործը, թե՝ ոչ։ Տուժողների ներկայացուցիչ Լիպարիտ Սիմոնյանը, սակայն, գտնում է, որ սա Ջալալ Հարությունյանի նկատմամբ քրեական հետապնդման դադարեցման հիմք լինել չի կարող։

«Նշված ժամանակահատվածում Արցախը եղել է ՀՀ իրավազորության ներքո, ՄԻԵԴ-ը նաև այդ հարցի վերաբերյալ գործեր ունի, հետևապես Արցախի հետ կապված դեպքերը, քրեորեն պատժելի արարքները, առավել ևս, որ դրանք կատարվել են ՀՀ քաղաքացի հանդիսացող զինծառայողների հանդեպ, պետք է քննվեն ՀՀ դատական ատյաններում: Բացի այդ , Ջալալ Հարությունյանը ևս հանդիսացել է ՀՀ քաղաքացի»,- «Փաստինֆո»-ի հետ զրույցում նշեց Սիմոնյանը։

Հեղինակ՝ Իզաբել Սահակյան

Աղբյուր` Փաստինֆո