Փաստ ինֆո

Ես Իլհամ Ալիևին չեմ մեկնաբանում, ձեզ էլ խորհուրդ չեմ տալիս. իմ կարծիքով մենք պետք է առաջնորդվենք սեփական շահերով և Հայաստանի առջև ծառացած մարտահրավերներով: Այս մասին ԱԺ-ում լրագրողների հետ զրույցում ասաց ԱԺ պետաիրավական հարցերի հանձնաժողովի նախագահ Վլադիմիր Վարդանյանն՝ անդրադառնալով Ադրբեջանի նախագահ հայտարարությանը, թե մինչև Հայաստանը չփոխի Սահմանադրությունը՝ խաղաղության համաձայնագիր չի ստորագրվի:

Դիտարկմանը, թե ինչպես է ստացվում, որ իշխանության առաջ քաշած շահերը և Ալիևի առաջադրած պահանջները համընկնում են՝ Վարդանյանը չպատասխանեց. «Ես ձեր հարցին չեմ պատասխանի, ես ասում եմ՝ Հայաստանի շահերը, իսկ դուք ասում եք ձեր սեփական շահերը»։
Նա նշեց, որ սահմանադրության փոփոխություններ Հայաստանում պետք է իրականացվեն բացառապես Հայաստանի ժողովրդի կամքով։ «Ոչ ես, ոչ դուք Հայաստանի սահմանադիրները չենք: Նոր Սահմանադրության գաղափարը ընդամենը գաղափար է և այս հարցի պատասխանը կարող է տալ միայն ՀՀ քաղաքացին»:

Վարդանյանն ընդգծեց, որ տարածքային ամբողջականությունը սահմանների անխախտելիությունը պետք է ՄԱԿ-ի ստեղծումից ի վեր շարունակում են դիտարկվել որպես կարևորագույն անկյունաքար և Հայաստանը պետք է շարժի այդ ճանապարհով:

Հարցին, թե արդյոք նոր Սահմանադրության դեպքում անփոփոխելի են լինելու առաջին հոդվածները, որտեղ կա հղում Անկախության հռչակագրին, նա պատասխանեց, որ նոր Սահմանադրությունը նշանակում է ամբողջությամբ նոր ընթացակարգ։ «Բայց մենք չպետք է մոռանանք, որ գոյություն ունեն սահմանադրաիրավական սկզբունքներ, որոնք անկախ նրանից, թե ինչ Սահմանադրություն կլինի՝ պահպանվում են: Դրանք դիտարկվում են որպես ցողունային սահմանադրական բջիջներ, առանց որոնց հնարավոր չէ ապահովել սահմանադրական ամբողջական համակարգի գոյատևումը»:

Աղբյուր` Փաստինֆո