Փաստ ինֆո

«Հանրային ձայն» խմբակցության ղեկավարկը չի շտապում հայտնել իրենց դիրքորոշումը՝ ՔՊ-ին կմիանան ու ընդդիմադիր խմբակցության ներկայացուցիչներին կզրկեն մանդատից, թե ոչ։

«Ամսի 7-ին կերևա, հիմա ես այդ հարցին չեմ պատասխանի»,- «Փաստինֆոյի» հետ զրույցում ասաց Երևանի ավագանու «Հանրային ձայն» խմբակցության ղեկավար Վահան Ավագյանը՝ անդրադառնալով հարցին, թե արդյոք խմբակցությունը մասնակցելու է փետրվարի 7-ին կայանալիք Երևանի ավագանու արտահերթ նիստին։

«Այդ հարցի պատասխանը հանրությունը կստանա ամսի 7-ին, բայց դուք քաջ հասկանում եք, չէ՞, որ հենց մենք ենք որոշիչը»,-ասաց Ավագյանը։

Հիշեցնենք, փետրվարի 7-ին տեղի կունենա ավագանու արտահերթ նիստ, որի ժամանակ իշխող ՔՊ կուսակցությունը մտադիր է ավագանու ընդդիմադիր մի քանի անդամի զրկել մանդատից՝ իբր անհարգելի բացակայությունների համար։ Վարդան Ղուկասյանը հայտարարել էր, որ Հանրային ձայն ֆրակցիան չի մասնակցելու և քվորում չի ապահովելու այդ արտահերթ նիստի կայացման համար: նրա հայտարարության մեջ մասնավորապես նշվում էր. «Այս պահին կան շանտաժներ ճնշումներ ավագանու անդամներից ոմանց վրա, որպեսզի այդ նիստը ամեն գնով կայանա: Հայտարարում եմ ամենայն պատասխանատվությամբ, եթե Հանրային ձայնի որևէ անդամ տրվի այդ շանտաժներին և մասնակցի նախատեսվող արտահերթ նիստին, նա ոչ միայն ամենավերջին պարսավանքին կարժանանա իմ կողմից, այլև իր կարիերան կավարտի նույն օրը: Իսկ շանտաժի լեզվով խոսող իշխանությունները թող լավ իմանան, ես շատ շուտով անձամբ եմ գալու իրենց ետևից»:

Աղբյուր` Փաստինֆո