Փաստ ինֆո

Երևանի ավագանու «Մայր Հայաստան» խմբակցության անդամ Նարինե Հայրապետյանի նկատմամբ ոստիկանական բաժանմունքում ճնշումների մասին հայտարարությունները քննության առարկա կդարձվեն՝ քննվող քրեական վարույթի շրջանակներում։ ՀՀ գլխավոր դատախազությունից, արձագանքելով հարցադրմանը, թե արդյո՞ք քննության առարկա դարձվում են ոստիկանությունում Հայրապետյանի նկատմամբ ճնշումների մասին հայտարարությունները, «Փաստինֆո»-ի հետ զրույցում հայտնեցին․ «քրեական վարույթով քննության առարկա են բոլոր հանգամանքները»:

Հիշեցնենք, որ հունվարի 17-ին Հայրապետյանը դիմել էր ոստիկանության Նոր Նորքի բաժին և հայտնել, որ հունվարի 15-ին՝ ժամը 09։30-ի սահմաններում, Թոթովենց փողոցից անհայտ անձինք ստիպողաբար իրեն նստեցրել են անհայտ մակնիշի ավտոմեքենա, փակել աչքերը, ապա տեղափոխել իրեն անծանոթ անհայտ վայր, որտեղ հանդիպել է 60-65 տարեկան տղամարդու հետ։

Այդ տղամարդը քաղաքական գործունեությամբ պայմանավորված զրույց է ունեցել իր հետ, ինչից հետո նույն անձինք նույն ձևով նրան հետ են տարել Աբովյան փողոց, իջեցրել մեքենայից և հեռացել։

Հայրապետյանի հաղորդման հիմա վրա նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 5-րդ կետով՝ մի խումբ անձանց կողմից առևանգման հատկանիշներով։ Ոստիկանությունում հարցաքննությունից հետո Նարինե Հայրապետյանը լքել է Հայաստանը։ Հունվարի 25-ին տարածած տեսաուղերձով Ն. Հայրապետյանը նշել է, որ ոստիկանությունում իր նկատմամբ ճնշումներ են գործադրվել, որոնց հետեւանքով ցուցմունքը փոխել է ու պնդել, որ արժանահավատ է իր առաջին ցուցմունքը։ Նա նշել է, որ իր կյանքին վտանգ էր սպառնում եւ Հայաստանից իր հեռանալն անհրաժեշտություն էր, արդեն դիմել է երրորդ երկրին՝ քաղաքական ապաստան ստանալու խնդրանքով։

Աղբյուր` Փաստինֆո