Փաստ ինֆո

«Lydian Armenia» եւ «ՄՏՍ Արմենիա» ընկերությունների արժեթղթերը Հայաստանի սեփականությանը դեռ չեն հանձնվել։ Այս մասին այսօր տեղի ունեցած ասուլիսում ասել է ֆինանսների նախարար Վահե Հովհաննիսյանը՝ նշելով, որ ամեն բան առայժմ մնացել է հայտարարությունների եւ հուշագրերի մակարդակում։

Հարցին ի պատասխան՝ նախարարը վստահեցրել է, թե Հայաստանը չի զբաղվում պետական ռեկետով եւ ոչ մեկից ոչինչ չի խլում։ «Մենք պետք է ունենանք ռազմավարություն, որով պետք է առաջնորդվեն բոլորը։ Հասարակությունը պետք է իմանա դա, ինչպես նաեւ այն տրամաբանությունը, որովք մենք ընթանում ենք»,- նշել է նախարարը։

Հիշեցնենք, որ ՀՀ կառավարությունը 2021 թվականի սեպտեմբերին նախ բաժնետոմսեր ձեռք բերեց ԶՄՊԿ-ում՝ թերեւս նպաստելով սեփականատիրոջ փոփոխությանն ու մութ գործարքին, իսկ այս տարվա հունվարին կառավարության նիստում հաստատվեց, որ «Lydian» ընկերության եւ Զարգացման եվրասիական բանկի միջեւ ստորագրվել է հուշագիր, որը նախատեսում է նաեւ «Lydian Armenia» ընկերության արժեթղթերի 12,5 տոկոսի հանձնում Հայաստանի կառավարությանը։

Բացի այդ՝ հունվարի 25-ին հայտնի դարձավ, որ «ՄՏՍ Արմենիա» ընկերության արժեթղթերի 20 տոկոսը եւս անհատույց հանձնվելու է Հայաստանին։

Աղբյուր` Փաստինֆո