Փաստ ինֆո

ԲԴԽ-ում ավարտվեց Արմավիրի մարզի ընդհանուր իրավասության դատարանի դատավոր Նաիրա Գրիգորյանին կարգապահական պատասխանատվության ենթարկելու մասին ՀՀ ԱՆ միջնորդության քննությունը։

Ինչպես արդեն տեղեկացրել ենք՝ ԱԺ նախկին պատգամավոր, ԵԿՄ նախկին նախագահ Մանվել Գրիգորյանի դատավոր դստեր՝ Նաիրա Գրիգորյանի նկատմամբ, ՀՀ արդարադատության նախարարությունը կարգապահական վարույթ էր հարուցել՝ Գրիգորյանի հորեղբորորդու հաղորդման հիման վրա։ Խնդիրն այն է, որ դատավորը պարզեցված ընթացակարգով քննել է Հրանտ Գրիգորյանի դեմ ներկայացված հայցը՝ չհայտնելով ինքնաբացարկ, ինչպես նաև՝ դատավարության կողմերին չի բացահայտել ինքնաբացարկի հիմքերը։

«Փաստինֆո»-ի թղթակցի հաղորդմամբ՝ այսօր կայացած նիստում ՀՀ արդարադատության նախարարության ներկայացուցիչ Հայկ Սանոյանը ներկայացրել է միջնորդությունը՝ նշելով նաև, որ իր հորեղբորորդու վերաբերյալ մեկ այլ քաղաքացիական գործի շրջանակներում դատավորն ինքնաբացարկ է հայտնել։ Նախարարությունը գտնում է, թե դատավորի գործողություններով հեղինակազրկվել է դատական իշխանությունը, քանի որ դատավորը քննել է իր ազգականի վերաբերյալ գործ։ Ըստ ԱՆ-ի՝ դատավորն իրեն վերագրվող արարքը կատարել է կոպիտ անփութությամբ։

Նշենք, որ Հրանտ Գրիգորյանի դեմ ներկայացված հայցը բավարարվել է, Գրիգորյանն էլ չի վիճարկել վճիռը, կատարել է վճռով նախատեսված գումարային պարտավորությունը, փոխարենը՝ հաղորդում ներկայացրել դատավորի դեմ։ ԲԴԽ անդամ Արշակ Վարդանյանը հետաքրքրվեց՝ դատավորն ինչ եղանակով պետք է կողմերին բացահայտեր պատասխանող կողմի հետ ազգակցական կապի մեջ գտնվելու հանգամանքը, պարզեր կողմերի դիրքորոշումը, եթե առանց դատական նիստ հրավիրելու գործը վարույթ ընթունելու, պարզեցված ընթացակարգ կիրառելու մասին որոշմամբ դատարանը կողմերին տեղեկացրել էր դատական իշխանության կայքում դատական ակտի հրապարակման օրվա մասին, ինչին արձագանքելով ՝ Հայկ Սանոյանը նշեց, որ գրությամբ պետք է տեղեկացներ կամ ինքնաբացարկ հայտներ։

Միջնորդության վերաբերյալ պատասխանում դատավոր Նաիրա Գրիգորյանը նախ նշեց, որ Հրանտ Գրիգորյանն իր մերձավոր ազգականը չէ, բացի այդ, ինքը չի իմացել, որ պատասխանող կողմը հենց նա է։ Դատավորը պարզաբանեց, որ, թեև անունը կարդալով կասկածներ ունեցել է , այդուհանդերձ, որոշել է վարույթ ընդունել գործը, քանի որ որպես պատասխանողի հասցե նշվել էր բոլորովին այլ հասցե, ըստ այդմ, նա չի իմացել, որ խոսքն իր հորեղբորորդու մասին է։ Բացի այդ, նշված գործը քննվել է պարզեցված կարգով, այդ գործերին անձնագրեր չի կցվում, միայն՝ քաղվածք։ Դատավորը նաև հայտնեց, որ Հրանտ Գրիգորյանը ստացել է պատշաճ կարգով ծանուցում և որևէ առարկություն, բացարկ, դիրքորոշում չի ունեցել։ Ինչ վերաբերում է նախկինում Հրանտ Գրիգորյանի գործով ինքնաբացարկ հայտնելուն, ապա այդ գործը, դատավորի գնահատմամբ, նույնական չէ այս դեպքին, քանի որ այն քվվել էր ընդհանուր կարգով և դատավորը տեղեկացվել էր, որ խոսքն իր ազգականի մասին է։ Դատավորը խնդրեց մերժել միջնորդությունը։ Կարեն Անդրեասյանը, հարց ուղղելով Գրիգորյանին, նշեց՝ «գտնում եք՝ ճի՞շտ է հորեղբոր որդու վերաբերյալ որոշում կայացնելը», ինչին արձագանքելով դատավորը նշեց՝ «միանշանակ՝ ոչ»։

«Բոլորս հասկանում ենք, որ հորեղբոր որդու վերաբերյալ դատ անելը ճիշտ չէ։ Արդյո՞ք նրա դեմ որոշում կայացնելն արդարացում է այս դեպքում»,- ասաց Անդրեասյանը, ինչին արձագանքելով դատավորը նկատեց՝ որևէ մեկի դեմ ոչինչ չի արել, արդարադատություն է իրականացրել, եթե իմանար, որ նույն անձի մասին է խոսքը, ինքնաբացարկ կհայտներ։

Լսելով կողմերին՝ ԲԴԽ-ն հեռացել է խորհրդակցական սենյակ։ Դատավորի վերաբերյալ որոշումը կհրապարակվի հունվարի 29-ին, ժամը՝ 09,50-ին։

Հեղինակ՝ Իզաբել Սահակյան

Աղբյուր` Փաստինֆո