Փաստ ինֆո

Այս պահին ունենք 200-ից ավելի դժվարամատչելի, ըստ էության փակ դիրքեր։ ԱԺ-ում նման հայտարարությամբ է հանդես եկել ՀՀ պաշտպանության նախարար Սուրեն Պապիկյանը։

Մասնավորապես, անդրադառնալով օրերս մարտական դիրքից իջնելիս ձնահյուսքի հետևանքով մահացած զինծառայող Բենիամին Մանուչարյանի մահվան հանգամանքներին, Սուրեն Պապիկյանը հայտնեց, որ հանհգամանքները կարող են պարզվել ծառայողական պատշաճ քննության և քննչական գործողությունների արդյունքում: Խնդիրը երկու կողմ ունի, որոնցից մեկը բնական պայմաններն են:

«Անտանելի եղանակային պայմաններ են բարձր լեռնային հատվածներում: Այս պահին ունենք 200-ից ավելի դժվարամատչելի դիրքեր, ըստ էության, կարելի է ասել փակ: Դրանք ամենօրյա ռեժիմով բացվում են, սակայն եղանակային պայմանների բերումով մշտապես փակման ենթակա են՝ բքի և ձնահյուսերի պատճառով: Սրանցից զատ կան նաև դժվար հասանելի ուղղություններ: Մենք ունենք նաև շուրջ մեկ տասնյակի հասնող դիրքեր, որտեղ բոլոր տիպի եղանակային պայմաններում, այդ թվում` ամառային ամենատաք շրջանում, մեքենայում հնարավոր չէ հասնել այդ դիրքերին: Ուզենք, թե չուզենք` զինծառայողների տեղաշարժը մինչև այդ դիրք և սնունդ հասցնելը իրականացվում է հետիոտն կամ այլ եղանակներով, դա պայմանավորված է տվյալ դիրքերի աշխարհագրական դիրքերով»,- ասաց Սուրեն Պապիկյանը` հավելելով, որ գործ ունենք վերջին երեք տարվա ընթացքում ձևավորված առաջնագծի հետ, որտեղ ոչ բոլոր ուղղություններն են հայտնի որպես ձնահյուսքերով ուղղություններ:

Մյուս վարկածը, որը հայտնեց նախարարը, վերաբերում է` պարտականությունները պատշաճ կատարելու թերացումներ: Պապիկյանի խոսքով` ակնհայտ է, որ վերադաս հրամանատարության կողմից այդ օրերի համար առկա են գրավոր հանձնարարականներ` տեղաշարժեր չիրականացնելու համար: Ավելին, հատուկ բանակային կորպուսի տարածքում եղել է 5 զինծառայող, ում ծառայության ժամկետն ավարտվել է, սակայն եղանակային անբարենպաստ պայմանների պատճառով զինծառայողներից չորսը մնացել են դիրքերում և միայն երկու օր անց է հնարավոր եղել իրենց իջեցնել դիրքերից: Պապիկյանը չբացառեց, որ այս դեպքում կա վարկած, որ շատ է եղել արտաքին ճնշումը:

Աղբյուր` Փաստինֆո