Փաստ ինֆո

2023 թ. հունվար-դեկտեմբերին առաջին 1000 խոշոր հարկ վճարողների կողմից պետական բյուջե ընդհանուր առմամբ վճարվել է ավելի քան 1 տրիլիոն 710 միլիարդ 577 միլիոն դրամ:

Հիշեցնենք, որ 2022թ. հունվար-դեկտեմբեր ամիսների 1000 խոշոր հարկատուները պետական բյուջե ընդհանուր առմամբ վճարել էին ավելի քան 1 տրիլիոն 490 միլիարդ 115 միլիոն դրամ:

«Փաստինֆոն» ներկայացնում է նախորդ տարվա համեմատ առաջին տասը հարկատուների ցանկում արձանագրված ուշագրավ փոփոխությունները։

Թեև ինչպես 2022 թ-ին, այնպես էլ 2023-ին ցուցակը գլխավորում է «Զանգեզուրի պղնձամոլիբդենային» կոմբինատը, սակայն հատկանշական է, որ կոմբինատի հարկային մուտքերը ավելի քան կիսով չափ կրճատվել են։ Մասնավորապես, եթե 2022 թ-ին կոմբինատը վճարել էր 143 մլրդ 933 մլն 308 հազար դրամ, ապա 2023թ. մուտքերը կազմել են միայն 70 մլրդ 881 մլն 967 հազար դրամ։

Երկրորդ խոշոր հարկատուն «Գրանդ տոբակոն» է, որը վճարել է 55 մլրդ 286 մլն 733 հազար դրամ։ Այս ընկերությունը 2022թ-ին վճարած 45 մլրդ 36 մլն 635 հազար դրամով երրորդ հորիզոնականում էր։

Երրորդ հորիզոնականում «Գազպրոմ Արմենիան» է՝ պետական բյուջե վճարած 48 մլրդ 556 մլն 402 հազար դրամով, նախորդ տարի այս ընկերության հարկային մուտքերը ևս նվազել են։ 2022 թ-ին վճարած 52 մլրդ 275 մլն 253 հազար դրամ հարկային մուտքերով «Գազպրոմ Արմենիան» ցուցակի երկրորդ հորիզոնականում էր։

Չորրորդ խոշոր հարկատուն «Մոբայլ Սենթր ԱՐԹ» ընկերությունն է՝ վճարած 46 մլրդ 110 մլն 821 հազար դրամի հարկով։ Այս ընկերությունը 2022 թ.-ին 7-րդ հորիզոնականում էր՝ վճարելով 17 մլրդ 569 մլն 460 հազար դրամի հարկ։

Հինգերորդ հորիզոնականում է հայտնվել «Փրիթի ուեյ» ընկերությունը՝ վճարելով 33 մլրդ 290 մլն 548 հազար դրամի հարկ, այս ընկերութունը 2022թ-ին միայն 22-րդ հորիզոնականում էր վճարած՝ 8 մլրդ 520 մլն 349 հազար դրամ հարկային մուտքերով։ Այս առաջխաղացումը, սակայն ամենապտավորիչը չէ։

2023 թ-ին 6-րդ հորիզոնականում է հայտնվել Wildberries ընկերությունը, որը դեկտեմբերի 31-ի դրությամբ բյուջե է վճարել 26 մլրդ 492 մլն 650 հազար դրամ։ Հատկանշական է, որ 2022 թ-ին այս ընկերությունը 1000 խոշոր հարկատուների ցանկում միայն 346-րդն էր՝ վճարած 761 մլն 670 հազար դրամ մուտքերով։

7-րդ հորիզոնականում «Ամերիաբանկն» է՝ վճարած 25 մլրդ 718 մլն 834 հազար դրամով։ 2022 թ-ին «Ամերիաբանկը» զբաղեցնում էր 24-րդ հորիզոնականը 8 մլրդ 182 մլն 257 հազար դրամի հարկ վճարելով։

8-րդն էլ «Արդշինբանկն» է՝ վճարած 24 մլրդ 866 մլն 641 հազար դրամով, որը 2022-ին վճարել էր միայն 7 մլրդ 323 մլն 774 հազար դրամ և խոշոր հարկատուների ցանկում 29-րդ հորիզոնականում էր։

«Սի Փի Էս Էներջի գրուպ» ընկերությունը պահպանել է իր 9-րդ հորիզոնականը։ Ընկերությունը 2023թ. վճարել է 23 մլրդ 705 մլն 43 հազար դրամ, իսկ 2022թվականին՝ 16 մլրդ 987 մլն 68 հազար դրամ։

Խոշոր հարկատուների տասնյակը եզրափակում է «Ջեյ Թի Այ Արմենիա» ընկերությունը՝ վճարած 22 մլրդ 695 մլն 807 հազար դրամ հարկային մուտքերով։ Այս ընկերությունը 2022 թ-ին 8-րդն էր՝ 16 մլրդ 993 մլն 222 հազար դրամ հարկային մուտքերով։

Նշենք նաև, որ առաջին տասնյակից դուրս են մնացել «Ինտերնեյշնլ Մասիս տոբակը», Ագարակի պղնձամոլիբդենային կոմբինատը, «Ֆիլիպ Մորիս Արմենիան» «ՄՏՍ Հայաստան» ընկերությունները։

Աղբյուր` Փաստինֆո