Փաստ ինֆո

Օրերս տեղեկացանք, որ հեռահաղորդակցության ոլորտի «ՄՏՍ-Հայաստան» ընկերությունը վաճառվում է և դրա բաժնետոմսերի 20 տոկոսը անհատույց փոխանցվելու է կառավարությանը։ Այս մասին ԱԺ-ում կառավարության հետ հարցուպատասխանի ժամանակ ասաց «Հայաստան» խմբակցության պատգամավոր Թադրևս Ավետիսյանը։

Նա ընդգծեց, որ առաջին անգամ նման գործարքի ականատեսը եղանք 2021 թ-ին, երբ ընկերության բաժնետոմսերի վաճառքին զուգահեռ կառավարաությանը փոխանցվեց ԶՊՄԿ 15 տոկոսը և կառավարությունը դարձավ համասեփականատեր։ «Հաջորդը՝ Ամուլսարի հանքավայրի շահագործումն է, բնապահպանական խնդիրները չգիտես ոնց անտեսելով, կառավարությունն անհատույց ստացավ «Լիդիան Արմենիայի» բաժնետոմսերի 12 տոկոսը։ Պետության հետ համատեղ բիզնեսի ձախողված օրինակ է «Ֆլայ Առնա» ավիաընկերության հիմնումը, որը հիմնադրվելուց 1 տարի անց արդեն սնանկանում է։ Պարզ ասած ՝պետությունը լավ չի կառավարում ու տանում է սնանկացման»,- նշեց Ավետիսյանը եւ հարցրեց, թե ո՞րն է գաղտնի պայմանավորվածություններով նման շքեղ նվիրատվությունների իրական շարժառիթը։ «Պետությունը գաղտնի ի՞նչ պարտավորություններ է ստանձնել այս գործարքներով, որ հանրությունը չգիտի, արդյոք սրանով բիզնեսում անօրինական փայ մտնել չի՝ հարկային տեռորի գործադրմամբ՝ հարկային կամ այլ պարտավորություններն ու խախտումները զիջելու ու չպատժվելու դիմաց, պոտենցիալ ներդրողների տեսանկյունից գնահատե՞լ եք այն ռիսկերը, որոնք անխուսափելիորեն առաջ են գալիս գործող բիզնեսներից փայ խլելու առումով»։

Վարչապետ Նիկոլ Փաշինյանը նշեց, որ մի ժամանակ անհատույց պետության գույքն էր տրվում, իսկ հիմա անհատույց պետությանն է տրվում և տրվում է ոչ թե համատարած և բոլոր դեպքերում, այլ այն դեպքում, երբ այդ պրոյեկտները իրենց հիմքում պատմականորեն լեգիտիմության խնդիր ունեն։

«Դուք մոռացե՞լ եք, թե ոնց և ում է սեփականաշնորհվել հենց ԶՊՄԿ-ն։ Հենց այս կոմբինատրի անունը տալիս ենք՝ ձեր շարքերից մարդիկ են պակասում։

Պարոն Ավետիսյան, ասում եք՝ փայ մտնել... խելագար տրամաբանություն է, բա, հո հորեղբորս տղան չի մտել, էն օֆշորում, ինչ որ մեկի անունով ու անհայտ հասցեով։ «Գոլդեն Փելեսը» հիշո՞ւմ եք, չէ, երբ դահլիճից ինչ -որ մեկը գանցել էր բացմանն, ասում էր՝ օտարերկրյա հերթական խոշոր ներդրումն է, պարզվեց՝ ինքն է ներդնողը։

Ամուլսարի հետ կապված՝ այստեղ դիլեմայի առաջ ենք կանգնած. մի կողմից հանրային լեգիտիմության խնդիր կա, մյուս կողմից կան ներդրումներ, ո՞նց դուրս գալ փակուղուց։ Հիմա 7 մլն դոլար հարակից համայնքները գումար են ստանալու։ Ընդ որում՝ կառավարությունը չի այդ 12.5 տոկոսի տերը, դրա տերը հայ ժողովուրդն է։

Երբ ասում եք՝ փայ մտնել, ոչ մեկը իր ունեցած սեփականությունից չի զրկվել։ Եկել է նոր սեփականատեր, որը հասկանալով լեգիտիմության հետ խնդիրները՝ ասել է, որ չի ուզում ներքին բախում ունենալ, ու այդ ընկերությունների վատ պատմության բեռը կիսել։ Մեզ ասել է, որ ուզում են, որ կառավարությունը իրենց կողքը կանգնի, որ մարդիկ տեսնեն, որ ինքը երկրից տանող չէ բերող է։
ՀՀ կառավարությունը որևէ ոլորտում որևէ գաղտնի պայմանավորվածություն չունի»,- նշել է նա։

Աղբյուր` Փաստինֆո