Փաստ ինֆո

Երևանի ավագանու «Մայր Հայաստան» խմբակցության անդամ Նարինե Հայրապետյանի՝ մանդատից հրաժարվելու հարցը չի քննարկվել։ Այս մասին «Փաստինֆո»-ի հետ զրույցում ասաց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը։

Հիշեցնենք, որ հունվարի 17-ին Հայրապետյանը դիմել էր ոստիկանության Նոր Նորքի բաժին և հայտնել, որ հունվարի 15-ին՝ ժամը 09։30-ի սահմաններում, Թոթովենց փողոցից անհայտ անձինք ստիպողաբար իրեն նստեցրել են անհայտ մակնիշի ավտոմեքենա, փակել աչքերը, ապա տեղափոխել իրեն անծանոթ անհայտ վայր, որտեղ հանդիպել է 60-65 տարեկան տղամարդու հետ։ Վերջինս քաղաքական գործունեությամբ պայմանավորված զրույց է ունեցել իր հետ, ինչից հետո նույն անձինք նույն ձևով նրան հետ են տարել Աբովյան փողոց, իջեցրել մեքենայից և հեռացել։

Հայրապետյանի հաղորդման հիմա վրա նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 5-րդ կետով՝ մի խումբ անձանց կողմից առևանգման հատկանիշներով։

Իրավապահներին դիմելուց հետո Նարինե Հայրապետյանը լքել է Հայաստանը և, ըստ «Մայր Հայաստան» դաշինքի տարածած հաղորդագրության, նրա նկամամբ ճնշումներ են բանեցրել ոստիկանությունում՝ ստիպելով հրաժարվել ցուցմունքից և նոր ցուցմունք տալ։ Ոստիկանությունից դուրս գալուց հետո էլ նա հեռացել է երկրից։

Հարուցված քրեական գործի շրջանակներում Հայրապետյանը տուժող է ճանաչվել։ Ավելի ուշխ հայտնի դարձավ, որ նա քաղաքական ապաստան է խնդրել ՌԴ-ից։ Այդ մասին հայտնել է ինքը՝ Ն.Հայրապետյանը՝ նշելով, որ ոստիկանությունում իրեն ստիպել են ցուցմունքներ տալ ավագ եւ կրտսեր Քոչարյանների, Անդրանիկ Թևանյանի դեմ։

Թեև Հայրապետյանն արդեն ՌԴ-ից քաղաքական ապաստան է հայցել, նրա՝ որպես ավագանու անդամի լիազորությունների դադարեցման, մանդատից հրաժարվելու հարցը չի քննարկվել։

«Առ այս պահն այդ հեռանկարի հետ կապված քննարկումներ չեն եղել։ Մեզ համար առավել առաջնային է՝ իրավական տիրույթում Նարինե Հայրապետյանի վերաբերյալ հետագա զարգացումները»,- նշեց Մանուկ Սուքիասյանը։

Իսկ թե ինչու են թիրապավորել հենց Հայրապետյանին, արդյո՞ք նա առավել շատ է քննադատում իշխանություններին՝ Սուքիասյանը նշեց, որ հենց այդ հարցերի պատասխանը ստանալու ակնկալիքով է, որ այս գործընթացին հրապարակային բնույթ է հաղորդվել և եթե իրավապահներն ասելիք ունեն, գնդակն իրենց դաշտում է։

«Անշուշտ մեզ համար խիստ մտահոգիչ է և ակնկալում ենք, որ սեղմ ժամկետներում իրավիճակը կհստակեցվի»,- նշեց նա։

Նրա խոսքով՝ակնհայտ է, որ վերջին շրջանում Հայրապետյանն աչքի է ընկել սուր գործունեությամբ և իր սուր գործունեության թիրախներից որ մեկն է ինչ որ բան նախաձեռնել՝ իրենց լիազորությունները սահմանափակ են, ուստի, վերստին կոչ են անում իրավապահներին՝ պատշաճ կերպով անդրադառնալ եղելությանը և պարզաբանումներ ներկայացնել։ Մանուկ Սուքիասյանը և խմբակցության մյուս անդամները դեռ չեն հարցաքննվել։

Ի․ Ս․

Աղբյուր` Փաստինֆո