Փաստ ինֆո

ԱԺ-ում քննարկվում է ԲԴԽ անդամի ընտրության հարցը։ Միակ թեկնածուն Կարեն Թումանյանն է, որին ԱԺ-ում ներկայացրեց Արփի Դավոյանը։ ԱԺ պատգամավոր Ագնեսա Խամոյանը, հարց ուղղելով Թումանյանին, անդրադարձավ Թումանյանի՝ զինվորական ծառայությունից ազատվելու վերաբերյալ հրապարակումներին։ Մասնավորապես, մամուլում տեղեկություններ են շրջանառվել, որ Կարեն Թումանյանը 1994թ ազատվել է զինվորական ծառայությունից՝ ընտանեկան դրությամբ պայմանավորված, այսինքն՝ հիմք է ընդունվել նրա ամուսնացած լինելը և երկու երեխա ունենալը, սակայն ինքը՝ Թումանյանը, լրատվամիջոցներին հայտնել էր, որ կյանքում 1 անգամ է ամուսնացել՝ 2012 թվականին, այսինքն՝ 36 տարեկանում։

« Հարց է առաջանում, թե այդ դեպքում ինչպես է 1994թ.-ին 18-ը բոլորած Թումանյանը ազատվել պարտադիր զինծառայությունից, եթե 36 տարեկանում է ամուսնացել եւ ակնհայտորեն ունի փոքր կին եւ երեխաներ: Լուրեր կան, որ նա արդեն 2 երեխա ունեցող մի կնոջ հետ է ամուսնացել, որից հետո բաժանվել է, ապա այդ կնոջ հետ է ամուսնացել նրա հայրը: Թումանյանը հերքեց այդ տեղեկությունը՝ ասելով, որ մեկ անգամ է ամուսնացել»,- գրել էր մամուլը։

ԱԺ-ում պատգամավոր Ագնեսա Խամոյանի հարցին ի պատասխան Թումանյանն ասաց, որ այդ հրապարակումներից հետո ԿԿՀ-ն ուսումնասիրություն է կատարել և իր բարեվարքության վերաբերյալ դրական եզրակացություն տվել։
Ագնեսա Խամոյանը, սակայն, պնդեց հարցը՝ հետաքրքրվելով, թե քանի տարեկան են երեխաները, ինչպես է ստացվում, որ նա ամուսնացել է 2012թ․, բայց 1994թ․ երկու և ավել երեխա ունենալու հիմքով ազատվել ծառայությունից։
«Դուք խոսում էիք բարեվարքությունից, պատրչաստվում եք դառնալ ԲԴԽ անդամ, Ձեզ առաջադրել է ՔՊ-ն, ով ամեն առիթով խոսում է բանակից խուսափածների մասին։ Ակնհայտորեն այստեղ խնդիրներ կան և Ձեր պատասխանը փաստեց դրա մասին։ Դուք ինչպե՞ս եք հսկելու դատավորների բարեվարքությունը, երբ ակնհայտորեն 1994թ․ խուսափել եք զինվորական ծառայությունից՝ շատ ակնհայտ հանգամանքներով պայմանավորված»,- ասաց Խամոյանը, ինչին ի պատասխան Թումանյանն արձագանքեց․ «Գուցե Ձեզ համար նորմալ է՝ ԱԺ-ում միմյանց որևէ բառեր ասելը և դրա հետևանքներ չունենալը, բայց խնդրում եմ նկատի ունենաք, որ հարցեր տալիս եք իրավաբանի, զգույշ եղեք։ Ավելացնելու բան չունեմ»։

ԱԺ նախագահ Ալեն Սիմոնյանին էլ «դուր չեկավ» ԲԴԽ անդամի թեկնածուի այս դիտարկումը, արձագանքեց՝ նշելով․ «Ներողություն եմ խնդրում, ինչ է նշանակում՝ սովոր եք իրար բաներ ասել և հետևանք չունենալ։ Ինչ նկատի ունեք, ուզում եմ հասկանալ՝ որպես ԱԺ նախագահ»։

Թումանյանը, փորձելով պատասխանել, դիմեց Սիմոնյանին՝ ասելով․ «Հարգելի նախագահող», ինչը ևս դուր չեկավ։
«Ես նախագահողը չեմ, հարգելի իրավաբան, ես նախագահն եմ։ Շարունակեք։ Ասեք, լսում եմ Ձեզ, ինչ է նշանակում՝ սովոր եք իրար բաներ ասել ու հետևանքներ չլինի, այսինքն՝ պետք է ծեծենք իրար, ռազբորկա անենք»,- ասաց Սիմոնյանը, ինչին պատասխանելով Թումանյանը պարզաբանեց, որ նկատի ունի, որ բառերը, որոնք արտահայտվում է, կարող է լինել քրեորեն հետապնդել արարքի որոշակի մաս, օրինակ՝ «խուսափել պարտադիր զինվորական ծառայությունից», ինքը չի խուսափել։

Աղբյուր` Փաստինֆո