Փաստ ինֆո

Միանշանակ է, որ Ադրբեջանը չի ստորագրելու խաղաղության պայմանագիրը, քանի որ շատ լավ հասկանում է, որ Հայաստանի այս իշխանությունների հետ պայմանագիրը կնքելու դեպքում անգամ չկա որևէ երաշխիք, որ հաջորդ իշխանությունը, որը կլինի Հայաստանում՝ չի վերանայի այն և Արցախի ազատագրության ուղղությամբ քայլեր չի ձեռնարկի, հատկապես, եթե այդ իշխանությունը ունենա ռուսական կողմի աջակցությունը։ Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանն՝ անդրադառնալով Նիկոլ Փաշինյանի՝ Ադրբեջանին արած հերթական առաջարկին՝ ստորագրել սահմանի դեմիլիտարիզացիայի, այսինքն՝ ապառազմականացման, ինչպես նաև չհարձակման մասին պայմանագիր։

«Հայաստանում իշխանությունը կարող է փոխվել և այդ իշխանությունը կարող է ունենալ ռուսական կողմի աջակցությունը, բնական է, որ այդ դեպքում խաղաղության պայմանագիրը որևէ արժեք չի ունենալու։ Արցախն ազատագրելու ցանկության դեպքում որեւէ իշխանություն չի նայելու խաղաղության պայմանագիրը կնքված է, թե կնքված ոչ»,- նշեց Արմեն Բադալյանը։

Մյուս կողմից էլ, ըստ նրա, քանի որ խաղաղության պայմանագիրը հետաձգվում է, իսկ Հայաստանից արևմտյան ղեկավարները պահանջում են արագացնել խաղաղության գործընթացը, ապա դրան փոխարինելու է գալիս միմյանց վրա չհարձակվելու պակտի պայմանագրի կնքման առաջարկը։ «Վերջինը խաղաղության պայմանագրի համառոտ տեսակն է, եթե խաղաղության պայմանագիրը պայմանական ասած՝ բաղկացած է 100 կետից և ամեն կետի վրա բավական ժամանակ է պահանջվում, ապա իրար վրա չհարձակվելու պայմանագիրը կարող է բաղկացած լինել պայմանական ասած՝ 5 կետից, որը շատ ավելի արագ հնարավոր կլինի պատրաստել»։

Բադալյանի դիտարկմամբ՝ թե խաղաղության, թե իրար վրա չհարձակվելու պայմանագիրը մեկ նպատակ ունեն՝ դա ցույց տալ ռուսական կողմին և ասել, որ այլևս ՀՀ-ում ռազմական գործողությունների վտանգ չկա, ուստի կարող են պահանջել ռուսական բազայի դուրս բերումը ՀՀ տարածքից։

«Այդպիսով, այս իշխանությունները կարող են իրականացնել այն, ինչի համար 2018-ին բերվել են իշխանության, այն է՝ փակում են Արցախի հարցը, որից հետո էլ ռուսական ռազմական ներկայությունը Հայաստանում զրոյացվում է։ Դրա համար էլ առաջարկվում է՝ եթե խաղաղության պայմանագիրը հետաձգվում է, ապա առաջ է մղվում իրար վրա չհարձակվելու, ինչպես նաև սահմանին մոտ տարածքները ապամիլիտարիզացնելու ծրագիրը։

Բայց, կարծում եմ, ինչպես խաղաղության պայմանագիրը, այնպես էլ չհարձակվելու պայմանագիրը, հազիվ թե, ադրբեջանական կողմը ստորագրի»,- նշեց քաղտեխնոլոգը։

Ըստ նրա՝ ադրբեջանական կողմը սպասում է ուկրաինական ճակատում ռուսական կողմի արդյունքներին։ «Ուկրաինական ճակատում ռուսական կողմի արդյունքները դեռ տեսանելի չեն, և դժվար է ասել, կերևան առաջիկայում, թե ոչ, դրա համար Ադրբեջանի վարքագիծն էլ անորոշ է՝ ոչ խաղաղության պայմանագիրն է կնքվում, ոչ էլ՝ ՀՀ իշխանությունների առաջարկած չհարձակման պակտը։ Ալիևը ժամանակ է ձգում, առաջարկում է փոխել սահմանադրություն, և այլն, մինչև հստակություն լինի ռազմաճակատում»,- նշեց բանախոսը

Դիտարկմանը, թե արդյոք այս առաջարկով Փաշինյանը նաև ներքաղաքկան հարց է լուծում՝ փորձելով երկարացնել իր իշխանությունը՝ Բադալյանն ընդգծեց, որ իրականում Հայաստանում նրանց իշխանությանը ոչ ոք չի սպառնում։ «Փաշինյանի իշխանությունը Հայաստանում կշարունակվի այնքան, քանի դեռ այն ձեռնտու է Արեւմուտքին, ամեն դեպքում՝ դա որոշում է Արևմուտքը»,- եզրափակեց քաղտեխնոլոգը։

Աղբյուր` Փաստինֆո