Փաստ ինֆո

«Փաստինֆո»-ն ահազանգ է ստացել Շահումյան գյուղի բնակիչ Միլազմ Ավդոյանից առ այն, որ Արմավիրի դատախազությունը և Քննչական կոմիտեի մարզային վարչությունը կոծկում են խոշոր չափի խարդախության գործը։ Այս մասին ահազանգում է խաբեության զոհ դարձած բնակիչը։

Ավդոյանը պատմեց, որ 2021 թվականի հոկտեմբերին ինքը 30 միլիոն դրամ ընդհանուր արժողությամբ 200 գլուխ խոշոր եղջերավոր անասուն է տվել Իրանի քաղաքացի ազգությամբ թուրք Ղասեմ Աբդուլահ Նեժադին։

«Պայմանավորվել էինք, որ ինքը մնալու է Հայաստանում, մինչև անասունները անցնեն Մեղրիի մաքսակետը, որից հետո ինքը պետք է վճարեր։ Անասունները 4 մեքենա բարձեց ու ուղարկեց, հետո զանգեց՝ ասեց է անասունի վրա ինչ-որ լվիճներ կան, պիտի հասնի մաքսակետ, որ կարողանա անասունն անցկացնել։ Հետո էլի զանգեց, ասաց՝ որդին Իրանում վթարի է ենթարկվել ու հիմա կենդանին մնում է մաքսակետում, իսկ ինքը գնում է Իրան։ Նա խաբում էր, կենդանին արդեն անցկացրել էր ու ինքն էլ գնացել»,- նշեց մեր զրուցակիցը։

Ֆերմերը պատմեց, որ 2022 թվականի ապրիլին ինքը դիմել է Արմավիրի ոստիկանություն, որի արդյունքում Իրանի քաղաքացուն բերման են ենթարկել Հայաստան, խափանման միջոց է ընտրվել չհեռանալու մասին ստորագրությունը։

«Գործը երկու տարի քննում էին։ Այդ ընթացքում պարզել էին, որ առքուվաճառքի պայմանագրի տակ նա կեղծել էր իմ ստորագրությունը, փորձաքննությունը հաստատել էր նաև, որ կեղծ փաստաթղթերով է արտահանել կոնդանիներին։ Բայց այս ամենի վրա քննինչ ու դատախազը աչք են փակում։

Երկու տարի գործը քննելուց հետո մեկ շաբաթ առաջ գործը պետք է ուղարկեին դատարան, բայց էջմիածնի քննչականի պետի տեղակալը զանգեց, կանչեց ու ասաց՝ գիտես Արմավիրի մարզի դատախազը գործը փակել է։

Թե ինչ հիմնավորմամբ, ինչ պատճառաբանությամբ է դատախազությունը գործը հօգուտ իրեն հարցը լուծել չգիտեմ։ Հիմա նրա հետապնդումը դադարեցրել են, որ կարողանա Հայաստանից գնալ»։

Ավդոյանը կարծում է, որ այստեղ կոռուպցիա կա։ «Եթե կաշառք չեն վերցրել, ինչի՞ են էդ թուրքի օգտին որոշում կայացրել ու գործը փակել, բոլոր ապացույցները կան, որ խարդախություն է արել, իմ ստորագրությունը կեղծել է, կենդանիներին էլ կեղծ փաստաթղթերով է հանել, բայց այս բոլոր ապացույցները հաշվի չեն առել»։

«Փաստինֆոն» դիմեց ՀՀ գլխավոր դատախազություն՝ պարզելու, թե ինչ հիմքով է գործը կարճվել, դատախազությունից, որտեղից գրավոր հարցում պահանջեցին։Հետեւաբար դատախազության փաստարկները կներկայացնենք դրանք ստանալու դեպքում։

Աղբյուր` Փաստինֆո