Փաստ ինֆո

Չէի ուզենա մեր ժողովրդին վախեցնել, բայց մենք այնպիսի իրավիճակում ենք, որ մշտապես պետք է պատրաստ լինենք մեր երկրի պաշտպանությանը: ԱԺ-ում այսօր տեղի ունեցած ճեպազրույցում ասել է «Հայաստան» խմբակցության ղեկավար Սեյրան Օհանյանը։

Նրա խոսքերով՝ թուրք-ադրբեջանական տանդեմը, 2020-ի պատերազմում հաջողության հասնելուց հետո, շարունակում է պարտադրանքի լեզվով խոսել Հայաստանի հետ։
«Խաղաղության օրակարգը կեղծ է, խաբկանք է Հայաստանի համար: Խաղաղության պայմանագիր չի կարող լինել, որովհետեւ պատերազմում պարտված իշխանությունները միշտ գտնվում են պարտադրանքի ու ճնշման ներքո, այդ օրակարգը միակողմանի է, մեր կողմից դա խաղաղություն մուրալ է, իսկ հակառակորդի կողմից՝ խաղաղության պարտադրանք ՀՀ-ի նկատմամբ: Դրա համար էլ Ալիեւի հռետորաբանությունը չի փոխվել, ինքը յուրաքանչյուր փուլում նոր պահանջ է ներկայացնում Հայաստանին»,- ասել է Օհանյանն ու ավելացրել. «Մենք հասկանում ենք, որ, ամբողջությամբ հայաթափելով Արցախը, իրենք հիմա անցել են Հայաստանի նկատմամբ ճնշումները շարունակելուն: Մեր գործընկերները ծանոթացել են խաղաղության պայմանագրին, դրա փակ մասին չեմ անդրադառնա, բայց կասեմ, որ այնտեղ որևէ մի խոսք չկա այն պարտավորվածությունների մասին, որոնք պետք է իր վրա վերցնի Ադրբեջանը։ Նկատի ունեմ ՀՀ ինքնիշխան տարածքից դուրս գալը, սահմագծում և սահմանազատում իրականացնելը»:

ՀՀ պաշտպանության նախկին նախարարը փաստել է, որ Ադրբեջանը ցեղասպանությունէ իրականացրել մեր հայրնեիքի մի մասում եւ չի կարծում, որ նորմալ իշխանությունները պետք է այս իրավիճակում ձեռք մեկնեն եւ ասեն՝ գնում ենք խաղաղության:

Նրա փոխանցմամբ՝ եթե Նիկոլ Փաշինյանը նորմալ կառույցներ ունենար, որոնք ժամանակին նորմալ գնահատեին ռազմաքաղաքական իրավիճակը, շուտվանից կտեսնեին, որ խաղաղության վերաբերյալ Ադրբեջանի առաջարկը խաբկանք է մեզ համար. «Ինքն ուշացումով է դա հասկանում։ Այսօր տեսնում ենք, որ ՀՀ իշխանություններն ամեն ինչ ուշացումով են անում: Պատերազմական գործողությունները կանգնեցնելուց հետո հանցավոր հրաման տվեցին եւ զորքերը հետ քաշեցին՝ չհասկանալով, որ յուրաքանչյուր թիզ հող հետագայում հիմք է հանդիսանալու դելիմիտացիա, դեմարկացիա իրականացնելու, բանակցություններում մեր շահերն առաջ տանելու համար: Երբ պատերազմը կանգնեց, իրենք չհասկացան, որ առաջնային խնդիրը սահմանների պաշտպանությունն է, պետք է բանակն արագ համալրել: Մեր իրավիճակում վատթարացնել հարաբերությունները հատկապես ռազմավարական գործընկերների, հարեւանների հետ եւ դրա փոխարեն անորոշություն ունենալ մեր տարածաշրջանում, անընդունելի է»,- հայտարարել է ընդդիմադիր խմբակցության ղեկավարը:

Աղբյուր` Փաստինֆո