Փաստ ինֆո

Ուռուցքաբանության ոլորտում մենք, այո, ունենք հաջողություններ, բայց ո՞ր կետից ենք հաշվարկում մեր հաջողությունները։ Արդյոք մենք ունենք հաջողություններ կանխարգելման առումով։ Այս մասին Հայկական ուռուցքաբանական 4-րդ կոնգրեսում բացման խոսքում ասաց «Արաբկիր» ԲԿ կառավարման խորհրդի նախագահ, մանկական վիրաբույժ-ուրոլոգ, պրոֆեսոր Արա Բաբլոյանը:

Անդրադառնալով ծխելու խնդրին՝ Բաբլոյանը նկատեց, որ այստեղ դեռ շատ հետ ենք մնում, դրա համար այն քայլերը, որոնք վերջին տարիներին իրականացվում են կառավարության կողմից, առանձնահատուկ մոտեցում է ցուցաբերվում առողջապահության նախարարության կողմից ուռուցքաբանության բոլոր ուղղություններով ծրագրերով զարգացնելուն․ «այսինքն նախևառաջ կանխարգելում, վաղ հայտնաբերում, վաղ միջամտություն, վերականգնում, այս բոլոր ուղղությունները, այո, պետք է փոխկապակցված լինեն»։

Ինչ վերաբերում է առողջապահության ապահովագրմանը, Բաբլոյանը նշեց, որ մենք պետք է մարդկանց կրթենք, դաստիարակենք, որ նրանք հասկանան, որ անկախ նրանից, որ փողը վճարել են ապահովագրվելու, նրանք չեն կարող ստանալ համապատասխան բժշկական ծառայություն անվճար, եթե իրենք նախօրոք չեն գնացել ու չեն մասնակցել այն սկրինինգներին, որոնք կանխարգելելու են իրենց հիվանդության ուշ հայտնաբերումը:

«Այսինքն, մենք այս պահին ունենալով լավ արդյունքներ, իրականում չենք կարող ասել, որ այն կետը, որից սկսում ենք, դրա համար մեղավոր է կառավարությունը, նախարարությունը: Ոչ, այդ վատ կետին, վատ ցուցանիշին մենք հասել ենք տասնյակ տարիների ընթացքում: Բայց լավ ցուցանիշն այն է, որ ունենք 3-4 տոկոս արդյունք։

Առողջապահության համաշխարհային կազմակերպությունը նշում է, որ եթե մենք 2022 թվականին մենք ունենք չարորակ ուռուցքներով հաստատված 20 միլիոն դեպք, ապա 2050-ին կանխատեսվում է 35 միլիոն դեպք:

Կարծում եմ՝ մեր ջանքերը հենց ուղղված են դրան, որ մենք այդ 35 միլիոնի մեջ չլինենք, մենք լինենք այն թվերի մեջ, որոնք բերելու են 3-4 տոկոսը բարձրացնելու 5-6 տոկոսի և ավելի բարձր արդյունքների»,- նշեց նա։

Աղբյուր` Փաստինֆո