Փաստ ինֆո

Քաղաքապետարանի այսօրվա գործակարգավարական խորհրդակցության ընթացքում քաղաքապետ Տիգրան Ավինյանն անդրադարձավ օղակաձև զբոսայգու թենիսի կորտերի մասնավորեսցմանը։

«Ուզում եմ ասել, որ ծրագիրը, որ ներկայացվել է ինձ՝ թենիսի ակումբի քանդման ծրագիր չէ, օղակաձև այգին Փոքր Կենտրոնի, կարելի է ասել, միակ երևելի կանաչ տարածքն է և, հետևապես, օղակաձև զբուսայգու փուլային վերականգնումը որպես կանաչ հանրային տարածք՝ մեզ համար գերակայություն է և առաջնահեթություն։

Ծրագիրը նախ վերաբերում է տարատեսակ ռեստորաններին, սրճարաններին և տաղավարներին, որոնք այդ հատվածում վերանալու են՝ այդ հատվածը դարձնելով հանրային, բոլորի համար հասանելի տարածք»։

Անդրադառնալով թենիսի կորտերի՝ նա նշեց, որ ինքն էլ դեռ 1996-2002 թ-ը «Արարատ» ակումբում պարապել է ու դա իր ամենասիրելի վայրերից մեկն է։

Նա ընդգծեց, որ թենիսի ակումբը պետք է վերակառուցվի և հասանելի լինի պարապողների համար։ «Բայց վստահաբար թենիսի ակումբի համար տեղակայման դիրքը այդքան էլ կարևոր չի, իսկ Փոքր Կենտրոնում օղակաձև այգուց ու մի քանի այլ փոքր այգիներից բացի՝ կանաչ տարածքի այլ հնարավորություններ չկան։ Հետևապես այստեղ լուծումները շատ պարզ են. ««Արարատ» ակումբին անպայման տրամադրվելու է տարածք՝ վերակառուցելու համար, այն շարունակելու է գործել, և մենք դա ապահովելու ենք։

Պետք է ապահովենք, որ այդ ծրագիրը արվի նախքան կորտերի տեղափոխումը։ Այսինքն, պետք է մեկ այլ հարմար տեղում ունենանք ակումբը, նոր հետագայում անցնենք քանդման աշխատանքներին: Իսկ ինչ վերաբերում է կանաչ տարածքների վերականգնմանը՝ այս հատվածում էլ պետք է տարատեսակ շենք-շինություններ քանդվեն, որպեսզի հանրային տարածքը վերադարձվի երևանցիներին։

Քանի որ աղմուկը այստեղ շատ էր, բոլոր տեսակի պսևդո-մասնագետներ սկսեցին խոսել այս մասին, անգամ հասանք այն գնահատականի, որ սա կոռուպցիա է։ Ես դեռ չեմ տեսել, որ որևէ ներդրող առաջարկի 8-9 մլն դոլար ներդնել կանաչ տարածքների վերականգնման համար և չպահանջի բիզնես կոմպոնենտ, սա կարևոր սոցիալական ծրագիր է։

Բոլոր նրանց, ովքեր ճանճերի նման հավաքվել էին այս թեմայի շուրջ, որպեսզի փոքրիկ քաղաքական դիվիդենտներ շահեն` ասեմ` չի ստացվելու»։

Աղբյուր` Փաստինֆո