Փաստ ինֆո

Ես կուզենայի, որ մենք Սահմանադրությունը դիտարկենք որպես ապրող փաստաթուղթ, այդ ապրող փաստաթուղթը հասարակական հարաբերությունների զարգացման փուլում կարիք է ունենում Սահմանադրի կարծիքը ունենալու պարագայում ՝ փոփոխելու կամ վերափոխելու։ Այս մասին ԱԺ-ում լրագրողների հետ զրույցում ասաց ՀՀ ԱԺ պետաիրավական հարցերով մշտական հանձնաժողովի նախագահ Վլադիմիր Վարդանյանը։

«Այս տեսանկյունից՝ ՀՀ -ն ոչ առաջինն է, ոչ էլ վերջինը, որ քննարկում է անցկացնում ոչ թե սահմանադրական բարեփոխումների, այլև սահմանադրության տեքստի հետ կապված։ Այս քննարկումները բավականին շատ են։ Ի վերջո, ոչ թե ես և դուք, այլև սահմանադիրն է, որը քվեարկելու է՝ դեմ է թե կողմ նոր սահմանադրության»։

Անդրադառնալով Անկախության հռչակագրին հղումը Սահմանադրությունից հանելուն՝ Վարդանյանն ասաց, որ տարբեր երկրների սահմանադրական ավանդույթներում տարբեր մոտեցումներ կան։ «Այդ ամենը քննարկելու հարց է։ Եթե մենք վերացական դիտարկումներ անենք՝ մենք որևէ տեղ չենք հանգի, հիմա կա գաղափար և այդ գաղափարի շրջանակներում և Սահմանադրական բարեփոխումների շրջանակներում այդ հարցը կքննարկվի։ Մենք կփորձենք հասկանալ, թե մենք որ ճանապարհով ենք գնում»։

Հստակեցմանը, թե այսինքն չե՞ն բացառում, որ նոր Սահմանադրության մեջ Անկախության հռչակագրերից հրաժարվելու ճանապարհով ե գնալու՝ Վարդանյանն ասաց. «Ոչ ես եմ հրաժարվողը, ոչ էլ դուք, մենք պետք է արձանագրենք, որ եթե Սահմանադրության նոր տեքստը դրվի հանրաքվեի, որովհետև, այլ եղանակ չկա՝ սահմանադիրն է որոշելու, թե սահմանադրության մեջ ինչ տեքստ է լինելու»։

Դիտարկմանը, թե ընդդիմությունը պնդում է, որ Ադրբեջանի պահանջով է իշխանությունը գնում Սահմանադրության փոփոխության՝ Վարդանյանն ընդգծեց, որ ոչ մի սահմնադրություն չի կարող և չպետք է ընդունվի ճնշումներով։ «Եթե Սահմանադրությունն ընդունվի ճնշումներով՝ ուրեմն մենք ինքնիշխանության հետ խնդիրներ ունեք»։

Նա նաև ընդգծեց, որ Սահմանադրությունն անցյալին ուղղված փաստաթուղթ չէ, այլ ներկային ու ապագային միտված փաստաթուղթ է, որը միտված է կարգավորել 3 խումբ հարաբերություններ, անհատ-պետություն, հասարակություն պետություն և պետական կառավարման համակարգի ձևավորում։

Անդրադառնալով զինանշանի փոփոխությանը՝ նա ընդգծեց, որ կան սիմվոլներ, որոնք տարիների ընթացքում իրենց նշանակությունն ու ընկալումը փոխել են ու դրականից վերածվել են բացասականի։

«Մեր զինանշանի վրա պատկերված է Ռուբինյանների առյուծը, հովազն է՝ Բագրատուներիների, Արշակունիների և Արտաշեսյանների երկու արծիվներն են, ու կարծեմ՝ Բագրատուների շրջանից եկող երկգլխանի արծիվն է։ Ցավով կարող եմ արձանագրել որ հայկական պետականության բացակայության պայմաններում առնվազն Կիլիկիայից հտո մենք հերալդիկ զարգացումների հնարավորություն չենք ունեցել։ Օրինակ, եթե ուսումնասիրենք այն հերալդիկ վահանը, որ օգտագործվում է մեր զինանշանի վրա և այն հերալդիկ վահանը, որն առկա է Երևանի քաղաքապետարանի սիմվոլի վրա՝ դրանք տարբեր հերալգդիկ վահաններ են։ Վերջնիը բնորոշ է Արևելյան Եվրոպային, մյուսը՝ Արևմտյան Եվրոպային»։

Ինչ վերաբերում է Արարատ լեռը զինանշանից հանելուն՝ նա նշեց, որ ճիշտ կլինի նախ ուսումնասիրել, թե ինչու ֆուտբոլի ֆեդերացիայի զինանշանից ժամանակին կորավ այդ լեռը, հետո կրկին հայտնվեց։

Աղբյուր` Փաստինֆո