Փաստ ինֆո

Երեւանի քաղաքապետի տեղակալ Սուրեն Գրիգորյանն հայտարարել է, թե 2013 թվականին պայքարել են ոչ թե տրանսպորտի սակագնի թանկացման դեմ, այլ, որ առանց որակը բարձրացնելու՝ թանկացնում են գինը։ Նման պնդմամբ փոխքաղաքապետը հանդես է եկել այսօր տեղի ունեցած մամուլի ասուլիսում։

«Մեծ տարբերություն կա այն տրանսպորտային շարժակազմերի միջև, որը գործում էր 2013-15 թթ-ին, երբ ես և իմ ընկերները պայքարում էինք ուղեվորավարձի թանկացման դեմ և այն շարժակազմի միջև, որն առկա է այսօր»,- նշել է Սուրեն Գրիգորյանը։

Նրա խոսքերով՝ 2013 թ-ին իր պահանջը այդ օրվա քաղաքային իշխանություններից այն չէր, որ տրանսպորտը չպետք է թանկանա։ «Մենք ասում էինք, եթե գազել է, նոր որակ չկա, ինչն եք թանկացնում, ասում էին՝ թանկացնենք, որ լավ տրանսպորտ բերեք, մենք էլ ասում էինք՝ բերեք հետո թանկացրեք»,- նշել է նա։

Հարցին, թե իրականում, ինչքան է թանկանալու ուղեվարձը՝ Գրիգորյանը պատասխանեց, որ չկա այսօր այն տոմսային պրոդուկտը՝ մեկ անգամյա ուղևորության, որ ինքը կարողանա ասել՝ 100 էր՝ դարձավ այսքան։

«Եթե մենք վերցնում ենք ամեն օր տրանսպորտից օգտվող անձին և վերցնում ենք, որ ինքը օգտվելու է ոչ թե մեկօրյա՝ 70 րոպեի տոմսից, այլ եռամսյակային կամ տարեկան, որովհետև ինքը կարճ ժամանակահատվածում շատ է օգտագտվելու՝ այս պահին այդ գինը 180 դրամին մոտ է։ Այսինքն, օրինակ, ամսական 10 800-ը, եթե բաժանենք 60 ուղևորության՝ կստացվի 180 դրամ։

Դիտարկմանը, թե 110 000 դրամ տարեկան տոմսը լրջագույն դեռ է երևանցու համար՝ Գրիգորյանն ասաց, որ եթե տարեկանը բեռ է, թող ամսականը վերցնեն կամ եռամսյակայինը։ «100 դրամից ավելին արդեն թանկացում է, բայց մենք պետք է հասկանանք, որ մենք հանրություն ենք, որ վճարում ենք ուղևորափոխադրման համար։ Տրանսպորտային համակարգի համար մեկ ուղևորափոխադրումը օբյեկտիվ գին ունի, այսօր այդ գինը շատ համեստ հաշվարկներով 200-230 դրամ է։ Եթե ինքարժեքը 200 դրամ է օբյեկտիվորեն, հիմա այսօր էլ այդ գինը վճարվում է, դրանից 100 դրամը վճարում է ուղևորը, մնացածը ձևավորում է բյուջեն, որը էլի վճարվում է քաղաքացու վճարումներից»,- նշել է նա։

Աղբյուր` Փաստինֆո