Փաստ ինֆո

Վերջին շրջանում ԵԽԽՎ-ն զեկույցներ էր հրապարակել, ավելին՝ նախկին նստաշրջաններում Հայաստան-Ադրբեջան հարցերով համազեկուցողները բավական կոշտ հայտարարություններով հանդես եկան նույն Լեռնային Ղարաբաղի հարցի շուրջ, նրանց հատկապես նյարդայնացնում էր այն հանգամանքը, որ Ադրբեջանը դեռ մինչև սեպտեմբերի 19-ի դեպքերը թույլ չէր տալիս համազեկուցողներին մտնել Լեռնային Ղարաբաղի տարածք՝ խնդիրներն ու իրավիճակը հասկանալու համար։ Այս մասին «Փաստինֆոյի» հետ զրույցում ասաց ադրբեջանագետ Տաթևիկ Հայրապետյանն անդրադառնալով ադրբեջանական պատվիրակության լիազորությունները չհաստատելու ԵԽԽՎ-ի որոշմանը։

Նրա դիտարկմամբ՝ Ադրբեջանի այդ քայլերը եղել են նպատակային։ «Բլոկադայի կարևոր խնդիրներից մեկն էլ այն էր, որ արցախահայերի կապը կտրվի արտաքին աշխարհից, որպեսզի բոլոր հաջորդ հանցավոր, ցավոտ գործողությունները առանց հստակ վավերագրումների մնային»,- նշել է ադրբեջանագետը։

Անդրադառնալով Ադրբեջանի՝ Եվրախորհրդից դուրս գալու հավանականությանը՝ Հայրապետյանը հիշեցրեց, որ Ադրբեջանի ղեկավարը բավական անհարգալի ու վիրավորական արտահայտություններ էր իրեն թույլ տալիս եվրոպացի պաշտոնյաների հասցեին։

«Մասնավորապես, ավելի շատ թիրախավորում էր Եվրոախորհրդարանը, ու անգամ մի արտահայտություն ունի իր դեկտեմբերի 6-ի հայտարարության մեջ, որտեղ նրանց կոչում է մոլագարներ։ Այսինքն, ասում էր, որ այնտեղ մոլագար պաշտոնյաներ կան»,- արձանագրեց Տաթեւիկ Հայրապետյանը։

Ըստ նրա՝ ԵԽԽՎ-ի քայլը խորհրդանշական է՝ ցույց տալու Ադրբեջանին, որ ամեն բան անպատիժ չի կարող անցնել։ «Ընդհանուր առմամբ, աշխարհն այսօր բավական բարդ իրավիճակում է առ այն, որ փորձում են միջազգային իրավունքից իրենց դուրս դնել, եւ եթե որևէ կանխարգելիչ քայլ չարվի՝ դա տարածվելու է նաև մյուսների վրա և այդ իրավիճակը դառնալու է քաոտիկ և անկառավարելի»։

Հարցին՝ արդյո՞ք ուշացած չէր ԵԽԽՎ-ի այս քայլը, ադրբեջանագետը նշեց, որ եթե անգամ ուշացած է, ապա դա գալիս է Հայաստանի որդեգրած քաղաքականությունից։
«Եթե Հայաստանն իրեն այլ կերպ պահեր ու այլ աշխատելաոճ որդեգրեր, ապա ամեն բան այլ կերպ կարող էր լինել»,- նշեց մեր զրուցակիցը։

Նրա խոսքերով՝ Ադրբեջանը նաև կարող է հրաժարվել Մարդու իրավունքների եվրոպական դատարանի իրավասության ճանաչումից, իսկ նման քայլը կնշանակի, որ Ադրբեջանն իրեն դուրս է դնում միջազգային իրավունքից։

Փորձագետը համոզված է՝ եթե ՀՀ իշխանություններն աշխատեին հանուն ՀՀ պետական շահի՝ Ադրբեջանի պահանջները կատարելու փոխարեն, ապա շատ աղետներ հնարավոր կլիներ կանխել։

«Մինչդեռ, ՀՀ ներկայիս իշխանությունները դարձել են Ադրբեջանի պահանջների կատարող և սպասարկու։ Արդեն այսօր Բաքուն է որոշում, թե մեր հիմնարար փաստաթղթերը ինչպես պետք է փոփոխվեն, որ իրենց ավելի հարմար լինի։ Այդ օրակարգը իշխանությունները մտցնում են հայկական տեղեկատվական տիրույթ ու քննարկումներ բացում դրա շուրջ։ Խնդիրն այն է, որ Ադրբեջանը մեր պետությունը կոչում է Արևմտյան Ադրբեջան, իսկ Հայաստանի իշխանություններն անգամ վախենում են Արցախ բառը կիրառել։ Խնդիրները շատ ու, ցավոք, շատ խորհրդարաններում քննարկումները, որ ծավալվում են Արցախի շուրջ՝ շատ ավելի արդար են ու բխում են իրավունքներից ու միջազգային իրավունքից, քան այն ինչ ծավալվում է ՀՀ Ազգային Ժողովում»,- արձանագրել է ՀՀ ԱԺ պատգամավորն ու ավելացրել. «Եթե ՀՀ Ազգային Ժողովի խոսնակը հայտարարում է, որ Արցախի հարցը փակված է, ապա ի՞նչ կարելի է ակնկալել այդ խորհրդարանից»։

Նրա փոխանցմամբ՝ այլ երկրների խորհրդարանների, օրինակ, Ֆրանսիայի սենատի հայտարարությունը բոլորովին այլ տրամաբանության մեջ էր։ «Մենք ուզում ենք, որ այլ երկրները մեր շահերն ավելի՞ շատ պաշտպանեն, այն դեպքում, երբ ՀՀ ղեկավարը ավելի շատ դարձել է Ադրբեջանի շահերի սպասարկու։ Այդպես չի լինում»,- եզրափակել է ադրբեջանագետը։

Աղբյուր` Փաստինֆո