Փաստ ինֆո

Ամիսներ առաջ Գյումրիում սպանության փորձ կատարելու աղմկահարույց դեպքով կալանավորված, իրեն գործարար հռչակած Մարտին Թորոյանն, ով առավել հայտնի է Մրդո մականունով՝ հունվարի 23-ին 5 մլն գրավի դիմաց ազատ է արձակվել։

«Փաստինֆոյի» հետ զրույցում դեպքով տուժող ճանաչված Հովհաննես Մկրտչյանի հարազատներից մեկը փոխանցեց, որ գործն արդեն դատարանում է, հունվարին դատավոր է փոխվել, ինչից հետո դատարանը կալանքը փոխարինել է գրավով, բայց հիմա մտավախություն ունեն, որ առհասարակ նրան ազատ կաձակեն։ Նա նաև հայտնեց, որ ծեծին մասնակցած մյուս երկուս տղամարդիկ էլ այս պահին տնային կալանքի տակ են, մինչդեռ, նրանք ոչ միայն ֆիզիկական, այլև բարոյական վնաս են հասցրել մարդուն։

Հիշեցնենք, որ ըստ Քննչական կոմիտեի տարածած հաղորդագրության՝ Թորոյանը Մկրտչյանին մեղադրել էր տան վերանորոգման աշխատանքներում թերանալու, շինանյութ գողանալու մեջ եւ իր երկու մտերիմների հետ, ովքեր նույն քաղաքի բնակիչներ են, Մկրտչյանի հասցեին հնչեցրել սեռական բնույթի հայհոյանքներ, ձեռքերով և ոտքերով բազմաթիվ հարվածներ հասցրել նրա մարմնի տարբեր հատվածներին, ապտակել , թքել նրա դեմքին, գցել շան ճաղապատ բունը, շանը հարձակվելու հրահանգ տվել, ջրի խողովակով սառը ջուրը 15-20 րոպե շարունակ պահել էր նրա վրա, որից հետո, ապօրինաբար կյանքից զրկելու դիտավորությամբ, չպարզված անձից ապօրինի կերպով ձեռք բերած և պահած հրազեն հանդիսացող ատրճանակով կրակել էր շան բնում գտնվող տղամարդու ուղղությամբ՝ պատճառելով հրազենային վնասվածք:

Դեպքի մասնակից մյուս երկու տղամարդկանցից մեկը Գյումրու «Քաղաքացիական պագմանագիր» խմբակցության անդամ Երվանդ Խանամիրյանն է, որը մեկ ուրիշի հետ, Թորոյանի հեռանալուց հետո, տուժողին դուրս էին հանել ան բնից, մոտեցրել տան մուտքի դռանը,որտեղ Թորոյանը կրկին շարունակել է անմարդկային և նվաստացուցիչ վերաբերմունքի դրսևորումերը:

Մեզ ահազանգած քաղաքացին պատմեց, որ թեև Թորոյանը չի փորձել ուղիղ կապ հաստատել գործով տուժող Մկրտչյանի հետ, բայց Հովհաննեսին բարեկամների միջոցով կառաշք է առաջարկել՝ բողոքը հետ վերցնելու համար։ «Հովհաննեսը հաստատակամ է, ու բողոքից հետ չի կանգնում։ Մարդասպանները պետք է լինեն ճաղերի հետևում»։

Նա նաև նշեց, որ ֆիզիկական առողջությունը գրեթե վերականգնված է, բժիշկները բավարար են գնահատում, բայց հոգեբանական վիճակը դեռ ծանր է։ «Մարդուն ստորացրել են, այդ ամենից հետո՝ շան բունն էին գցել մարդուն, շունը նրանցից մարդկային է գտնվել, իսկ դատարանը նրան թույլ է տվել ազատության մեջ լինել։ Նա իրավունք չունի ազատության մեջ լինել։ Ինչպես կարելի է մարդասպաններին ազատ արձայկել։ Սիրտս ցավում է, հուսով եմ այս գործն արդարացի հանգուցալուծում կստանա»,-ասաց մեզ ահազանգած քաղաքացին։

Աղբյուր` Փաստինֆո