Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, շարունակվում է Ազատ գյուղի զորամասի զինվորական կացարանում 15 զինծառայողի կյանք խլած հրդեհի գործով դատական նիստը։

Այսօրվա նիստում շարունակվեց տուժող Լևոն Խառատյանի հարցաքննությունը՝ բավականին լարված մթնոլորտում, ինչով պայմանավորված դատական նիստը, պարբերաբար, ընդմիջվում է։ Խնդիրն այն է, որ Խառատյանը հնչող հարցադրումներին ի պատասխան հիմնականում նշում է, որ չի հիշում, ինչն էլ զայրացնում է զոհված զինծառայողների ծնողներին։

«Որ պահին հիշողությունդ տեղը եկավ, ոչխարի պես վիզդ կտրելու եմ»,- ասաց ծնողներից մեկը, ինչին արձագանքելով էլ տուժողը նշեց․

«Արա, շատ ես խոսում»։

Նկատենք՝ Լևոն Խառատյանն այն զինծառայողն է, որը, իր պնդմամբ, փորձել է բաճկոնով հանգցնել բռնկված հրդեհը, ինչպես նաև՝ փորձել է Եղիշե Հակոբյանի հետ բղավելով արթնացնել սենյակում քնած զինծառայողներին։ Ծնողները, սակայն, այդքան էլ արժանահավատ չեն համարում նրա պնդումները, պաշտպանության կողմը, ի դեպ, ևս։ Պաշտպաններից մեկը նկատեց, որ եթե նախաքննության ընթացքում տրվեր պատասխանը, թե ինչու է Խառատյանը գտնվել դրսում, գուցե և այժմ տուժողի կարգավիճակ չունենար։ Տուժողների ներկայացուցիչ Նորայր Նորիկյանն էլ նշեց Խառատյանի՝ նախաքննական ցուցմունքները հրապարակելու միջնորդություն ներկայացնելու ցանկության մասին, քանի որ, նրա պնդմամբ, էական հակասություններ կան։ Ցուցմունքում Լևոն Խառատյանը պատմել է, որ տուժող Գարուշին տեսել է հիվանդանոցում, ապա՝ հոսպիտալում և խոսել են առօրյա թեմաներից, նշում է՝ ոչ իրեն էր հաճելի այս թեմայով խոսելը, ոչ էլ՝ Գարուշին հաճելի կլիներ, իսկ թե արդյո՞ք Գարուշի հետ խոսել է Եղիշե Հակոբյանից՝ Խառատյանը չհիշեց։ Ի դեպ, պաշտպանության կողմը նաև կասկածներ ուներ՝ կապված Խառատյանի՝ վնասվածքներ ստանալու հանգամանքների հետ։ Մասնավորապես, անիրատեսական են համարել, որ Խառատյանն իր ծանր վնասվածքները ստանար այն ժամանակ, երբ հրդեհը նոր էր բռնկվել, ըստ նրա՝ դրանք ստացվել են այն ժամանակ, երբ կրակն արդեն թեժ էր և այդ պատճառով էլ Լևոն Խառատյանը չի կարողացել ննջարանի դուռը բացել։ Այս հարցը, սակայն, դատարանը հանեց։

Այսօր կայացած դատական նիստում հայտարարությամբ հանդես եկավ նաև տուժողների ներկայացուցիչ Նորայր Նորիկյանը՝ նշելով, որ ամբաստանյալներից Մառլեն Սարգսյանն իրեն այնպիսի տեղեկություններ է հայտնել, որոնք, եթե հիմնավորվեն, ապա սեղանի առջև դրված այդ 22 հատորանոց քրեական գործը պետք է պատռել և նետել աղբանոցը, որովհետև այն տեղեկությունները, որոնք իրեն հայտնվել են, իսկապես կարող են շրջադարձային և բեկումնային փոխել քրեական գործի ընթացքը։

Նրա խոսքով՝ զոհվածների ծնողների մոտ կա խորը անվստահություն պետական բոլոր ինստիտուտների նկատմամբ։
«Հայտնվել ենք մի իրավիճակում, որ ստացված տեղեկությունը համապատասխան վարույթային և ապացուցողական գործողություններ իրականացնելու համար, համապատասխան ընթացակարգեր իրականացնելու հետ կապված լուրջ մտավախություն ունեն ծնողները»,- նշեց նա։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո