Փաստ ինֆո

Չորս տարի տևած նախաքննության ընթացքում գործով զբաղվել են տարբեր քննչական մարմիններ, ՀՔԾ-ն և ԱԱԾ-ն չեն հանդգնել մտնել այս կեղտոտ գործարքի մեջ, բայց ՔԿ-ն մտել է։ Ավելին, ՔԿ քննչական խմբի ղեկավարը որպես տուժող է ճանաչել Գալինա Հարությունյանին, ուղարկել Ձեզ, որ Դուք փորձեք այս շիլայի տակից դուրս գալ։ Նորմալ երկրում դա տեղի չէր ունենա, նորմալ երկրում քննչական խմբի նման ղեկավարը պետք է ազատվեր պաշտոնից, մեր երկրում՝ համապատասխան քննիչը՝ Տիգրան Շոխոյանը, առաջխաղացում է ստացել։ Ինչու՞ է առաջխաղացում ունեցել, թե որ լավ է սարքել գործը, թե որ սարքել և ուղարկել է Ձեզ։ Ընդամենը պետք էր պարզել, որ Գալինա Հարությունյանը տուժող չէ, ԵՊԲՀ արհեստակցական կազմակերպությունն էլ՝ լուծարված է։ Այս մասին դատական նիստում հայտարարեց ՀՀԿ փոխնախագահ Արմեն Աշոտյանը։

«Գործը սարքելու համար մարդիկ խրախուսվել են, որովհետև պատվերը եղել է վերևից»,- հայտարարեց Աշոտյանը։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր շարունակվել է ՀՀԿ փոխնախագահ Արմեն Աշոտյանի և մյուսների գործով դատական նիստը։ Այսօրվա նիստում ևս քննարկման առարկա դարձվեց գործով որպես տուժող անցնող կազմակերպության և այդ կազմակերպության ներկայացուցիչ Գալինա Հարությունյանի կարգավիճակի դադարեցման հարցը։ Պաշտպանության կողմը պնդում է, որ ԵՊԲՀ արհեստակցական կազմակերպությունը, որը սույն գործով որպես տուժող է ճանաչվել, վաղուց արդեն դադարել է գոյություն ունենալ, իսկ գոյություն չունեցող ընկերությունը չի կարող գործով տուժողի կարգավիճակ ունենալ, ըստ այդմ, տուժողի կարգավիճակը պետք է դադարեցվի։ Բացի այդ, որպես տուժողի լիազոր ներկայացուցիչ է ճանաչված Գալինա Հարությունյանը, որը հրաժարվել է տուժողի կարգավիճակից, քանի որ սույն գործով ենթադրաբար պատճառված վնասն իրեն վերաբերելի չէ, խնդրահարույց ժամանանակահատվածում նա այլևս կազմակերպության նախարարը չի եղել։ Դատարանն այսօրվա նիստում, ի վերջո, որոշեց դադարեցնել Գալինա Հարությունյանի կարգավիճակը՝ որպես տուժողի ներկայացուցիչ, սակայն կազմակերպության կարգավիճակը՝ որպես տուժող, դեռևս որոշեց չդադարեցնել, հարցը կրկին կքննարկվի դատավարության որոշակի փուլում՝ ապացույցների հետազոտման ընթացքում։

Արմեն Աշոտյանը դատական նիստում հայտարարեց, որ ոչ միայն նախաքննական մարմինը, այլև՝ այլ մարմիններ, որոնք կապ ունեն այս գործի հետ, քաղաքական հանձնարարական են կատարել։

Աշոտյանը մեջբերեց՝ իր նկատմամբ անձնական երաշխավորություն կիրառելու միջնորդությունը մերժելու մասին դատարանի որոշումից, համաձայն որի՝ դատավորը նշել է, թե այն, որ այդ 15 անձինք երաշխավորել են, ապացուցում է, որ Աշոտյանն ազդեցություն ունի, որը կարող է կիրառել․ «Այսինքն՝ այս որոշմամբ դատարանը 15-ից ավելի պատգամավորների, իմ գործընկերների դարձրել է «հանցագործ», թող պատգամավորներն արձագանքեն, թե որքանով են պատրաստ ծառայել որպես գործիք, հանցակից՝ իմ սև գործերի համար»։ Աշոտյանը նաև անդրադարձավ Դատական դեպարտամենտի «պարզաբանմանը», որի լիազորությունների մեջ, ըստ Աշոտյանի, մտնում է ամեն ինչ, բացի՝ այս գործով պարզաբանում տալը, իրեն իրավունք է վերապահել մեկնաբանելու, թե ինչու է Արմեն Աշոտյանի նկատմամբ որպես խափանման միջոց կիրառված կալանքը, ընդ որում, սա այն դեպքում, երբ դատարանի որոշումը դեռևս պաշտպանության կողմը չէր ստացել։ Պաշտպանության կողմը հաջորդ դատական նիստում դատավորին ինքնաբացարկի միջնորդություն կներկայացնի։ Հաջորդ դատական նիստը նշանակվել է փետրվարի 9-ին։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո