Փաստ ինֆո

Հայաստանի իշխանություններն աջակցում են, որ Ադրբեջանն ամրապնդի Արցախում իրականացրած ոճրագործության հետևանքով ձեռք բերածը։ Այն, որ ի թիվս բազմաթիվ քայլերի՝ համաձայնել են նաև փոխել ՀՀ Սահմանադրությունը, կրճատել բանակը, հայ ժողովրդի գլխի տակ փափուկ բարձ դնել ու չնախապատրաստվել ինքնապաշտպանության, վերստին հաստատում են, որ Հայաստանի ներկայիս ղեկավարությունը համաձայնել է գործել թուրք-ադրբեջանական կոշտ թելադրանքի տակ։ «Փաստինֆո»-ի հետ զրույցում ասում է ռազմական պատմաբան Արմեն Այվազյանը՝ անդրադառնալով Արցախի ականապատ դաշտերի նոր քարտեզներն Ադրբեջանին հանձնելու՝ ՀՀ իշխանությունների պատրաստակամությանը։

«Ադրբեջանը հայ ժողովրդի նկատմամբ ակնհայտ ցեղասպանական պատերազմ է վարում․ հայաթափել է Արցախը, այնուհետև անցել մշակութային ցեղասպանությանը, շարունակում է Բաքվում պահել ու խոշտանգել հայ ռազմագերիներին․ կասկածներ կան, որ բազմաթիվ ռազմագերիներ սպանվել են։ Բացի այդ, գերության մեջ է պահում Արցախի ռազմաքաղաքական ղեկավարներին, իսկ Հայաստանի Հանրապետությունից շարունակելով բռնազավթած պահել 200 քառ․ կմ տարածք՝ պարբերաբար հայտարարում է, թե Հայաստանի Հանրապետությունը, իբր, Արևմտյան Ադրբեջան է։ Ադրբեջանը միջազգային իրավունքը կոպտորեն խախտել է ու շարունակում է խախտել, և այս պայմաներում եթե ՀՀ իշխանությունն ընդառաջում է իր դեմ ռազմական, հոգեբանական, դիվանագիտական, մշակութային պատերազմ մղող երկրին, ավելին՝ աջակցում ռազմական հարցերում, նշանակում է մեկ բան՝ ՀՀ իշխանությունը կապիտուլյացիայի է ենթարկվել, ուղղակի չի հայտարարում այդ մասին»,-ընդգծում է ռազմական պատմաբանը։

Ստեղծված իրավիճակում կարևորագույն խնդիրը, որը պետք է լուծի ՀՀ ղեկավարությունը, Այվազյանի դիտարկմամբ, հայ ժողովրդին համախմբելն ու ինքնապաշտպանությանը պատրաստելը պետք է լինի, քանի որ ամեն պահի գտնվում ենք խոշորածավալ հարձակման ենթարկվելու վտանգի տակ։

«Մեր ամենաառաջնային անելիքը հիմա ինքնապաշտպանության պատրաստվելն է, այլապես շատ արագ ՀՀ-ի հետ տեղի է ունենալու այն, ինչ եղավ Արցախի հետ։ Այսինքն՝ կարճ ժամանակում Հայաստանն ամբողջությամբ զավթելու է թուրք-ադրբեջանական տանդեմն, ու բոլորս գաղթական ենք դառնալու։ Եթե արցախցիները գոնե Հայաստան ունեին, եկան այստեղ, այդ դեպքում արդեն ոչ մեկս գնալու տեղ չենք ունենալու։ Դա կանխելու համար էդ մարդը (նկատի ունի Փաշինյանին,-խմբ․) փոխանակ ժողովրդին արագ համախմբի, զինի, պատրաստի ինքնապաշտպանության, ռազմական դաշինքներ կնքի ՀՀ պահպանմամբ շահագրգիռ երկրների՝ առաջնահերթ Իրանի ու Հնդկաստանի հետ, համագործակցում է թշնամու հետ։ Սա կոչվում է կոլլաբորացիոնիզմ»,-ասում է ռազմական պատմաբանը։

ՀՀ ներկա իշխանության գործելաոճը՝ ներառյալ տարբեր երկրներում ու տարբեր դերակատարների ներգրավվածությամբ բանակցություններ վարելու հակումը, մեր զրուցակցի համոզմամբ, անօգուտ զբաղմունք է և դրանում բազմիցս համոզվել ենք․

«3-4 տարի բանակցեցին ու Արցախը հայաթափեցին։ Հիմա էլ շարունակում են նույն գործելաոճը։ Հայաստանի Հանրապետության սահմանամերձ դարձած բազմաթիվ բնակավայրեր գրեթե դատարկվել են։ Այս իրավիճակում, երբ իշխանությունը համագործակցում է թշնամու հետ, գոնե ընդդիմությունը պետք է ակտիվ աշխատի ժողովրդի հետ։ Ցավոք, ինչպես տեսնում ենք, նրանք անկեղծորեն որևէ ցանկություն չունեն ինչ-որ հարց լուծելու։ Ինչպես Արցախի ղեկավարությունն էական ոչինչ չարեց աղետը կանխելու համար, ազգ-բանակ կառուցելու ուղղությամբ քայլ չարեց, այնպես էլ հիմա այստեղ՝ ՀՀ-ում, ընդդիմությունը ոչինչ չի անում, բացարձակապես ոչինչ»,-նկատում է Այվազյանն ու հավելում՝ արդյունքում ստացվում է, որ համագործակցում է իշխանության հետ։

Աղբյուր` Փաստինֆո