Փաստ ինֆո

Ծառայություններ կան, որ Վարդենիսում այլեւս չեն իրականացվելու։ «Փաստինֆոյի» հետ զրույցում ասաց Գեղարքունիքի մարզպետ Կարեն Սարգսյանը՝ անդրադառնալով մամուլում շրջանառվող տեղեկություններին առ այն, որ Վարդենիսում փակվելու են մի շարք պետական հիմնարկներ, ինչպես, օրինակ, ՆԳՆ-ի անձնագրային ծառայությունը, կադաստրի բաժանմունքը, հարցականի տակ է նաև հոսպիտալի և հոգեբուժարանի հետագա գործունեությունը։

Մարզպետը նշեց, որ Հոգեկան առողջության տուն- ինտերնատի տեղափոխման հարց ընդհանրապես գոյություն չունի, բայց ծառայությունների տեսակներ կան, որոնք պատվիրակվելու են առաջիկայում։

«Այսինքն, այդ ծառայությունը պատվիրակված է լինելու, ոչ թե ինչ-որ բան փակվելու է։ Պայմանական ասած՝ պատվիրակում են ինչ-որ կազմակերպության կամ համայնքին, որ այդ ծառայությունը որևէ համայնքում կազմակերպի, բայց եթե պատվիրակում են՝ դա չի նշանակում, որ այդ ծառայությունն այդտեղ չի լինելու, դա նշանակում է , որ այդ ծառայությունը կազմակերպելու է ինչ- որ մի այլ կազմակերպություն կամ համայնք»,- պարզաբանեց մարզպետը։

Գեղամասարի նախկին համայնքապետ Հակոբ Ավետյանը մեզ հետ զրույցում նշեց, որ անձնագրայինի և կադաստրի տեղափոխման հետ կապված հարցերը, բացառված չէ, քննարկվեն կառավարության առաջիկա նիստում։

«Ի սկզբանե, նախատեսված է եղել, որ դրանք տեղափոխվելու են Մարտունի, բայց քանի որ հիմա այս հարցի շուրջ աղմուկը մեծացավ՝ հիմա քննարկվում է մեկ պատուհան Վարդենիսի համայնքապետարանում թողնելու հարցը։ Ենթադրվում էր, որ կառավարության հինգշաբթի օրվա նիստում այս հարցը պետք է քննարկվեր, հիմա բացառված չէ, որ առայժմ հանեն օրակարգից»,- ասաց մեր զրուցակիցը։

Նրա խոսքերով՝ եթե գոնե մեկ պատուհան թողնեն, ապա բնակիչների համար ոչ մի խնդիր չի լինի։

«Ենթադրում եմ, որ էլեկտրոնային կնիք կլինի, եթե էդպես չլինի՝ անգամ մեկ պատուհան չթողնեն ու ամբողջ տարածաշրջանի ժողովուրդը ստիպված լինի գնալ Մարտունի՝ այս դեպքում, կարծում եմ, Վարդենիսի տարածաշրջանում բունտ կլինի, բողոքի ակցիաներ կլինեն, ես ինքս կնախաձեռնեմ այդ ակցիաների կազմակերպումը»,- նշեց Հակոբ Ավետյանը։

Սակայն նաեւ չբացառեց, որ մարդիկ որոշեն ակցիաներ անել՝ անձնագրայինի ծառայությունը պահելու համար միայն։ «Եթե դուրս են գալու՝ ասեն՝ «կառավարության ցավը տանեմ, բայց անձնագրայինը պահեք», իրենց կողքը չեմ կանգնի։ Էսօր անձնագրայինը կլինի, վաղը՝ մեկ ուրիշ բան»,- ընդգծեց Գեղամասարի նախկին համայնքապետը։

Նրա փոխանցմամբ՝ Վարդենիսում որոշակի ծառայությունների մատուցման սահմանափակումն արվում է համայնքային խոշորացման ներքո ։

«Եթե Վարդենիսից բոլոր այս կարևոր հիմնարկները հանեն՝ Վարդենիսի համար «ուրվական քաղաք» բնութագրումը շատ ճիշտ կլինի։ Եթե էսպես շարունակվի՝ վերջում ամբողջ երկիրն են խոշորացնելու դարձնեն մեկ ընդհանուր համայնք ու հանձնեն 3-րդ երկրի, էսպես կորցնելու ենք անկախությունը»,- եզրափակեց Ավետյանը։

Աղբյուր` Փաստինֆո