Փաստ ինֆո

Նիկոլ Փաշինյանը պատահական ոչինչ չի անում։ Նա հերթով կատարում է այն բոլոր պահանջները, որոնք անգլոսաքսոնները և թուրքերը դնում են իր առաջ, իսկ Մեղրիի ենթակառուցվածքների թուլացումը և ոչնչացումը իր քաղաքականության մասն է կազմում։ Այս մասին «Փաստինֆոյի» հետ զրույցում ասաց պահեստազորի գնդապեռ Վոլոդյա Հովհաննիսյանը։

«Վերջերս եմ խոսել Մեղրիի ընկերներիս հետ, ասում են՝ ոչ հիվանդանոցն է գործում, ոչ էլ զինկոմիսարիատը»։

Դիտարկմանը, թե նախարարությունից հայտնում են միան դիահերձարանի փակման մասին, որի փոխարեն նորն է կառուցվելու՝ Հովհաննիսյանն ասաց, որ ոչ միայն դիահերձարաններ է փակվել, այլեւ հիվանդանոցը, որը կառուցվել էր 2010 թ-ին։
«Մեղրին հիանալի տիպային հիվանդանոց ունի, շատ գեղեցիկ շենք է, որտեղ անգամ Իրանից էին մարդիկ գալիս վիրահատվելու։ Այն մոտավորապես 100 աշխատակից ուներ։

Հիմա պատկերացրեք, որ Մեղրիում մարդ է մահացել և դեպի Կապան տանող ճանապարհը փակվել է, ի՞նչ պետք է լինի այդ դիակի ու նրա հարազատների հետ»,- նշեց պահեստազորի գնդապետը՝ տեղեկացնելով, որ զրույցի պահին գտնվում է Սիսիանում, որտեղ նույնպես դիահերձարան չկա։

«Անհրաժեշտության դեպքում օգտվում են Կապանի դիահերձարանից, որտեղ 60 000 դրամ գումար պետք է վճարել, այն դեպքում, երբ 2018 թ-ին դիահերձարանի վճարումները 15 000 դրամ էր»,- հայտնեց Վլ.Հովհաննիսյանը։

Նրա խոսքերով՝ Մեղրիում մարդ մահանելու դեպքում, նրան պետք է Քաջարանի ոլորաններով տեղափոխեն Կապան, մինչդեռ, օրինակ, այս սեզոնին այդ ճանապարհը կարող է մի քանի օր փակվել։ Մահացածին տեղափոխելու համար սովորական պայմաններում մեքենային ծախսը կազմում է 20 000 դրամ, մինչդեռ, այս դեպքում լրացուցիչ 40 000 դրամ մեղրեցին պետք է ավելի վճարի, որ հասցնեն Կապան, ապա հետ բերեն։

Բացի այդ՝ Մեղրիի դիահերձարանում 5-6 աշխատող է եղել, հիմա այդ մարդիկ ի՞նչ են անելու, որտե՞ղ են աշխատելու։
Հովհաննսյանը նաև նշեց, որ Մեղրիում փակվել է ոչ միայն զինվորական լվացքատունը, այլև զինկոմիսարիատը, որտեղ աշխատում էր 10 մարդ։

«Ինչ վերաբերում է մաքսակետին, որ հայտարարում են, թե իրենք կառուցում են, իրականում այն կառուցում են իրանցիները։ Մեղրեցի ընկերս պատմում էր, որ շուտով Մեղրիում այլևս ոչինչ չի գործելու։ Միայն 2023 թվականին Մեղրիում փակվել է 122 աշխատատեղ։ Ես հիմա Սիսիանում եմ, որտեղ բնակչությունը ևս օրեցօր պակասում է, պատկերացրեք, այս ամենից հետո Մեղրին ինչ արագությամբ կդատարկվի։

Այդքան ընտանիք պետք է տեղափոխվի Մեղրիից՝ կեցության հարցերը լուծելու համար։ Ես վստահ եմ, որ Մեղրին միտումնավոր են դատարկում։ Եթե որևէ տեղ ուզում են քայքայել, առաջինը փակում են հենց պետական կառույցները»,- մտահոգված ասաց Վլ.Հովհաննիսյանը։

Նրա կարծիքով՝ այս գործընթացը ճանապարհ տալու հետ ոչ մի կապ չունի։

«Պարզապես հիմա Մեղրին պետք է կտրվի ՀՀ-ից և դառնա բուֆերային գոտի՝ թուրքերի համարի։ Սա այն է, ինչ մասին խոսում էր Ալիևն՝ իր վերջին հարցազրույցի ժամանակ»,- եզրափակել է պահեստազորի գնդապետը։

Աղբյուր` Փաստինֆո