Փաստ ինֆո

2021 թվականի ավարտին պետական գրանցում ստացավ «Ֆլայ Արնա» ապրանքանիշով հայկական ազգային ավիաընկերությունը։ Օրվա իշխանավորները էլ բարձրագոչ և հեռուն գնացող նպատակներով ներկայացրեցին ներդրումային այս ծրագիրը։ Հիմա արդեն պարզ է դառնում․ սա իշխանության անսահման պոպուլիզմի հերթական դոզան էր՝ քվեի դիմաց։ ԱԺ-ում հայտարարությունների ժամին այս մասին նշել է «Հայաստան» խմբակցության պատգամավոր Թադեւոս Ավետիսյանը:

«Պոպուլիստական այս բեմականացման մեկնարկը տրվեց ամենահարմար պահին՝ 2021 թվականի խորհրդարանական ընտրությունների նախընտրական փուլում։ Առիթը բաց չթողեցին նորից խոստացան օտարերկրյա նոր ներդրումներ և նոր աշխատատեղեր, ավիափոխադրումների էժանացում, անվտանգային բազում խնդիրների լուծումներ և այլն։

Իրականում, կառավարությունը 2021 թվականի հոկտեմբերին պետական բյուջեից հատկացրեց 4 միլիարդ 733 միլիոն դրամ՝ «Ֆլայ Արնա» նորաստեղծ ավիաընկերության բաժնետոմսերի 49 տոկոսի դիմաց։

Ի դեպ այս ներդրումն իրականացրել է Հայաստանի պետական հետաքրքրությունների ֆոնդը (ԱՆԻՖ-ը)»,- նշել է ընդդիմադիր պատգամավորը ու ավելացրել, որ երկու տարի անց պարզվում է, որ «Ֆլայ Արնա» ընկերությունն ունի ֆինանսական լուրջ խնդիրներ, թռիչքներ չի իրականացնում և կանգնած է սնանկացման և գործունեությունը դադարեցնելու եզրին։

«Այս ծրագրով պարծեցող, ամեն ինչ խոստացած և հերթական անգամ ձախողած պատասխանատուները պետք է հանրային կերպով և օր առաջ տան շուրջ 12 միլիոն ԱՄՆ դոլարի չափով պետական միջոցները փոշիացնելուն ուղղված, առնվազն հետևյալ հարցերի պատասխանները․

1․ Ինչ ծավալի չարաշահումներ են առկա պետական ներդրումային այս ծրագրում։

2․ Որքա՞ն է գնահատվում պետական բյուջեից հատկացված միջոցների կորուստը։

3․ Ովքե՞ր են այս ամենի կոնկրետ ձախողումները։

4․ Ընկերության գործունեության դադարեցումը ի՞նչ բացասական հետևանքներ կունենա ավիափոխադրումների շուկայում՝ ավիափոխադրումների գների թանկացում, մրցակցային իրավիճակի վատացում և այլն։

5․ Ձեր կողմից «բացումն արած» ներդրումային ծրագրերից կա՞ արդյոք գեթ մեկը, որը չի ունեցել կամ չի ունենալու նման ճակատագիր»,- հայտարարել է պատգամավորը։

Աղբյուր` Փաստինֆո