Փաստ ինֆո

Արցախի վրա ահաբեկչական Ադրբեջան պետության վերջին հարձակման ժամանակ՝ 2023թ․ սեպտեմբերի 19-ին, Կոհակ կոչվող տեղամասում զոհվում է պաշտպանության բանակի ավագ լեյտենանտ Սևակ Գրիգորյանը։

42-ամյա Սևակը կյանքի ուղիղ կեսը՝ 21 տարի, ծառայել է Արցախի պաշտպանության բանակում։ Բազմաթիվ սխրագործություններով աչքի է ընկել 4-օրյա, 44-օրյա պատերազմների ընթացքում։ 2023թ․ սեպտեմբերի 19-ի պատերազմը վերջին եղավ Սևակի համար․ N32 մարտական դիրքում, որտեղ 2020թ․ նոյեմբերի 8-ին վիրավորվել էր, սեպտեմբերի 19-ին արիաբար զոհվում է․․․

«Տեսախցիկները ֆիքսել են մարտը․․․ Այդտեղ էլ է երևում, թե ոնց են կռվում․․․ 7-10 հոգով թշնամու հարյուրավոր զինվորների դեմ են կռվում։ Էդ դիրքը Կոհակ սարի առջևի բարձունքում էր, որը 2020թ․ ադրբեջանցիները վերցրել էին։ Մեր շենքից՝ Մարտունուց, որ նայում էինք, Կոհակը երևում էր, շատ մոտ էր քաղաքին։ Կռիվը որ սկսվել է, Սևակը երկրորդ գծում է եղել, բայց ասել են N32 դիրքն օգնություն է ուզում, եւ մի քանի հոգով բարձրացել են։ Այդ ժամանակ Մարտունու քաղաքապետը՝ Ազնավուրն էլ է օգնության գնացել դիրքը պահողներին։ Գնացածներից հինգը զոհվել են, երկուսն են ողջ մնացել»,- «Փաստինֆո»-ին պատմում է Սևակի կինը՝ Վիկտորիան։

13։10 որ Մարտունու վրա խփում են, Վիկտորիան երեք երեխաների հետ իջնում է նկուղ, երկու ժամից արդեն Սևակի հետ կապ հաստատել չի ստացվում։ Ամուսնու զոհվելու մասին իմանում է հաջորդ օրը՝ սեպտեմբերի 20-ի առավոտյան․

Ամսի 20-ին ժամը 7։30 են ասել, որ Սևակը չկա․․․ Մի ամբողջ օր ավագ որդուցս էլ լուր չունեի, ինքն էլ Ստեփանակերտում էր այդ ժամանակ։ Ես՝ երեխաների հետ դիմացի շենքի նկուղում եմ եղել մինչև հաջորդ օրը։ Ամսի 22-ինՍևակին Գիշիում՝ իր հայրական գյուղում հուղարկավորել ենք, դրանից հետո է միայն պարզ է դարձել, որ դուրս պիտի գանք Արցախից։ Անգամ 44-օրյա պատերազմի ժամանակ որ վիրավորվել է Սևակը ու տեղափոխել էին Երևան, ոչ մի օր Արցախից դուրս չենք ապրել։ Ամսի 25-ին որ դուրս է գրվել հիվանդանոցից, անմիաջպես հետ ենք գնացել Արցախ, մի օր էլ էստեղ չենք մնացել․․․»,-ասում է Սևակի այրին։

Սևակ Գրիգորյանն անբասիր ծառայության համար տասնյակ պատվոգրեր է ստացել, խրախուսանքների արժանացել, 44-օրյայում Արիության մեդալ ստացել և այլն։

Մինչև այժմ, ցավոք, Սևակի մարմինը Հայաստան տեղափոխել ու Եռաբլուրում վերահուղարկավորել չի հաջողվել։ Կնոջ պատմելով՝ Կրամիր խաչին դիմել են, բայց դեռ սպասում են․․․

Արցախի պաշպանության ժամանակ զոհված Սևակի այրին ու չորս անչափահաս երեխաներն այժմ ապրում են Երևանում վարձակալած մեկ սենյականոց բնակարանում։ Վիկտորիան, բնականաբար, ոչ հոգեպես, ոչ էլ ֆիզիկապես աշխատել դեռևս չի կարող․․․

Աղբյուր` Փաստինֆո