Փաստ ինֆո

Անընդհատ խոսում եք Ալմաթիի հռչակագրի վավերացման ժամանակ արված վերապահումների մասին, միջազգային և տեղական օրենսդրության ժամանակ, երբ մի երկիր վերապահում է անում, ապա, Վիեննայի կոնվենցիայի համաձայն, պետք է ծանուցի Ավանդապահին, բայց շատ վաղուցվանից հետազոտում ենք այդ հարցը և արձանագրում, որ ՀՀ-ն այդ մասին Ավանդապահին չի ծանուցել։ Այս մասին կառավարության հետ հարուպատասխանի ընթացքում ասաց Նիկոլ Փաշինյանն՝ անդրադառնալով «Հայաստան» խմբակցության պատգամավոր Արծվիկ Մինասյանի դիտարկմանը, որ Փաշինյանի իրավախորհրդատուները պատշաճ լինելու դեպքում կասեին, որ չի կարող որևէ միջազգային պայմանագիր անցնել օրինական վավերացման ընթացք, եթե հակասում է ՀՀ սահմանադրությանը։

Փաշինյանն ընդգծեց, որ միջազգային իրավահարաբերությւնների տեսակետից՝ այդ վերապահումները որևէ իրավական ուժ չունեն։ «Սա այլևս փաստ է, մենք սա պարբերաբար ստուգել ենք։ Հետևաբար, 1991 թ-ի Ալմաթիի հռչակագիրը հստակ և աներկբա այդ վավերացման և չծանուցման փաստով հստակ արձանագրել է, թե որն է ՀՀ տարածքային ամբողջականությունը»,- նշել է նա։

Արծվիկ Մինասյանն արձագանքեց, որ 1993 թ-ի սեպտեմբերին Ադրբեջանը տրված վավերագրերի համաձայն՝ անդամակցել է ԱՊՀ-ին, համաձայն արձանագրության 2-րդ կետի 2-րդ մասի՝ երկրի համար առկա սահմանը ուժի մեջ է մտնում իր պաշտոնական անդամակցության պահից։ «Այսինքն, Հայաստան- Ադրբեջան սահմանագիծը, եթե դիտարկում ենք Ալմաթիի հռչակագրի հենքի վրա արձանագրությամբ՝ 1993 թ-ի սեպտեմբերի դրությամբ ինչ առկա սահման է եղել, ինչ շփման գիծ է եղել՝ սահմանագիծը սա է։ Բայց Դուք այլ բան եք ասում, դուք վերապահմանն եք անդրադառնում։ Ռեետրում, այո, չկա վերապահումը։ Դուք ՀՀ-ն ներկայացնող պաշտոնատար անձն եք, դուք պետք է պարզեք, թե ինչու չի հասել այնտեղ, ովքեր են դրա համար մեղավոր եղել։ Բայց դա չի վերացնում այն վերապահումը, որ արել է ՀՀ խորհրդարանը։ Միջոցներ ձեռնարկեք, որպեսզի Ավանդապահին և կողմերին տեղ հասնի այն։ Ավելին առաջին նախագահ Լևոն Տեր-Պետրոսյանը իր հարցազրույցում անդրադարձել է նաև այդ հարցերին»։

Փաշինյանն էլ արձագանքեց. «Եթե այդպես է, ապա 2010 թ-ին կողմ չքվեարկեիք ՀՀ վարչատարածքային բաժանման մասին օրենքին, որտեղ ասում էիք, որ Սոթքից այն կողմ Ադրբեջան է։

Եթե այդպես է, ինչո՞ւ էր Սերժ Սարգսյանն ասում, որ Աղդամը մեր հայրենիքը չէ, եթե այդպես էր, ինչու էր ողջ բանակցային գործընթացի փաստաթղթերը սկսում այն նախադասությամբ, որ «Բանակցային գործընթացի նպատակն է Ադրբեջանի 7 շրջանները վերադարձնելը, ինչու էր այդպես»։

Աղբյուր` Փաստինֆո