Փաստ ինֆո

Պեմզաշենում մոր և երկու երեխայի առանձնապես դաժան սպանության գործով մեղադրյալներին դատարան են տեղափոխում մեկ մեքենայով, իսկ օրենքով սահմանված յուրաքանչյուր մեղադրյալին երեք ուղեկցողի փոխարեն ուղեկցում է միայն մեկ ծառայող։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության քրեական դատարանում՝ դատավոր Արտուշ Գաբրիելյանի նախագահությամբ, դատական նիստն այսօր սկսվել է ուշացումով։ Նախ՝ պաշտպանների ուշացման, ապա՝ ամբաստանյալների՝ դատարան ուշ ներկայացնելու պատճառով։ Պարզվում է՝ ամբաստանյալներին դատարան ներկայացնելու համար ուղեկցողներ չկային, ուստի, դատարանին հայտնել են, որ մեկ այլ նիստի ավարտից հետո միայն գոնե մեկ ուղեկցող կկարողանա ազատ լինել՝ ամբաստանյալներին տեղափոխող ավտոմեքենայի դիմացը՝ ճաղավանդակներից այն կողմ նստելու համար։ Արտուշ Գաբրիելյանը նաև մտահոգություն հայտնեց որ երկու կալանավոր են բերում՝ մեկ ուղեկցողով, մինչդեռ, օրենքով սահմանված կարգով, ցանկացած կալանավորի պետք է ուղեկցի երեք ոստիկան։ Հանրային մեղադրող Արեգ Խաչատրյանն էլ մտահոգություն հայտնեց, որ երկու մեղադրյալները դատարան են տեղափոխվում նույն ավտոմեքենայով և արդյո՞ք ապահովված են պայմանները, որ նրանք չկարողանան շփվել միմյանց հետ՝ բացառելու ամբաստանյալներից մեկի ազդեցությունը մյուսի նկատմամբ, հատկապես, երբ հայտնի է, թե ինչ ցուցմունքներ են նրանք տվել։ Դատախազը գտնում է, որ պետք է գրություն ուղարկել ոստիկանապետին։

Նիստի վերսկսումից հետո շարունակվեց քննարկվել՝ ապացույցների հետազոտման շրջանակի վերաբերյալ պաշտպանության կողմի առաջարկը, որը նախորդ նիստի ընթացքում ընդհատվել էր։

Հիշեցնենք, որ 2022թ. նոյեմբերի 9-ին Շիրակի մարզի Պեմզաշեն գյուղում ողբերգական դեպք է տեղի ունեցել։ Գյուղի տներից մեկում հայտնաբերվել է երեք դի։ Մահացածներն են՝ մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։ Իրավապահ մարմինները հայտնել էին, որ տան ննջասենյակի մեկտեղանի մահճակալին հայտնաբերվել է արական սեռի երեխայի դի՝ կրծքավանդակի հատվածում կտրած-ծակած վերքերով՝ ձեռքերը և ոտքերը կապած վիճակում, նույն ննջասենյակի հատակին հայտնաբերվել է իգական սեռի երեխայի դի՝ կրծքավանդակի հետին մակերեսին և որովայնի հատվածներում կտրած-ծակած վերքերով, իգական սեռի դի՝ որովայնի և կրծքավանդակի հատվածներում ու կրծքավանդակի հետին մակերեսին կտրած-ծակած վերքերով՝ ձեռքերը հետնամասում թելով կապված վիճակում: Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաև հանցանքը ենթադրաբար կատարած երկրորդ անձը՝ 41-ամյա տղամարդ։

Տղամարդիկ ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։ ՔԿ տարածած հաղորդագրության համաձայն՝ մեղադրյալները տուն մուտք են գործել՝ գումար հափշտակելու համար, սակայն, տանտիրուհուց իմանալով, որ տանը գումար չկա, իրենց կողմից կատարված հանցագործությունները թաքցնելու նպատակով, նախ կապել և միմյանց գործողությունները փոխլրացնելով՝ առանձին դաժանությամբ սպանել են կնոջը, ապա 32-ամյա տղամարդը, կատարված հանցանքները թաքցնելու նպատակով, ապօրինաբար կյանքից զրկելու դիտավորությամբ, կապել է երեխաների ձեռքերն ու ոտքերը և խոհանոցային դանակով հարվածներ է հասցրել նրանց մարմնի տարբեր մասերին՝ պատճառելով կյանքի հետ անհամատեղելի մարմնական վնասվածքներ:

Տղամարդկանցից մեկին՝ 32-ամյա Վրույր Բարսեղյանին, մեղադրանք է ներկայացվել ՀՀ քրեական օրենսգրքի 155-րդ հոդվածի 2-րդ մասի 6-րդ, 8-րդ և 13-րդ կետերով, 155-րդ հոդվածի 2-րդ մասի 3-րդ , 5-րդ, 6-րդ և 13-րդ կետերով (երկու դրվագ)՝ այլ հանցանքը թաքցնելու նպատակով մի խումբ անձանց կողմից առանձին դաժանությամբ սպանության և անօգնական վիճակում գտնվող երկու անչափահասին առանձին դաժանությամբ սպանության համար, 252-րդ հոդվածի 3-րդ մասի 2-րդ կետով՝ բնակարան ապօրինի մուտք գործելով ավազակության համար և 198-րդ հոդվածի 4-րդ մասով՝ 12 տարին չլրացած անձի նկատմամբ սեռական բնույթի բռնի գործողություն կատարելու համար։ Մյուս մեղադրյալին՝ 41-ամյա Արկադի Բարսեղյանին, որը, ըստ մամուլի, Նիկոլ Փաշինյանի աջակիցն է, մեղադրանք է ներկայացվել՝ այլ հանցանքը թաքցնելու նպատակով մի խումբ անձանց կողմից սպանություն կատարելու և բնակարան ապօրինի մուտք գործելով ավազակության համար։ Երկուսն էլ կալանավորված են։

Հեղինակ՝ Իզաբել Սահակյան

Աղբյուր` Փաստինֆո