Փաստ ինֆո

Բժիշկ-քնաբան, բժշկական գիտությունների դոկտոր, պրոֆեսոր Ռոման Բուզունովը պատմել է, թե օրգանիզմում ինչ խանգարումների կարող է հանգեցնել ապնոեն՝ քնի մեջ շնչառության կարճատև կանգը: Զրուցելով aif.ru պարբերականի հետ, նա մեկնաբանել է Իրկուտսկի բժիշկների հետազոտությունը, որը պարզել է, որ խռմփոցը հանգեցնում է ուղեղի աշխատանքի վատթարացմանը:

Բուզունովը, ինչպես եւ Իրկուտսկի մասնագետները, խռմփոցը կապել է ուղեղի վաղաժամ ծերացման հետ՝ նշելով, որ ապնոեն հանգեցնում է արյան մեջ թթվածնի պարունակության նվազմանը: «Պատկերացրեք, մարդը ութ ժամ քնում է, այս ընթացքում նրա մոտ տեղի է ունենում 500-600 շնչառական կանգ, որին հաջորդում են խռմփոցները։ Այսինքն՝ գումարային չորս-հինգ ժամ նա չի շնչում։ Իսկ մեզ մոտ օրգանիզմի՝ նրա ֆիզիկական եւ հոգեկան վիճակի, վերականգնման բոլոր գործընթացները տեղի են ունենում հիմնականում քնի մեջ՝ էներգիայի կուտակում, ուղեղից քայքայման արգասիքների հեռացում (այժմյան տեսություններից մեկը), ներքին օրգանների եւ համակարգերի գործառույթների աշխատանքի կարգավորում», — բացատրել է քնաբանը։ Նա նաև հավելել է, որ եթե քունը խանգարված է, չի վերականգնվում ոչ միայն ուղեղը, այլև ամբողջ օրգանիզմը։

Մասնագետի խոսքով՝ ուղեղը էներգատար օրգան է, որն իր բնականոն կենսագործունեության համար սպառում է օրգանիզմի ամբողջ արյան գրեթե մեկ երրորդը: «Քնի քրոնիկ խանգարումը, որը նկատվում է քնի ապնոեի ժամանակ, ոչ միայն հանգեցնում է ուղեղի ծերացման, այլեւ մեծացնում է սիրտ-անոթային, նյութափոխանակության, նյարդաբանական խանգարումների զարգացման ռիսկը: Եվ արդյունքում կրճատում է կյանքի տևողությունը և էապես վատացնում կյանքի որակը», - նշել է պրոֆեսորը։

Աղբյուր` Փաստինֆո