Փաստ ինֆո

Ադրբեջանը թող առաջարկի այլ քարտեզ, որը կունենա իրավական հիմնավորվածություն, կարելի է բերել քարտեղ ենթադրենք մ.թ.ա. 2-րդ դարի, դա լուրջ չէ, կարելի է բերել քարտեղ՝ 1828 թ-ի Թուրքմենչային պայմանագրի, բայց դա էլ լուրջ չէ։ Մենք պետք է բերենք քարտեզ, որտեղ Հայաստանը և Ադրբեջանը եղել են անկախ պետություններ կամ խորհրդային միության կազմում են եղել, և եղել են որոշակի սահմաններ, որոնք իրավական հիմքեր են ունեցել։ Այս մասին ԱԺ-ում լրագրողների հետ զրույցում ասաց ՔՊ-ական պատգամավոր Գևորգ Պապոյանը։

«Սկզբունքորեն, եթե ասում ենք 1974 թ-ի քարտեզ, բայց հայտնվում է օրինակ 1960թ-ի քարտեզ, որը էլի իրավական հիմք ունի՝ մենք էլի խնդիր չունենք այդ քարտեզի հետ, բայց այդ քարտեզը պետք ունենա իրավական հիմք, հաստատված լինի ադրբեջանական և հայկական ՍՍՀ ԳԽ-ների կողմից։ Այսինքն, այն պետք է պաշտոնական փաստաթուղթ լինել, ոչ թե ենթադրենք պատմաբանների կողմից նկարած ցանկալի քարտեղ, որը բերելու է էլ ավելի մեծ լարման»։

Դիտարկմանը, թե մինչ մենք խոսում ենք քարտեզների մասին՝ Ադրբեջանը հստակ ասում է, որ չի պատրաստվում ոչ մի քայլ հետ գնալ այն տարածքներից, որոնք օկուպացրել է պատերազմից հետո՝ Պապոյանն ասաց, որ դա հենց այն ապակառուցողական մոտեցումներից է, որը որևէ կերպ չի նպաստում ստեղծված իրավիճակի հանգուցալուծմանը։

«Ինչու երեկ, այսօր կամ վաղը չի կնքվում խաղաղության պայմանագիր՝ հենց նաև նման հարցերի պատճառով, որովհետև, միանշանակ ու հստակ է, որ առանց քարտեզների ցանկացած լուծում ապագայում առաջացնելու է նոր լարվածություններ։
Պարտադիր չէ, որ այդ քարտեզը մեր կամ Ադրբեջանի դուրը գա, մի տեղ կարող է մեր դուրը չգալ, մի տեղ՝ Ադրբեջանի։
Կա նման բան, որ 1990-ականների պատերազմից հետո տարբեր շեղումներ են արձանագրվել, անգամ մի դիրք, եթե կողմերից մեկը վերցրել է՝ դա դասական քարտեզից շեղում է, բայց մենք կարծում ենք, որ մոտեցումը պետք է լինի արդար, որը ընդունելի կլինի նաև միջազգային հանրության կողմից։

Դասական մոտեցումն այն է, որ վերցնում ենք քարտեզը, այդ քարտեզի հիման վրա կնքում ենք պայմանագիր, հետո այդ քարտեզը վերցնում են երկու երկրների սահմանազատման հանձնաժողովները և սկսում են կոնկրետ տարածքներով գնալ ու ասել, որ այստեղ Հայաստան է, այստեղ՝ Ադրբեջան է։ Այդպես ամբողջ սահմանի երկայնքով»։

Նա ընդգծեց, որ ֆունդամենտալ հարցը հենց քարտեզն է, եթե պայմանագրի հիմքում դրվի քարտեզը՝ հարցերը հետագայում տեխնիկակն են լինելու։

Աղբյուր` Փաստինֆո