Փաստ ինֆո

Փետրվարի 5-ին Նոր Արեշի 34 հասցեում տեղի ունեցած պայթյունի հետևանքով վնասվել է 34 տուն, որից 3-ը՝ ամբողջությամբ են փլուզվել, ևս 3-ը՝ մասամբ։ Մնացած 28 տներում դռներն ու լուսամուտներն են վնասվել, քարաթափման դեպքեր կան և այլն։ Այս մասին «Փաստինֆո»-ի հետ զրույցում հայտնեցին Երևանի քաղաքապետարանից։

«Երեկվա դրությամբ՝ դրսում մնացած ընտանիքներ, այսպես ասած․ գիշերակացի խնդիր ոչ ոք չի ունեցել։ Հոգեբանական աջակցությունից բոլոր տուժածներն անխտիր հրաժարվել են։ Համայնքը պատրաստ է նաև հոգալ պայթյունի արդյունքում զոհված երկու քաղաքացիների հուղարկավորության ծախսերը՝ հարազատների թույլտվությամբ»,- ասացին Երևանի քաղաքապետարանից։

Փոխատուցման հարցը կքննարկվի գործի քննության ավարտից հետո միայն, երբ կպարզվի պատճառները և կհստակեցվի, թե որ կառույցը պետք է հատկացնի փոխհատուցումը, սակայն քաղաքապետարանից նշում են, որ անկախ նրանից, թե քննության արդյունքում ինչ կպարզվի՝ ինչի՞ արդյունքում է տեղի ունեցել պայթյունը, քաղաքապետարանը պատրաստ է որոշակի աջակցություն ցուցաբերել պայթյունի հետևանքով տուժած քաղաքացիներին:

«Ի սկզբանե ամեն ինչ արել ենք, որ հնարավորինս լինենք այդ մարդկանց կողքին։ Հիմա էլ այդ պատրաստակամությունը հայտնում ենք՝ չունենալով պարտադիր լիազորություն։ Բոլոր դեպքերում, արդեն հետագա օրերի հետ կապված, ամեն ինչ կհստակեցվի, երբ կստացվի փորձաքննությունների եզրակացությունը, պատճառները կպարզվեն, ըստ այդմ, կորոշվի, թե որ գերատեսչությունն է ապահովելու հետագա փոխհատուցման, կարիքների հետ կապված հարցերը»,- նշեցին քաղաքապետարանից։

Հիշեցնենք, որ փետրվարի 5-ին՝ ժամը 11:36-ին, Ճգնաժամային կառավարման ազգային կենտրոն ահազանգ է ստացվել, որ Երևանի Նոր Արեշ 34-րդ փողոցում տեղի է ունեցել պայթյուն, որի հետևանքով՝ 2-3 տուն է փլուզվել։ Պայթյունի և փլուզման հետևանքով երկու քաղաքացի մահացել է, ևս երկու քաղաքացի էլ՝ մարմնական վնասվածքներով տեղափոխվել հիվանդանոց։ ՔԿ-ում դեպքի առթիվ նախաձեռնվել է քրեական վարույթ, որի շրջանակներում տուժած չորս քաղաքացիները տուժող են ճանաչվել։ Հարցաքննվել են դեպքին առնչություն ունեցող և հարևանութամբ բնակվող տների բնակիչներ: Ստացվել են դեպքի վայրին հարակից տեսանկարահանող սարքերի տեսագրությունները, որոնք ենթարկվել են զննության: Նախաքննությամբ նախնական, դեռևս ստուգման ենթակա տվյալներով, պայթյունը տեղի է ունեցել Նոր Արեշ 27–րդ փողոցի 23-րդ տանը՝ գազի արտահոսքի և բնակչի կողմից կրակայրիչը վառելու արդյունքում: Որոշում է կայացվել համապատասխան ընկերությունից առգրավել նշված տան գազի սպասարկման վերաբերյալ առկա փաստաթղթերը։ Նշանակվել է պայթյունատեխնիկական, հրդեհատեխնիկական, ապրանքագիտական, շինարարարատեխնիկական, դատաբժշկական, դիակի դատաբժշկական համալիր փորձաքննություն։

Հեղինակ՝ Իզաբել Սահակյան

Աղբյուր` Փաստինֆո