Փաստ ինֆո

Էկոնոմիկայի նախարարությունը Կառավարության անունից «Բաժնետոմսերի նվիրատվության» պայմանագիր կստորագրի «Լիդիան Արմենիա» ընկերության հետ, համաձայն որի՝ Ընկերությունը պարտավորվում է կանոնադրական կապիտալի 12,5 տոկոսը փոխանցել ՀՀ Կառավարությանը։ Որոշումն ընդունվեց Կառավարության այսօրվա նիստում։

Նախագիծը ներկայացնելու ժամանակ Էկոնոմիկայի նախարարի տեղակալ Անի Իսպիրյանը նշեց, որ այդ պայմանագիրը բխում է 2023 թվականի փետրվարի 22-ին Կառավարության, Եվրասիական Զարգացման Բանկի և «Լիդիան Արմենիա» ՓԲ ընկերության միջև կնքված փոխընբռնման հուշագրից։

«Հուշագրով նախատեսված է ապահովել Ամուլսարի հանքի նախապատրաստական, շինարարական և հետագա շահագործման աշխատանքների շարունակման հնաարվորությունը։ «Լիդիան Արմենիա» ընկերությունը պարտավորվել է ապահովել առնվազն 250 մլն դոլարի չափով ներդրում։ Այսօրվա նախագծով առաջարկվում է ընդունել հուշագրից բխող բաժնետոմսերի նվիրատվությունը, համաձայն որի՝ ՀՀ Կառավարությունը կընդունի «Լիդիան Արմենիա» ընկերւթյան կողմից թողարկած 5000 դրամ անվանական արժեքով հասարակ բաժնետոմսերի 12,5 տոկոսը, այսինքն՝ 12 500 հատ բաժնետոմս»,-նշեց փոխնախարարը։

Նախատեսվում է բաժնետոմսերի կառավարման լիազորությունը վերապահել Էկոնոմիկայի նախարարությանը։

«Լիդիան Արմենիա» ընկերությունը պարտավորվել է նաև ամեն տարի ազդակիր համայքներին 7 մլն դոլար վճարել․ այդ համայնքներն են՝ Ջերմուկը, Սիսիան խոշորացված համայնքը և Վայքը։

Արձագանքելով նախագծին՝ Նիկոլ Փաշինյնաը նկատեց՝ Ամուլսարի շահագործման հետ կապված մտահոգություններ եղել են, բայց դրանց հետևից գնացել են, ու հիմա արդեն հնարավոր է շարունակել նախագիծը։

«Ողջունելի է, որ ներդրողները ցանկացել են, որ Կառավարությունը՝ այսինքն ՀՀ ժողովորդը, բաժնեմաս ունենա այդտեղ։ Ամուլսարի շահագործումը լրացուցիչ խթան կլինի ՀՀ տնտեսության զարգացման ու տնտեսական աճի համար»,-նշեց Փաշինյանը։
Նշենք, որ «Լիդիան Ռիսորսիզ Արմենիա Լիմիթեդ» բաժնետիրական ընկերությունը հանդիսանում է Լիդիան Արմենիա» փակ բաժնետիրական ընկերության բաժնետոմսերի 100 տոկոսի սեփականատերը։

Աղբյուր` Փաստինֆո