Փաստ ինֆո

Նման գործողությունները միշտ կարող է ինչ-որ բան թաքցնել: Այս մասին «Փաստինֆո»-ի հետ զրույցում ասաց բնապահպանական իրավունքի մասնագետ Նազելի Վարդանյանը` անդրադառնալով «Լիդիան Արմենիայի» 12.5 տոկոս բաժնեմասը Կառավարությանը նվիրաբերելու մասին որոշմանը: Նշենք, որ բաժնետոմսերի կառավարման լիազորությունը վերապահվել Էկոնոմիկայի նախարարությանը։

Հիշեցնենք, որ ավելի վաղ բավականին մութ և խնդրահարույց գործարքի հետևանքով ԶՊՄԿ բաժնեմասերը ձեռք բերելուց հետո կառավարությանը բաժնեմաս էր նվիրել նաև  այդ ընկերության նոր սեփականատերը՝ Ռոման Տրոցենկոն:

«Առաջիննը` «Լիդիան Ինթերնեյշնլ»-ը սնանկացած կազմակերպություն է, վերակառուցման մեջ էր և բոլոր բաժնեմասերն անցել էին երկու կազմակերպությունների, իսկ Լիդիան Արմենիայի հիմնական բաժնետերը Լիդիան Ինթերնեյշնլն է: Այսինքն` հենց այդտեղ արդեն խնդրահարույց է, որ գումարներ չուներ և պարտքերի պատճառով իրեն հեռացրել էին Տորոնտոյի ֆոնդային բորսայի ցուցակից և սնանկացման մասին վճիռ էր կայացվել:2020թ մինչև այսօր նրանք գումարների փնտրտուքների մեջ են: Այդ ամբողջ ժամանակահատվածում արբիտրաժային գործընթացներից էին խոսում, ինչի իրավունքը չունեին, որովհետև օֆշորային գոտում էին գրանցված, հետո 2018թ գրանցեցին երկու կազմակերպություն` ազգային, այլ ոչ թե օֆշորային համարվելու համար, որ ներդրումային օրենքները տարածվեն, սակայն դա ևս արդյունավետ չէր լինի, քանի որ նոր գրանցումները եղել են, երբ Ջերմուկի և Գնդեվազի բնակիչների կողմից ճանապարհը փակ էր, հանքը չէր գործում»,- նշեց Վարդանյանը` հիշեցնելով, որ հաջորդիվ ընկերությունը դիմել էր կառավարությանը, հայտ ներկայացրել` արբիտրաժ դիմելու համար, սակայն ժամկետները ևս անցել են: Ըստ Վարդանյանի` դա պարզապես «վախեցնելու» նման բան էր:

«Այդ ժամանակ Ավինյանը 2 մլրդ դոլարից էր խոսում, թեև իրենք (ընկերությունը հեղ.) միշտ հայտարարել էին, որ 460 մլն են ծախսել, իրենք որտեղից էին վերցրել այդ 2 մլրդը, թե երկիրը բանկրոտ կդառնա, պարզ չէ: Բարձրաստիճան պաշտոնյաները, կարծես թե, ստանձնել էին իրենց փաստաբանի դերը, որովհետև, եթե քեզնից այդ գումարը չեն պահանջում, դու նման գումարի մասին ես ասում, հիմք ես ստեղծում, որ հետագայում ինչ-որ պահանջներ ներկայացնեն: Դա էլ է ինձ համար անհասկանալի, որովհետև պետական այրերը պետք է պետական շահը պաշտպանեն` անկախ այս կամ այն հարցի առնչությամբ անձնական վերաբերմունքից»: Հաջորդ քայլը եղել է հուշագրի ընդունումը, որով արձանագրվել էր, թե 250 մլն դոլարի չափով ներդրումներ կլինեն, սակայն դա, ըստ Վարդանյանի, «փուչիկ» է, քանի որ խոսքը միայն Եվրասիական բանկից 100 մլնի մասին, որն այդպես էլ չի ստացվել, իսկ հայկական բանկերից որևէ մեկը, ի պատասխան հարցումների, պատրաստակամություն չի հայտնել` գումար տալու:

«Այս իրավիճակում, այսինքն, «չեղած բանից» 12.5 տոկոսը հուշագրով տալիս են կառավարությանը: Եթե գնացել են դրան, շատ վատ է, որովհետև չգործող կազմակերպություն է` մի շարք պարտավորություններ ունեցող, խախտումներով, ռիսկային և, փաստորեն, կառավարությանը մտցնում են այդ ռիսկի տակ`լինի դա 12.5 տոկոսով, թե 1 տոկոսով: Դա բոլորովին այլ հարց է, հասկանալի է` կառավարությունն այդտեղ ինչ դեր է ունենալու: «Լիդիանի» տնօրենը հարցազրույցներից մեկում ասաց, որ 12.5տոկոսը տալիս են կառավարությանը և կարծում են, որ կառավարությունը իրենց օգտին գործողություններ կանի: Դա ինչ է նշանակում, դա իր բնութագրումն ունի, այսինքն` կաջակցի և այլն, իսկ եթե աջակցության համար ինչ-որ բան են տալիս, դա արդեն իրավաբանության մեջ իր ձևակերպումն ունի »,- ասաց Վարդանյանը:

Մեր զրուցակիցը նաև հիշեցրեց ԶՊՄԿ գործարքը` նշելով, որ մի շարք հարցեր են եղել, մինչև փոխանցումը 18 մլն տոննա ապօրինի հանքաքար էին հանել և այդպես էլ հայտնի չդարձավ, թե ինչ եղավ, այդ և այլ խախտումների վերաբերյալ լռեցին, նույնն էլ, ըստ մեր զրուցակցի, հիմա է լինելու, լռելու են, որովհետև պետությունը բաժնեմաս ունի, ինչը նորմալ երևույթ չէ, եթե պետությունը ցանկանում է ինչ-որ բան ունենալ, թող պետականացնի, թող ոլորտը լինի պետական, ի վերջո, և ընդերքը, և հանածոները համաժողովրդական սեփականություն է:

«Ոչ թե լինի ինչ-որ մի ընկերությանը, որը արտահանում է, քողարկվեն պետությանը մի քանի տոկոս բաժնետոմսեր տալով և իրենց հարցերը լուծելով: Դա նորմալ չէ»,- նշեց Վարդանյանը` հավելելով, որ պետական նման մասնագիտական կառույց չկա, կառավարության աշխատակազմին էր հանձնարարվել, որոնք չունեն ոչ այդ գործառույթները, ոչ էլ` մասնագիտական ունակությունները, դա ոչ մի լավ բանի չի հանգեցնելու, խախտումները կրկնապատկվելու են և լռելու են այդ մասին:

Հեղինակ` Իզաբել Սահակյան

Աղբյուր` Փաստինֆո