Փաստ ինֆո

Սյունիքում ոչխարների՝ ադրբեջանական կողմում հայտնվելու հանգամանքներն այս պահին ուսումնասիրվում են պատկան մարմինների կողմից: Այս մասին «Փաստինֆո»-ի հետ զրույցում հայտնեցին ՀՀ ՊՆ-ից։

Հիշեցնենք, որ այսօր առավոտյան ադրբեջանցիները գողացել են Սյունիքի մարզի Տեղ համայնքի հայ-ադրբեջանական շփման գծի հարևանությամբ գտնվող Արավուսի բնակիչներից մեկին պատկանող ոչխարները։ Տեղ համայնքի ղեկավար Դավիթ Ղուլունցը «Փաստինֆո»-ի հետ զրույցում ասել էր, որ չի կարող հստակ թիվ ասել, թե քանի ոչխարի մասին է խոսքը, քանի դեռ արոտավայրից մնացածը չեն եկել: Այդուհանդերձ, մամուլում տարբեր թվեր են շրջանառվում, համաձայն որոնց` խոսքն ավելի քան 200 ոչխարի մասին է: Նշենք, որ օգտատեր Արթուր Գիգորյանը ևս ահազանգել էր դեպքի մասին` նշելով նաև, որ հրաման է եղել` չկրակելու ադրբեջանցիների ուղղությամբ:
ՀՀ ՊՆ-ից, սակայն, վստահեցնում են, որ հրադադարի խախտում, առավել ևս` ներթափանցման փորձ անգամ տեղի չի ունեցել:

«Առաջնագծում իրադրության, սահմանային միջադեպերի և խախտումների վերաբերյալ պաշտպանության նախարարությունը հանրությանը պատշաճ իրազեկում է. Որևէ միջադեպ, հրադադարի խախտում, առավել եւս ներթափանցման փորձ անգամ տեղի չի ունեցել: Իսկ ոչխարների՝ ադրբեջանական կողմ անցնելու վերաբերյալ հանգամանքներն այս պահին ուսումնասիրվում են պատկան մարմինների կողմից»,- մեզ հետ զրույցում ասաց ՀՀ ՊՆ մամուլի քարտուղար Արամ Թորոսյանը` նշելով, որ ՊՆ համապատասխան ստորաբաժանումը մշտադիտարկում է ոլորտին առնչվող մամուլի հրապարակումները և մեկնաբանում կամ դրանց արձագանքում է ըստ անհրաժեշտության ու նպատակահարմարության:

«Փաստինֆո»-ն նաև կապ հաստատեց ՔԿ-ի հետ` պարզելու, թե արդյոք քրեական վարույթ նախաձեռնվել է, սակայն կառույցից հայտնեցին, որ այս պահին դեռևս հաղորդում չի ստացվել Քննչական կոմիտեում:

Ի. Ս.

Հ.Գ. Ասել է թե՝ մամուլում հրապարակված ահազանգերը, դեպքի վերաբերյալ անգամ համայնքապետի հաստատումը ՔԿ-ի համար հիմք չէ քննություն սկսելու՝ պարզելու, թե իր երկրի քաղաքացու գույքը ինչպես է հայտնվել թշնամու մոտ։

Աղբյուր` Փաստինֆո