Փաստ ինֆո

ՊԵԿ նախկին նախագահ Գագիկ Խաչատրյանը դատարան է ներկայացել անվասայլակով` շտապօգնության մեքենայի ուղեկցությամբ:

«Փաստինֆո»-ի թղթակցի հաղորդմամբ` Երևանի ընդհանուր իրավասության քրեական դատարանում` դատավոր Արթուր Մկրտչյանի նախագահությամբ, շարունակվում է ՊԵԿ նախկին նախագահ Գագիկ Խաչատրյանի և Կարեն Խաչատրյանի գործով դատական նիստը: Այսօրվա նիստին ևս, ինչպես արդեն նշվեց, Խաչատրյանը դատարան է ներկայացել շտապօգնության ուղեկցությամբ: Պաշտպան Երեմ Սարգսյանը հայտնել է, որ միջնորդություն է ցանկանում ներկայցնել` առաջնահերթության կարգով` խնդրելով թույլ տալ Խաչատրյանին` մեկնել ՀՀ-ից և բուժում ստանալ արտերկրում, սակայն դատախազ Գևորգ Սարգսյանն առարկեց` նշելով, որ արդեն մի քանի նիստ է, ինչ գործով անցնող վերջին վկան` Սեդրակ Առուստամյանը, ներկայանում է դատական նիստերին, սակայն նրա հարցաքննությունն այդպես էլ չի իրականացվում, ըստ դատախազի, պաշտպանության կողմը ցանկանում է ձգձգել դատավարությունը: Դատախազը նշում է` չի առարկում, որ միջնորդությունը ներկայացվի, բայց դա թող ներկայացվի Սեդրակ Առուստամյանի հարցաքննությունից հետո: Պաշտպան Երեմ Սարգսյանն էլ նկատեց` ինչն է խանգարում, որ նախ միջնորդությունը քննարկվի, հետո` վկան հարցաքննվի: Երեմ Սարգսյանը նաև հիշեցրեց Խաչատրյանի առողջական վիճակը:

«Գագիկ Խաչատրյանի առողջական վիճակն այն աստիճանի է սրվել, որ նույնիսկ հնարավոր է վիրահատությունը չօգնի վերականգնել նրա քայլելու ունակությունը, կարող է հանգեցնել անդառնալի հետևաքների, այդ թվում մահվան»,- ասաց պաշտպանը։
Պաշտպանը պնդեց` իր ներկայացրած միջնորդության քննարկումն առաջնահերթ է, որից հետո նոր անցեն մյուս գործողությունների կատարմանը։

Գագիկ Խաչատրյանի առողջական վիճակով պայմանավորված դատական նիստն ընդմիջվեց կարճ ժամանակով` Խաչատրյանին ցավազրկող ներարկելու համար:

Հիշեցնենք, որ Գագիկ Խաչատրյանը և Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։

Ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ» ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված «Հիդրոապարատ» ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ: Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո