Փաստ ինֆո

Ադրբեջանի կողմից կա պահանջ՝ Հայաստան-Ադրբեջան բանակցությունների օրակարգում և շատ հստակ ասում է՝ ինչին կարղ է հասնել խաղաղ ճանապարհով՝ գնալու է այդ ճանապարհով, իսկ ինչը չի կարողանա խաղաղ վերցնել՝ կանի պատերազմական գործողություններով։ Այս սկզբունքը որ արդեն մի քանի տարի է, ինչ բանակցությունների հիմքում է ։ Այս մասին ԱԺ-ում լրագրողների հետ ճեպազրույցի ընթացքում ասաց «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով Ալիևի վերջին հայտարարություններին։

Նրա խոսքով՝ Ադրբեջանի նախագահի հայտարարությամբ տեղի չի ունեցել սկզբունքների կամ ընդհանուր ճանապարհի շատ մեծ փոփոխություն։

«Ադրբեջանի իշխանությունները բանակցային գործընթացի տարբեր էլեմենտների գաղտանզերծում են կատարում։ Պրոցեսն այնպիսին է, որ սա ենթադրում է Հայաստանի կողմից նոր, ավելի մեծ տարածքային զիջումներ։ Երկրորդ տարբերակն այն է, որ չի բացառվում, որ Ադրբեջանը կգնա հերթական արկածախնդրության ճանապարհով»,- նշել է ընդդիմադիր պատգամավորը։

Անդրադառնալով Նիկոլ Փաշինյանի առաջարկին, որ խաղաղության պայմանագրով նաև սպառազինության վերահսկում պետք է ամրագրվի՝ Աբրահամյանը նշեց, որ այդ առաջարկը շատ հեղհեղուկ է։ «Կա նաև ՄԱԿ-ի ռեեստր, որտեղ պետությունները ներկայացնում են իրենց ռազմական մատակարարումների չափերը, բայց տարիները ցույց են տվել, որ Ադրբեջանը և այլ պետություններ այդ թվերը պատշաճ չեն ներկայացրել։ Դրանով հայկական կողմը փորձում է ներկայացնել իր կառուցողական կեցվածքը, այն դեպքում, երբ Արդբերջանը չի էլ թաքցնում իր ագրեսիվ պահվածքը, բայց դա չաշխատող մեխանիզմ է»,- արձանագրել է գործիչը։

Հարցին, թե տեսնում է ռազմական գործողությունների վտանգ՝ նա ընդգծեց, որ վերջին 10 օրերի իրադարձությունները, պաշտոնական Երևանից և Բաքվից հնչող հայտարարությունները տարբեր իրադրային մեկնաբանությունները ցույց են տալիս, որ իրավիճակը կարող է կտրուկ փոփոխության ենթարկվել և ռազմաքաղաքական այս իրավիկճակը կարող է կտրուկ սրվել։

«Ակնհայտ է, որ բանակցային գործընթացում իրադարձություններն այնպես չեն զարգանում, ինչպես տարեվերջին էր, երբ միայն դրական ազդակներ էին փախանցվում»։

Նա նաև ընդգծեց, որ վերջին մեկ ամսում պարզ դարձավ, որ ընդհանուր փաստաթղթից փորձ է արվում դուրս բերել սահմանների դելիմիտացիայի և դեմարկացիայի հետ կամված գործընթացը, ինչպես նաև ռեգիոնալ ապաշրջափակմանը վերաբերող դրույթը։

«Նշեմ, որ սրանք հայ-ադրբեջանական բանակցությունների ամենաառանցքային դրույթներն են, իսկ երրորդը եղել է Արցախի կարգավիճակի հարցը, որն Ադրբեջանը պատերազմի միջոցով փորձեց լուծել, իսկ ՀՀ իշխանությունները փորձում են ցույց տալ, որ այդ էջը փակ է։ Այս իրավիճակում ստացվում է, որ միգուցե ինչ-որ փուլում լինի փաստաթուղթ Հայաստանի և Ադրբեջանի միջև, մարդկանց մոտ տպավորություն ստեղծվի, թե Հայաստանը վերջապես գնում է խաղաղության և տարածաշրջանում խաղաղություն և կայունություն է հաստատվում, բայց եթե կարևորագույն այդ երկու դրույթները՝ սահմանների ճշգրտման և ռեգիոնալ ապաշրջափակման հետ կապված դուրս են մնում փաստաթղթից, դա նշանակում է, որ եղած սպառնալիքները որևէ ձևով չեն փակվում և ցանկացած փուլում դրանք կարող են բերել իրավիճակի կտրուկ սրմանը, այդ թվում՝ ռազմական գործողությունների մեկնարկին»,- ասաց Աբրահամյանը։

Աղբյուր` Փաստինֆո