Փաստ ինֆո

«Խոտանել 7-րդ դասարանի դասագիրքը» նախաձեռնող խումբն այսօր կրկին բողոքի ակցիա է իրականացրել ԿԳՄՍ նախարարության մոտ՝ պահանջելով նախարար Ժաննա Անդրեասյանի հրաժարականը։ Նախաձեռնող խմբի անդամ, «Հայաստանի ժողովրդական շարժման» համակարգող Վազգեն Պետրոսյանը լրագրողների հետ զրույցում հիշեցրեց, որ հունվարի 29-ին ԿԳՄՍ նախարարին ուղարկել էին նրա իսկ հրաժարականի դիմումի տեքստը, որպեսզի նա հրաժարական ներկայացնի, քանի որ իր վատ աշխատանքի հետեւանքով կործանման է գնում կրթության բնագավառը։

«Մենք քաջ գիտակցում էինք, որ մեկ դիմումով կամ մեկ պահանջով նա հրաժարական չի տալու։ Այդ պատճառով փորձեցինք տրամաբանության սահմաններում, մարդկային առումով, իրեն ժամանակ տալ, որպեսզի ինքը հրաժարականը գրի ու հեռանա, անգամ իր դիմումը գրեցինք ու վարչապետից պահանջեցինք, որ նրա վերջնահաշվարկը տա։ Սակայն ոչ մեկը, ոչ էլ մյուսը տեղի չի ունեցել։ Այդ պատճառով սկսելու ենք մեր միջոցառումների շարքը, որի արդյունքում հույս ունեք, որ նախարարը հրաժարական կտա»,- նշել է Պետրոսյանը։

Նրա փոխանցմամբ՝ ակնկալում են, որ կխոտանվեն մի շարք դասագրքեր, հատկապես «Հայոց պատմության», «Հայ գրականության» և մյուս դասագրքերը, ինչպես նաև հետ կկանչվի «Հայոց պատմությունը»՝ «Հայաստանի պատմություն» վերանվանելու նախագիծը։

«Զուգահեռը, որ իրենք բերում են, օրինակ «Ղազախստանի պատմության» դասագրքի հետ, անընդունելի է։ Ղազախստանը 100 տարվա պատմություն ունի, անգամ Կոկա-Կոլան է ավելի հին, քան աշխարհի շատ պետություններ, ուստի նման համեմատությունը տեղին չէ։Մենք մի ազգ ենք, որն ունի մի քանի 1000 տարվա պատմություն և մշակույթ, ով կասկածում է՝ կարող է գնալ Հռոմ, ու տեսնել այն քարտեզը, որի մի կողմում քանդակվել է Հռոմը, մյուս կողմում՝ Արմենիան։ Այդ քարտեզում ոչ Ադրբեջան կա, ոչ էլ Թուրքիա»,- նշեց Պետրոսյանը։
Նա վստահեցրեց, որ կանգ չեն առնելու և սկսում են միջոցառումների շարք, որոնց շրջանակներում կլինեն իրազեկման ակցիաներ, զուգահեռաբար՝ կհայտարարվի նաեւ ծաղրանկարի մրցույթ։

«Ով կուզենա մեզ հետ գալ՝ կարող է գալ, ոչ չի ուզենա՝ կարող է իր գործողություներն իրականացնել, սա պարտիզանական պատերազմ է ընդդեմ այն իշխանության, որի քաղաքականությունը հայ ժողովրդի դեմ է։ Դժբախտաբար մեր կառավարությունը բանջարանաբոստանային կառավարություն է, և գլխավոր բուսաբանը, բացի բանջարներից, իր շուրջ ուրիշ բան չի ուզում բերել։ Արդյունքում, դդումը գնաց՝ դդմիկը եկավ, այդ թեմայով ծաղրանկարների մրցույթ ենք հայտարարելու, լինելու է նաև դրամական պարգև»,- նշեց Վազգեն Պետրոսյանը։
Միջոցառման ընթացքում ակցիայի մասնակիցները բացականչում էին. «Դդմիկ հեռացիր»։

Աղբյուր` Փաստինֆո