Փաստ ինֆո

ՀՀ ԶՈՒ ԳՇ պետի նախկին տեղակալ, գեներալ-լեյնետանտ Տիրան Խաչատրյանի կալանավորման որոշման դեմ բողոք է ներկայացվել։ Այս մասին «Փաստինֆո»-ի հետ զրույցում ասաց պաշտպան Վարազդատ Հարությունյանը։

Հիշեցնենք, որ հունվարի 11-ի ուշ երեկոյան Արամուս գյուղում գործող հացատանը տեղի ունեցած զենքի գործադրմամբ միջադեպի առթիվ քննվող քրեական վարույթի շրջանակներում, ի սկզբանե, ձերբակալվել էր 5 անձանց, սակայն նրանցից մեկին նախաքննական մարմինն ավելի ուշ ազատեց արգելանքից ու քրեական հետապնդում հարուցեց միայն 4-ի նկատմամբ, որոնցից էլ միայն երկուսի նկատմամբ կալանավորումը որպես խափանման միջոց կիրառելու մասին միջնորդություն ներկայացվեց, նրանց թվում է Տիրան Խաչատրյանը։ Մյուս երկու մեղադրյալների նկատմամբ ընտրվել է բացակայելու արգելք խափանման միջոցը և նրանք ազատ են արձակվել։

Տիրան Խաչատրյանին կալանավորելու որոշման դեմ պաշտպանության կողմը բողոք է ներկայացրել՝ վիճարկելով ինչպես հիմնավոր կասկածի, այնպես էլ՝ կալանավորման հիմքերի առկայության հարցը։ Փաստաբան Վարազդատ Հարությունյանը պնդում է՝ փաստական հանգամանքներն արարքի իրավական որակման հետ բացարձակ չեն համապատասխանում, Խաչատրյանին մեղսագրված՝ խուլիգանական նկատառումներով զենքի գործադրման վերաբերյալ արժանահավատ որևէ ապացույց չի ներկայացվել։ Կալանավորման հիմքերը, պաշտպանության կողմի պնդմամբ, ևս առկա չեն։ Մասնավորապես, դատարանը հաստատված է համարել իբրև փախուստի և գործի քննությանը խոչընդոտելու հավանականությունը, մինչդեռ, պաշտպան Վարազդատ Հարությունյանը պնդում է՝ գործով ապացուցված է, որ մինչև Տիրան Խաչատրյանի ձերբակալությունը ինքը գտնվել է Խաչատրյանի հետ՝ վերջինիս հրավերով, պատրաստվում էին միասին ներկայանալ ոստիկանություն, բացի այդ, հյուրանոցում կամ որևէ այլ վայրում լինելը չի կարող հիմնավորվել որպես փախուստի կամ թաքնվելու դրսևորում, ավելին, Տիրան Խաչատրյանի հեռախոսն անգամ անջատված չի եղել, որ իրեն չկարողանան հայտնաբերել։ Այս հանգամանքները, սակայն, հաշվի չեն առնվել դատարանի կողմից, փոխարենը՝ հաշվի է առնվել ընդամենը քննիչի ենթադրական կանխատեսումները։ Խոչընդոտման հավանականության վերաբերյալ, փաստաբանի խոսքով, առհասարակ որևէ փաստական հանգամանք չկա, ոչ միայն չի խոչընդոտել, այլև՝ օժանդակել է քննությանը, իսկ Տիրան Խաչատրյանի հեղինակությունը չի կարող մեկնաբանվել որպես խոչընդոտման հավանականության հիմքում ընկած փաստական հանգամանք։ Ավելին, խափանման միջոցի հարցի քննարկման ժամանակ պաշտպանության կողմը միջնորդել էր տնային կալանք կիրառել Խաչատրյանի նկատմամբ, քննիչը նշել է, որ դա զսպում է փախուստի հավանականությունը, բայց ոչ՝ խոչընդոտման հավանականությունը, մինչդեռ, քննիչը չի միջնորդել սահմանափակումներ մտցնել Տիրան Խաչատրյանի տեսակցությունների, հեռախոսազանգերի նկատմամբ, դատարանն էլ՝ նման սահմանափակումներ չի կիրառել, այժմ շփումների հնարավարությունը կա, հետևաբար, Տիրան Խաչատրյանի կալանավորումն ինքնանպատակ է, միջնորդություն ներկայացրած սուբյեկտի հայտարարված նպատակներին չի համապատասխանում։ Վարազդատ Հարությունյանի խոսքով՝ որքան էլ Տիրան Խաչատրյանի մասնակցությամբ միջադեպը քաղաքական չէ, բայց նրա նկատմամբ իրականացվող հետապնդումը և հետապնդման նպատակը քաղաքական է։ Ըստ պաշտպանի՝ Տիրան Խաչատրյանի կալանավորումը քաղաքական իշխանությունների հասցեին նրա խիստ և պարբերական քննադատությունների համար նրան պատժելու թաքնված շարժառիթ ունի։

Խաչատրյանի նկատմամբ նշանակված դատաբժշկական փորձաքննության եզրակացություն դեռևս չի ստացվել, Տիրան Խաչատրյանի մասնակցությամբ որևէ գործողություն չի իրականացվել, փաստաբանի համոզմամբ՝ գործով անցնող որևէ անձի մասնակցությամբ որևէ վարութային գործողություններ չի իրականացվել։ Ավելին, դատախազություն բողոքարկվել է նաև վարույթն իրականացնող մարմնի կողմից իրականացված գործողությունների, ինչպես նաև՝ անգործությունը, այս մասին, սակայն, պաշտպանության կողմն ավելի ուշ կմանրամասնի։

Հեղինակ՝ Իզաբել Սահակյան

Աղբյուր` Փաստինֆո